YEREMIA 19:15 - Alkitab Singog In Mongondow Masa In Tanaa

¹⁵ kon ki Tuhan Inta Totok in mokawasa, Allah in Israel in noguman nanaa, “Popisí in moiko pamandot bo doí mokidongog, dá Akuoi in mopoangoibí kon kotá tanaa bo kon bayongan in ḻipú kon diugneamai in bayongan bodito inta ain sinomayá-Ku.”

YEREMIA 19:15 Mawu Ofanana

NEHEMIA 9:17

Mosia in diá motoindudui, bayongan in kopopia-Mu iḻiongdon, bo bayongan in oaid-Mu inta mokoherang diádon kinotoropan monia. Takin kaḷakuang nomiḻí in mosia kon itoi, sin modia kon i monia mayá in Mesir, bui mobaḻí ata. Táe Iko in ki Allahbí inta moibog mongampung, mosabar, mopia in gina bo nopuḻing in tabi. Tabi-Mu in diábí in poḻiuan; Diábí sinaḷáan-Mu in mosia.

NEHEMIA 9:29

Sinoboḷow-Mu in mosia sinbá totundú-Mu in duduian, táe diá sinarima monia in hukum-Mu takin dinumodia. Bokaka, aka hukum-Mu aidan, yo notantúbí kon koḷukadan in kobiagan. Mosia motogat in uḷu bo motogat doman in gina, doí mokidongog, bo doí dumudui.

YEREMIA 11:11

Tuamai, Akuoi, ki Tuhan nopotoingat kon Akuoi in mopoangoibí in bodito kon i monia bo mosia in diábí mokoḷagui kon tua. Aka mosia mokuani mokituḷung kon i-Nakó, Akuoi in doíbí mokidongogmai.

YEREMIA 11:17

Akuoibí in inta ain noposindog in Israel bo Yohuda, Akuoi, Tuhan Inta Totok in mokawasa. Táe tanaa in Akuoi ain nonomayá kon mopoangoi in bodito kon i monia. Mosiadon tontaní inta nokopopisí kon tua komintan, sin mosia in nogaidon kon inta moraat, tuata in noposumba in kuruban kon i Baal dá sinumorú in Akuoi.”

YEREMIA 13:11

Naonda bo bintoḷ nopoḷok noitogot nopia kon ogotan in intau inta nomaké, natuata in makusud-Ku sinbá umat in Israel bo Yohuda moyotogot modagin kon i-Nakó. Pongin natua mosia in mobaḻí umat-Ku inta nomaḻí kon tangoi-Ku in dinayow bo horomaton. Táe, mosia in doíbí dinumudui kon i-Nakó.”

YEREMIA 17:23

Táe mogoguyangmu in doí mokidongog andeka nonaridi kon onu in pinoguman-Ku. Mosia in pamandot bo doí tumoindudui andeka toboḷowon.

YEREMIA 18:11

Ki Tuhan in noguman kon inakó, “Tanaa, pogumandon kon intau mita in Yohuda bo intau in Yerusalem kon Akuoi in koyogotdon in momia kon tomayá moḷawang kon i monia, bo moposadia in hukuman kon i monia. Potabádon in mosia monaḷámai kon kobobiag inta binaradosa tatua poḷat monompia kon dodia bo gogutú monia.

YEREMIA 19:3

Akuoi in musti moguman nanaa, “Ei datu mita in Yohuda bo intau in Yerusalem! Indongogai in singog poguman-Ku kon inimu, Akuoi ki Tuhan Inta Totok in mokawasa, Allah in Israel. Akuoi in mopoangoi in bodito moḷoben kon tampat tanaa dá intau inta mokodongog in moitaḻikokog.

YEREMIA 22:21

Akuoi in nosingogdon kon inimu kon dodai in kaadaanmu mopiapa, táe moiko in doí mokidongog. Memang natuabí in gogutúmu nongkon dungkuḷmai dapot in tanaa mako; diábí kon dodai in onda in motoindudui kon i-Nakó.

YEREMIA 25:3

“Kon bonu in doyowa nopuḷú bo toḷu notaong, pinangkoi kon taong impuḷú bo toḷúnea kon pinomarentaan i Yosia adí ḷoḷaki i Amon kon Yohuda, nodapot in singgai naa ki Tuhan in noguman kon inakó bo diábí kon dodai in onda in diá pinogumanku kon inimu onu inta ain pinoguman-Nea. Táe moiko in diá nopandungmai.

YEREMIA 25:4

Ki Tuhan in umuran doman mopotabá mangoi kon inimu in nabi mita mogogundoi-Nea, táe moiko in doíbí mokidongog bo monaridi kon i monia.

YEREMIA 25:7

Táe ki Tuhan tontaní in noguman kon moiko in diábí nokidongog kon i-Nia. Sedang bo moiko in nokopomukábí kon torú-Nea popisí in berhalamu mita tatua. Moikobí tontaní in nopoangoi in hukuman-Nea kon inimu tontaní.

YEREMIA 25:8

Popisí in moiko doí mokidongog kon tosingogon-Nea mita, dá ki Tuhan Inta Totok in mokawasa in noguman,

YEREMIA 36:31

Iko, buímu bo pojabatmu mita in hukumon-Ku popisí in dosa mita inta inaidan monimu. Akuoi in mopoangoibí kon i monimu in bayongan bodito inta ain pinonindoyó-Ku kon inimu, sin pinomayá iko andeka intau inta nogutun kon Yerusalem bo kon Yohuda diábí nopandungmai kon sindoyó-Ku mita.”

YEREMIA 5:3

Inta sinuntut i Tuhan in kososatiabí. Ki Tuhan in noḷubok kon i monimu, táe diá in pandung monimu. Sia in nomutuk kon i monimu, táe moiko in doí sambokon. Moiko in pamandot, bo doí mogogai in mogaid kon dosamu mita.

YEREMIA 6:19

Taridiai, ei butá! Umat-Ku in doíbí motarima kon totundú-Ku bo diá motoindudui kon i-Nakó. Mobaḻí bungai in tomayá monia in popoangoi-Ku in inta mokororiga kon i monia.

YEREMIA 7:26

Táe diá in nokidongog andeka nonondudut. Tongábí nodugang in pamandot monimu bo moraa-raatdon nongkon mogoguyangmu.”

OMBAḶ 2:2

Bayongan in rawang in bonok kon butá in Yohuda, irimumud-Nea takin diá in tabi. Kon bonu in torú-Nea dinangatan-Nea nodapot in noumpag in dinding mita inta nogoḻingoi kon butá tatua. Dodatuan tatua takin itoinea mita iḷabú-Nea nodapot in mokooyádon.