YEREMIA 18:21 - Alkitab Singog In Mongondow Masa In Tanaa

²¹ Táe tanaa, Tuhan, biódon mako in adí mita monia matoi in gogoy andeka matoi kon poparangan. Biódon mako in bobay mita monia kobuḻian in buḷoi ḷoḷaki bo adí; biódon mako in ḷoḷaki mita matoi popisí in yampoi in takit bo intau moguod in matoi kon poparangan.

YEREMIA 18:21 Mawu Ofanana

TAWARIKH 2 36:17

Ki Tuhan in nopogonú kon gina in datu in Babel sinbá monubu kon i monia. Ki datu tatua in noḻimod kon intau in Yohuda inta nongobagupa, noitakin doman in mosia inta kon bonu in Baḷoi Tuhan. Diábí in Sia nonotabi kon tobatúmai in intau, noguod andeka noguyang, ḷoḷaki andeka bobay, notakit andeka nosehat. Mosia komintan inogoi i Allah kon i datu in Babel.

MAZMUR 63:10

Táe intau mita inta moibog moḻimod kon inakó in moponagbí kon dunia in intau minatoi.

MAZMUR 63:11

Mosia in matoibí kon bonu in poparangan, bo mobaḻí kokaanon in mahaḷuk moraat.

IḶUAIAN 22:24

Tumorú in Akuoi bo moḻimod kon i monimu kon bonu in parang, modapot in ki buḷoi monimu mita mobaḻídon dongka boba-bobay, bo ki adí monimu in mobaḻídon diá ko amá.

YESAYA 13:18

Takin puḷu bo piotnea mosia in moḻimod kon intau mita inta nongoguodpa. Mosia in diábí motabi kon adí mita mointok bo diábí motabi kon mongoadí.

YESAYA 9:16

Bangusa tatua ain nonaḷámai kon Tuhan bo moromúdon bo bayongan in tosingogon monia moraat. Tuamai in kon sigad in tayow mobiag mita diá tobatúmai in sinaḻiban i Tuhan. Sia in diábí notabi kon boba-bobay mita bo uno-unon. Táe ki Tuhan in sinumorúpabí bo umuran mohukum.

YESAYA 9:17

Kororaat in bangusa tatua in nonurub naonda bo tuḷú inta noḷeḷep kon dogami. Dokotnea in naonda bo kayuon noturub inta nopodamonik in poyok mobarong.

YEREMIA 12:3

Táe Iko, o Tuhan, nonotaau kon inakó. Iko in nokoontong kon onu in inaidanku, bo kinotaauan-Mu naonda in porasaan in ginaku kon ini-Mu. Diadon in intau mita moraat tatua ḷumuai, diádon in mosia naonda bo domba mayá in pororataan. Ḷukadai in mosia modapot in porataan kon i monia.

YEREMIA 14:16

Intau mita inta ain notarima kon toḻindap mita monia tua in ḻimodonbí doman natua. Mayat mita monia in pogambat kon daḷan mita kon Yerusalem bo diábí in moḷobong. Natuata in ukur monia takin adí bo buḷoi monia. Baḻíon-Kubí in mosia mokonanam kon bungai in aid moraat monia.”

YEREMIA 15:7

Kon batúan in kotá kon butá tanaa moiko in ḷumbúon-Ku naonda bo wawa. Umpakabí moiko in umat-Ku táe yopúon-Kubí in moiko takin ki adímu mita popisí in moiko doí momaḷui kon gogutúmu.

YEREMIA 15:8

Butámu in mopuḻing in boba-bobay, moiḻiu kon kobayong in bungaion kon pintad. Intau mita in ḻimodon-Ku kon dodai in moguodpa dá ki iná monia in mororiga. Kon dodai in singgai poangoi-Ku kon i monia in moḷoḻimod tobatú dá angoian in ondok in mosia bo moḻia-ḻiaw in gina.

YEREMIA 50:30

Kon singgai tua intaunea mita tayowmobiag in matoibí mita kon daḷan mita in kotánea, bo bayongan in tontaranea rimumudon. Akuoi, ki Tuhan, ain nosingog.

YEREMIA 9:21

Popatoi in sinumuotdon nongin jandela, sinumuotdon kon bonu in komaḻig; sia in nodomok kon mongoadí mita kon daḷan bo tayow mobiag kon rawang.

OMBAḶ 1:15

Inanggap i Tuhan diá in mangaḻe in bayongan in intauku inta mongotorindog. Inampoi-Nea in bayongan tontara sinbá bayongan in intau tayowmobiagku in moyopú. Iritakan-Nea in bangusaku nodapot in norimumud, ná intau inta nomugut kon bungai in anggur.

OMBAḶ 5:3

Ki amá nami in iḻimodon in musung; tanaa in ki iná nami in dongkadon boba-bobay, bo kami in uno-unon.

YEHEZKIEL 16:38

Hukumon-Kubí in iko popisí in pinonuaḻingan bo pinoḻimodan inta ain inaidanmu tua. Kon bonu in rogi bo torú-Ku hukumon-Ku matoi in iko.

YEHEZKIEL 22:25

Itoinea mita naonda bo singa inta moganggor naonda in modomok mako kon kokaanonnea. Mosia in moḻimod kon rayat, mogagow kon bayongan in kapunyaan bo kaoyúonan inta nouḻí monia bo nokopopisí kon nobayong in nobaḻí dongka bobay-bobay.

AMOS 4:10

Akuoi in mopotabá mangoi in yampoi in takit kon inimu naonda bo inta pinoangoi-Ku kon Mesir. Intau mita inta nongoguodpa in yopúon-Ku kon poparangan, bo kabaḷomu mita in agowon. Akuoi in momonu kon ḷoḷaiganmu in mayat mita inta bónea in mokonakit kon ngiung. Umpaka natua, moiko in doí doman mobui mangoi kon i-Nakó.

ULANGAN 32:25

Parang in modia kon kopopatoi kon daḷan mita; mokoondok in moiuma kon intau mita kon baḷoi. Tayow mobiag bo mongodeaga mita batánea in tokoyopúon, bo adí doman mointok bo intau inta nogoguyangdon.

TIMOTIUS 2 4:14

Ki Aleksander inta mononontaḷ kon tambaga tua, nomiadon kon inta totok in diá mopia kon inakó. Tongá tuḻíanbí i Tuhan in oaidnea tatua podudui doman in oaidnea.

SAMUEL 1 15:33

Táe ki Samuel noguman, “Ná doman onda bo pitowmu inta nokopopisí kon nobayong in guyanga bobay kinobuḻian in adí monia, yo natua doman in ki inámu kobuḻian i adínea.” Bo ki Samuel nonibat kon i Agag nodapot in minatoi kon tayowon in mezbah kon Gilgal.