YEREMIA 17:22 - Alkitab Singog In Mongondow Masa In Tanaa

²² Dika mogaid andeka modia kon pakakat onuka in ḷumuai kon baḷoimu kon singgai in Sabat. Potondídon in singgai tatua kon i-Nakó ná inta ain pinarenta-Ku kon mogoguyangmu.

YEREMIA 17:22 Mawu Ofanana

NEHEMIA 13:15

Kon tungkuḷ intua inontongku in kon singgai in Sabat tongonumai in intau Yohuda nomugut kon anggur. Oyúon in intau ibanea in nodatog kon gandum, anggur, bungai in anggur, bungai in ara bo pakakat mita ibanea kon tudu in keledainea bo dinia pinobayá in Yerusalem. Diá inogoiku in mosia nopotaḷui kon Yerusalem.

IḶUAIAN 23:12

Kon todiminggu, onom nosinggai motaau pakéon monimu mogaid, táe kon singgai noginpitu musti in moiko mogogai, sinbá bobiagonmu, atamu mita bo intau mita ango-angoi inta nogaid kon i monimu mogogaipa doman.

YESAYA 58:13

Ki Tuhan in noguman, “Horomatbí in singgai in Sabat saḷaku singgai kon i Tuhan. Dika mogaid kon kopontinganmu tontaní kon singgai tatua. Ramedon in singgai tatua nobaḻí singgai mokosanang kon gina; horomatbí in singgai i Tuhan takin diá maya-mayá mako; dika doman mogaid andeka mosingog kon diá in mangaḻenea.

YEREMIA 17:24

Duduiai in bayongan parenta-Ku. Dika mogakut kon pakakat onuka mongin bonawang in kotá tanaa kon singgai in Sabat. Potondídon, Singgai in Sabat kon i-Nakó, bo dikadon mogaid kon onuka kon singgai tatua.

YEHEZKIEL 20:12

Pinotabá-Ku in mosia mohoromat kon singgai in Sabat nobaḻí tomponuot kon dodandian-Ku takin i monia, sin moponorop kon i monia kon Akuoi ki Tuhan, ain nopotondí kon i monia mobaḻí kapunyaan-Ku.

YEHEZKIEL 22:8

Tampat mita pooibadaan kon i-Nakó sinamakanmudon bo singgai in Sabat diádon inindoionmumai.

IMAMAT 19:3

Bayongan intau musti mohoromat kon i amá bo kon i inánea bo mohoromat kon singgai in Sabat ná inta pinarenta-Ku. Akuoi in ki Tuhan Allahmu.

IMAMAT 23:3

Onom nosinggai in wakutu pogaidan, singgai in Sabat, in singgai pogogaian inta sinantúdon kon i Tuhan. Kon singgai tatua moiko musti momia kon poyodungkuḷan sin poibadaan bo diábí in motaau mogaid.

ZAKHARIA 1:4

Dikadon ná mogoguyangmu. Dungkuḷmai nabi mita nopotaau in koyow-Ku kon i monia sinbá mosia in dikadon bui mogaid kon inta moraat bo dosa. Táe diá in mosia nopandungmai bo doí tumoindudui kon i-Nakó.

LUKAS 23:56

Onda intua, nobui in mosia bo nosadia kon toyokayu mita inta biasamai pakéon pomondu kon mayat. Mosia in nosadia doman kon ḷana mobondu sin poḷana kon mayat i Yesus. Kon singgai in Sabat mosia in nogogai nogaid podudui in hukum agama.

LUKAS 6:5

Ki Yesus in noguman doman, “Adí Intau nongawasa kon singgai in Sabat!”

WAHYU 1:10

Kon Singgai i Tuhan, akuoi in kinawasaan in Roho i Allah, bodongka nokodongog in akuoi kon singog moropot – naonda bo singog in torompet – nosingog kon tumikumai.