YEREMIA 13:21 - Alkitab Singog In Mongondow Masa In Tanaa

²¹ Onu in singogon monimu aka intau mita inta binaḻí monimu yobayatmu mita nonaḷow bo mongawasa kon i monimu? Notantúbí kon korasaan monimu in monakit naonda bo bobay inta koyogot mononggadí.

YEREMIA 13:21 Mawu Ofanana

DATU MITA 2 16:7

Ki Ahas in nopotabá in totabá minayá kon i Tiglat-Pileser datu in Asyur takin koyow tanaa, “Akuoi in bobantungmu inta mosatia, tuamai, poigumonku angoidon bo posaḻamatdon in akuoi nongkon i datu in Siria bo datu in Israel inta koyogot in monubu kon inakó.”

YESAYA 10:3

Onu in pomiaan monimu kon singgai ki Allah mohukum kon i monimu? Onu in aidanmu kon dodai in Sia mopoangoi in anib nongkon ḻipú inta moyayú? Ki ine in pokituḷungan monimu? Kon onda in pobunian monimu kon kaoyúonanmu tatua?

YESAYA 13:8

Mosia komintan koaputan in ondok inta motoyang, bo momaḻikotad sin monakit naonda bo bobay inta koyogot in mononggadí. Mosia in mosiindoian takin ḻia-ḻiaw in gina, pogotnea in mosimpuya popisí in mooyá.

YESAYA 21:3

Oontongon tatua nokotoboḻingo kon inakó nodapot in diá in nokoontong andeka mokodongogpa. Akuoi in inagían in ondok bo nakit, naonda bo bobay tobatú inta koyogot in mononggadí.

YEREMIA 2:25

Israel, dikabí in iko moribatuk in mogaḷow kon dewa mita, bo dikabí momaḷú in mogoiní kon i monia, sinbá diá tompaḻían in sioḷmu bo moingkag in sigogowmu popisí in morogang. ‘Diá, akuoi in diá bidon mobui,’ gumanmu, ‘sin akuoi in moibog kon dewa mita, bo moibog dumudui kon i monia.’ ”

YEREMIA 22:23

Moiko in mogutun moaman iḻibu in oigi mita in kayu ḷokuyú in Libanon, táe kon singgai moiduduimai aka moiko kotugatan in inta mokonakit, moiko in mororigabí naonda bo bobay inta koyogot in mononggadí.”

YEREMIA 30:6

Tungkuḷaika rai bo taridi! Degá ḷoḷaki mopononggadí in adí? Aka natua, nongonu sin inontong-Ku in bayongan in ḷoḷaki nongo bilaibí bo motonoi kon siannea naonda bo bobay inta mononggadídon?

YEREMIA 38:22

Kon bonu in oontongon tatua akuoi in nokoontong kon bayongan in bobay inta kon komaḻigpa in Yohuda pinoḷuai dinia kon pojabat mita in Babel. Kobaya-bayá mosingog in mosia, ‘Ki datu in pinomiadon ibo-ibog in yobayatnea mita inta modagin, bo kinawasa monia. Tanaa, naonda in sioḷnea noiḷosok kon bonu in yoná, inumundok komintan in mosia.’ ”

YEREMIA 4:30

Ei Yerusalem, iko in sinaḷáandon bo diádon mokopongonu! Onubí in mangaḻenea in mogiḷambung in ḷambung nopura bo moḷambá kon awak mopomaké in buḷawan bo saḷaka, poḷat moponggares in cilá kon mata? Diábí in mangaḻenea in iko in mopogaga in pogotmu, sin intau mita inta kinotabimu in doí bidon kon inimu, nodapotbí in mosia in moibogbí morabut kon nyawamu.

YEREMIA 4:31

Akuoi in nokodongog kon ombaḷ mopoina-inak naonda bo bobay inta mononggadí; naonda bo bobay moguod inta monononggadí ḻinggané, natua in ombaḷ in Yerusalem inta mosisí in pogoginanea. Ḻimanea in mongokap bo mogamui in sia, “Moboditodon in akuoi – akuoi in ḻimodon in musung!”

YEREMIA 48:41

Kotá mita bo bentengnea mita in agowon bo tontaranea in angoiandon in ondok naonda bo bobay inta mononggadídon.

YEREMIA 5:31

nabi mita in monguboḷ, imang mita mogundoi podudui in ibognea tontaní bo moiko umat-Ku in moibog doman kon natua. Táe onu in aidan monimu aka moiangoidon in singgai imbuitnea?”

YEREMIA 6:24

Nokodongog kon habar tatua, intau mita in Yerusalem kinodaitandon in daya. Mosia in inangoian in ondok, bo nororiga naonda bo bobay inta mononggadí.

YEHEZKIEL 28:9

Yo, aka moiangoidon in wakutunea tatua, mokopogumanpa degá in iko kon iko in ki Allah? Kon tayowon in moḷoḻimodmu mita, moniatadon kon iko in tongábí intau ilo-ilow.

MATIUS 24:8

Tongá tua komintan in bagubí pomangkoian in roriga kon wakutu in diápa modapot in zaman inta mobagu.

TESALONIKA 1 5:3

Aka intau bo moguman nanaa: “Komintanpabí noaman, diábí in onu bo onu,” dá kon dodai doman tuata kotubuan in onu inta mokoputú kon i monia bo diá tobatúmai in mokoḷagui in mosia. Tua mita in daḻíbí moiangoi naonda bo nakit in mononggadí inta moiuma bobay tobatú inta mononggadí.