YEREMIA 12:6 - Alkitab Singog In Mongondow Masa In Tanaa

⁶ Iko in pinomaḻidawandon noidapot in ki utatmu tontaní; mosia in dinumudui doman nonubu kon inimu. Dikabí mopirisaya kon i monia, umpaka mopia in singog monia.”

YEREMIA 12:6 Mawu Ofanana

AYUB 6:15

Táe moiko, ei yobayat mita, diá motaau pirisayaan bo pongata. Moiko in naonda bo ongkag inta noingkag, aka diádon monguya-nguyan.

MAZMUR 12:2

Tuḷungaipa kaasí in kami, o Tuhan, sin diádon in intau mopia, intau inta mosatia kon ini-Mu ain noyopú.

MAZMUR 12:3

Mosia komintan mosiuboḷandon, mosiakaḷan pongin tosingogon inta mopia in kodongogan.

MAZMUR 69:8

Sin popisíbí in Iko dá siningkuḻe in akuoi, popisí in Iko akuoi in irebeg.

AMSAL 23:8

Sin dikabo onu inta ain iḻiommu buimu pototuka, bo bayongan in tosingogonmu inta mopia in diá in mangaḻenea.

AMSAL 26:25

Umpaka mobahasa mako in sia, yo dikabí pirisayaan; sin yaatnea ain nongawasa kon ginanea.

YESAYA 31:4

Ki Tuhan in noguman kon inakó, “Naonda bo singa moganggor sin moḷukad kon onu inta noaḷapnea bo diábí motaau gogondokon in karak bo guak in gombala topaanan inta pinotabá moḷawang kon inia, natua doman in Akuoi in moparangbí bo moḷukad kon Buḷud in Sion.

YEREMIA 11:19

Akuoi in naonda bo domba inta diábí in curiga dinia kon tampat pororataan. Diábí kinotaauanku kon akuoibí inta nobaḻí makusud in tomayá mita moraat monia. Mosia in noguman, “Igai pupuḷon naton in pangkoi in kayu tanaa kon dodai in sia in momungaipa; yopúon naton in sia sinbá tangoinea in ḻiongondon in intau.”

YEREMIA 11:21

Intau mita in kotá in Anatot moibog sinbá matoi in akuoi. Mosia in noguman, “Aka iko umuran mopotaau in koyow mita i Tuhan kon inami, iko in ḻimodonbí nami.”

YEREMIA 20:10

Kodongogan in intau moyogombong kon bayongan in tampat, “Ondok in mongawasa! Igai pongaduon in sia kon i inta nongawasa!” Nodapotbí in bayongan in topotakinku modagin mogoḷat mako kon koḷabúanku. Guman monia, “Degá pongin dondouḷug, kotaḷowan in sia, sinbá motaaudon in kita motuḻí kon yaat in gina kon inia.”

YEREMIA 9:2

Aka kuma bo kon padang gurun bo kouḻíanku kon tampat pogogaian in intau inta kon binayáan! Dá taḷaankubí in bangusaku, bo moḷagui mayá intua sin yumayú kon i monia. Mosia in momomaḻidaw komintan pinosipunan in intau inta diá mosatia,

YEREMIA 9:3

bo umuran mosadia monguboḷ. Kon sinangkub in butá, inta mobanar diádon nongawasa, nodapot in aid diá mojujur noibaya-bayádon mako. Ki Tuhan in noguman, “Umat-Ku in nogaidon kon inta moraat diádon mogoga-gogai, diádon ináku monia in Akuoi nobaḻí Allah monia.”

YEREMIA 9:4

Umpaka kon yobayat, yo kon batúan in intau musti mokopoingat bo utat inoyod yo diá doman motaau pirisayaan. Sin, ná ki Yakub yo natua doman in mosia, kon batúannea monguboḷ kon i utatnea. Batúan in intau maya-mayá mako sin moponapud in diá totuu bo uboḷ.

YEREMIA 9:5

Mosia komintan mosi uboḷan, diá in mosingog kon inta totuu. Bibignea in nobiasadon monguboḷ mosia in diá mokosanggup in monaḷámai kon dosanea. Aid inta moraat kodugang-kodugang aid uboḷ kodugang-kodugang doman tua in umuran aidan monia, mosia in totokbí in mondoí kon i Tuhan.

MATIUS 10:21

Bo nanaa in mobaḻí: Intau mita moposarakan kon i utatnea sin pokiḻimod. Aid natua in pomiaan doman in guyanga kon i adínea. Bo adí in monayowdon kon i iná bo i amánea, bo posarakannea sin ḻimodon.

MARKUS 12:12

Dá itoi mita Yahudi inta nokodongog kon poumpamaan tatua, moḷongasidon totok modomok kon i Yesus, sin kinotaauan monia kon poumpamaan tatua pinopomakusudbí i Yesus kon i monia. Táe moondok in mosia kon intau moantó. Dá sinaḷáanmai monia in ki Yesus.

YOHANES 7:5

Sin ki utat-Neapa mita tontaní in diápabí doman mopirisaya kon i-Nia.)

OUMAN IN RASUL MITA 16:22

Intau moantó kon tua in sinumakin doman moponapud in uboḷ kon i nayadua tua. Dá pomarenta mita tatua in nomera-merak kon ḷambung nayadua poḷat pinoki sambok kon intau mita kon tua.

OUMAN IN RASUL MITA 18:12

Naonda in ki Galio nobaḻí gubernur kon Akhaya, intau mita in Yahudi, notobatú kon gina bo nomayow kon i Paulus poḷat dinia monia pinobayá in pongadilan.