YEHEZKIEL 46:16 - Alkitab Singog In Mongondow Masa In Tanaa

¹⁶ Ki Tuhan Inta Totok in moḷantud nomarenta, kai-Nia, “Aka mongongawasa inta nomarenta mobogoi in tongosilai nongkon butá budelnea kon i adínea ḷoḷaki tobatú, yo butá tatua in mobaḻíbí ki adínea in kitogi bo nobaḻí kapunyaan in motoḷuadí.

YEHEZKIEL 46:16 Mawu Ofanana

TAWARIKH 2 21:3

Mosia in nokouḻí kon nobayong in buḷawan, saḷaka bo pakakat mita ibanea nongkon i amá monia, bo kon batúannea inogoian doman in kotá tobatú inta dinding kon Yohuda. Táe popisí in ki Yehoram adí ḷoḷaki inta guya-guyang, dá siadon in sinantú i Yosapat nobaḻí datu.

MAZMUR 37:18

Ki Tuhan in noḷukad kon kobiagan in intau motoḷutui, kapunyaan budel monia in umuranbí mononoi.

YEHEZKIEL 45:7

Bo kon mongongawasa inta momarenta in musti doman posadiaan kon butá. Butá tatua in noibontang nongkon sigad kon toyopan in butá inta ain sinantú kon i Tuhan tatua, nodapot kon Dagat Toyuak, bo nongkon sigad kon dotá in pomukaan nongkon butá inta ain sinantú tatua, nodapot in pinosigadan kon dotá in pomukaan kon butá tatua. Dá kobanatnea in notongkai in kobanat in tongosilai in butá inta inogoi kon suku mita in Israel.

MATIUS 25:34

Bo Datu tatua in moguman kon i monia inta kon dotá in koḷanan-Nea, ‘Igai, in moiko inta binarakatan i Amá-Ku, tuotdon kon dodatuan inta aindon sinadia kon i monimu kon wakutupa in dunia naa bagupa binaḻí.

LUKAS 10:42

Bá poguman-Ku kon inimu kon tongábí tobatú in totok moponting. Ki Maria ain nomiḻí kon inta mopia, inta diábí bui gamáan kon inia.”

GALATIA 4:7

Bo moiko in deeman bidon ata, táe nobaḻí bidon adí, dá ki Allah in mobogoibí kon i monimu in bayongan yagi-yagi inta ain sinadia-Nea kon i adí-Nea mita.