YEHEZKIEL 46:12 - Alkitab Singog In Mongondow Masa In Tanaa

¹² Aka pongawasa moibog mobogoi in sosumba ibog in ginanea tontaní kon i Tuhan, pinomayá kuruban payongon andeka kuruban pondamean, dá bonawang dotá in pomukaan inta mopobayá in palas dotá in bonunea in mustibí bukatan sin tuotannea. Sia in mustibí moposumba in kuruban tatua ná inta pinogogaidnea kon singgai in Sabat, táe naonda in sia mobui, bonawang tatua in mustibí ḷagi ḻingkopan bui.”

YEHEZKIEL 46:12 Mawu Ofanana

DATU MITA IMITÁNEA 3:4

Tampat pooibadaan inta totok in ponango-nangoian in kon Gibeon. Mokakit in ki Salomo moposumba in kuruban kon tua. Kon singgai tobatú, ná biasamai, minayá in sia bui intua.

TAWARIKH 1 29:21

Kon singgai noiduduimai mosia in noratá kon bobiagon sin posumba mobaḻí kuruban kon i Tuhan, bo sinilai kon bayongan in rayat. Koḻikud intua 1.000 in sapi koḷakian, 1.000 in domba koḷakian bo 1.000 in domba batánea inta iratá bo sinubá sibatu kon tudu in mezbah. Mosia in noposumba doman in anggur inta ain sinantú kon kuruban mita tatua.

TAWARIKH 2 29:31

Nopaḷut mako kon tua ki Hizkia in noguman, “Popisí in moiko tanaa aindon sinondí kon i Tuhan, dá nobaḻí sosumba sukurmu, moiko in mustibí modia kon kuruban kon Baḷoi Tuhan.” Bo bayongan in intau inta kon tua in nodia kon sosumba mita tatua, nodapot in oyúon doman inta takinbí ibog monia tontaní nodia kon biag mita sin posumba mobaḻí kuruban payongon.

TAWARIKH 2 5:6

Ki Datu Salomo bo bayongan in rayat in Israel noyosipun kon tayowon in Poti Dodandian tatua bo noposumba kon i Tuhan in domba bo sapi inta diádon koiapan in kobayongnea.

EZRA 1:4

Aka oyúon in umat-Nea tobatú kon pinoḷumbúan tanaa in moparaḷu kon totuḷung sinbá mokopobuipa, dá topodiugnea mita in mustibí mobogoi in totuḷung tatua. Mosia in mustibí mobogoi in saḷaka bo buḷawan, tongkaaḷ kon daḷan takin doman biag pododatogan, bo sosumba doman inta pakéon kon Baḷoi Tuhan kon Yerusalem.”

EZRA 3:5

Koḻikud intua takin notompia mosia in moposumba in kuruban payongon bo kuruban kon Singgai Moḷoben Buḷan Mobagu, bo kon bayongan in Singgai moḷoben ibanea inta inaidan sin mosumba kon i Tuhan. Mosia in moposumba doman in sosumba ibog tontaní kon i Tuhan.

EZRA 6:17

Kon pinonoguḷapatan tatua mosia in noposumba kon i Tuhan in sapi koḷakian 100, domba koḷakian 200 bo ki adí in domba 400. Bo inta pinaké kon kuruban pinongampungan kon dosa, pinosumba in mopuḷú bo doyowa in bembé koḷakian, bembé tobatú in kon batúan in suku Israel.

YEHEZKIEL 44:1

Onda intua ḷoḷaki tatua in nokapit kon inakó bui minayá in bonawang kon ḷuai kon dotá in pomukaan nongkon Baḷoi Tuhan. Bonawang tatua in noiḻingkop,

YEHEZKIEL 44:3

Táe mongongawasa inta nomarenta in motaaubí mayá in bonawang tatua sin mokaan kon kaanon motusi kon tayowon-Ku. Sia in mustibí tumuot mongin yuang moḷoben bo mobui mongin tua doman.”

YEHEZKIEL 45:17

Siabí inta musti motaḷui kon bobiagon inta pakéon kon kuruban payongon bo bahan mita inta mobaḻí kuruban gandum bo kuruban anggur kon bayongan in bangusa in Israel kon singgai mita moḷoben, Singgai moḷoben Buḷan Mobagu, singgai mita in Sabat bo singgai mita moḷoben ibanea. Sia in mustibí moposadia in kuruban potobut kon dosa, kuruban gandum, kuruban payongon, bo kuruban podamean sin mopoigum in ampung kon bangusa in Israel.”

YEHEZKIEL 46:8

Aka mongongawasa mayá moibada kon Baḷoi-Ku, musti in sia tumuot mongin yuang moḷoben, bo aka mobui mongin daḷan doman tatua.

IMAMAT 1:3

Aka inta pinosumbanea tua bo sapi tobatú, dá biag tatua in musti koḷakian bo inta mopia totok. Sapi tatua musti diaannea pobayá in ngara in Ḷoḷaigan i Tuhan, sinbá koibog i Tuhan in intau tatua.

IMAMAT 23:38

Poramean mita tatua nobaḻí dugang kon singgai mita in Sabat biasa, dá sosumba mita tatua in nobaḻí doman dugang kon onu inta inogoimu inta biasamai, kon kurubanmu sin motobut kon onu inta ain dinandimu, ande kuruban monginibog inta inogoi monimu kon i Tuhan.

IMAMAT 7:16

Aka intau tobatú modia kon kuruban dodamean sin mogintompod kon dandinea, ande kuruban inta nomuká nongkon ginanea tontaní, diá bidon musti kodaiton kaanon kon singgai doman tatua. Ibanea in motaaubí kaanon mobangon monik.

PINOGIAPAN 29:39

Tuata in atorang mita kon kuruban payongon, kuruban oḷudon, kuruban tubig in anggur, bo kuruban pondamean inta musti posumba monimu kon i Tuhan kon porayaanmu mita inta ain sinantú. Kuruban mita tatua in nobaḻí indugang kon kuruban mita inta posumba monimu sin moguboḻi kon dandi andeka kuruban ibog tontaní.

SURAT I PAULUS KON JAMAAT RUM 12:1

Utat mita! Ki Allah totok in mopia kon i naton. Manangka intua akuoi in mopoigum totok sinbá moiko moposumba in awakmu saḷaku sosumba inta nobiag sin kopontingan i Allah. Sosumba tatua in tongábí ogoi kon i Allah bo inta mokosanang kon gina-Nea. Tuabí in ibadamu inta sabanarnea.

EPESUS 5:2

Kobiagbí takin oyúon tabi, ná ki Kristus motabi kon i naton. Sia in nopokuruban in kobiagan-Nea kon i naton bo nobaḻí tobatú sosumba inta totok in mobondu bo inta mokosanang kon gina i Allah.