YEHEZKIEL 36:2 - Alkitab Singog In Mongondow Masa In Tanaa

^2-6 ‘Kon tungkuḷ in bangusa mita kon diugmai nonubu poḷat nogagow kon i monimu, mosia in noningkuḻedon kon sinangkub in Israel. Takin pia in gina mosia in noguman kon tanaa in tombuḷud dungkuḷmai tatua nobaḻí kapunyaan monia. Tuamai, ei buḷud mita bo tombuḷud mita, tapá mita bo ḷopá, ei kotá inta ain nobaḻí apug bo inta sinaḷáandon in mogogutunnea poḷat doman pinogagowan bo siningkuḻe in bangusa mita kon diugneamai, indongogaidon onu in pinoguman i Tuhan Inta Totok in moḷantud kon inimu: Kon dodai in sinumagab in torú-Ku, sinorúan-Ku in bangusa mita inta kon diugmumai ḷontúnea kon tua in Edom, popisí in takin pia in gina bo takin doman aid moningkuḻe, ain nogagow kon butá-Ku bo nogagow kon rawang mita in bonoknea. Tanaa in tumorú in Akuoi popisí in bangusa mita tatua in noningkuḻedon totok bo nopoompámaidon kon i monimu.

YEHEZKIEL 36:2 Mawu Ofanana

MAZMUR 78:69

Sia in noposindog in Baḷoi-Nea naonda bo pinogutunan-Nea kon soroga, bo naonda bo butá, noroton nodapot in mononoi.

MAZMUR 83:13

popisí in mosia in nogumandon, “Igai ḻitúandon naton in butá pinogutunan i Allah.”

YESAYA 58:14

Dá, mopiabí in gina monimu sin mogundoi kon i-Nakó. Baḻíon-Ku in moiko horomaton kon sinangkub in dunia. Moiko in mobiagbí mosanang takin bungai in butá tonsilai i Yakub, mogoguyangmu. Akuoi, ki Tuhan ain nosingog.”

YEREMIA 49:1

Naa inta pinoguman i Tuhan soaḷ Amon, “Nongonu sin butá in suku Gad in inagowbí bo iḻitúan in intau mita inta nosumba kon i Dewa Milkom? Eta degá diádon in intau in Israel inta mokoḷukad kon butá tatua?

YEHEZKIEL 25:3

Potabádon in bangusa tatua mokidongog kon onu inta poguman-Ku, ki Tuhan Inta Totok in moḷantud kon i monia, ‘Mopia in gina monimu in mokoontong kon Baḷoi-Ku in kotoron bo butá in Israel in poguyaaton bo bangusa in Yahudi in akuton kon poḷumbúan.

YEHEZKIEL 26:2

“Ei intau inta ilo-ilow, intau in Tirus ain nonggoḷokap poḷat moguman, ‘Yerusalem in norimumudon! Ropotnea kon podagangan noinggamádon! Diádon in sia nobaḻí saingan naton!’ ”

YEHEZKIEL 35:10

Moiko in noguman kon pinomayá Yohuda andeka Israel bo butánea-butánea in hakmubí, bo mouḻíbí monimu umpakabí Akuoi, ki Tuhan, in ki Allah monia.

YEHEZKIEL 35:12

Dá kotaauandon monimu kon Akuoi, ki Tuhan, ain nokidongog kon singkuḻemu kon tungkuḷ in moiko noguman: Buḷud mita in Israel noingongowdon bo inogoidon nobaḻí kokaanon naton.

YEHEZKIEL 36:1

Ki Tuhan in noguman, “Ei intau ilo-ilow, posingogdon kon buḷud mita in Israel bo pokiindongogaidon in mosia mokidongog kon tosingogon i Tuhan Inta Totok in moḷantud,

OBAJA 1:13

Diábí motaau in iko tumuot kon kotá in umat-Ku, bo monggoḷokap kon intau mita inta kinoantugan in roriga, apapa doman mogagow kon kapunyaannea kon singgai nahat tatua!

HABAKUK 3:19

Iko in nobogoi in ropot kon inakó naonda bo sioḷ in rusa, sioḷku in iniyotonan-Mu. Kinapit-Mu in akuoi sinbá moodom kon dodai in minayá kon buḷud.

ULANGAN 32:13

Binaḻí-Nea in mosia nongawasa kon buḷud mita; mosia in nokaan kon bungai in boyó kon gobá mita monia bo nonginum kon biluk in kayuon kon buḷud batu. Mosia nokouḻí kon ḷana nongkon pangkoi in zaitun inta nobiag kon butá inta nopuḻing in batu.