YEHEZKIEL 34:13 - Alkitab Singog In Mongondow Masa In Tanaa

¹³ Poḷuaion-Kudon in mosia nongkon yua-yuak in bangusa mita bo nongkon butá mita in intau, bo sipunon-Ku pobayá in butánea tontaní. Mosia in ḷukadan-Ku bo pokaanon kon buḷud mita bo kon ḷopá mita in Israel bo diaan-Ku in mosia kon rawang mita in bonok inta moodom.

YEHEZKIEL 34:13 Mawu Ofanana

MAZMUR 106:47

Posaḷamatpa kaasí in kami, o Tuhan Allah nami, sipunpa in kami nongkon sigad in bangusa mita, sinbá kami motaaudon mopoyaput in sukur bo modayow kon tangoi-Mu inta motusi.

MAZMUR 37:3

Popirisayadon kon i Tuhan, bo aidaidon in inta mopia, pogutundon kon butá tatua bo kotoḷutuidon.

YESAYA 30:25

Kon singgai benteng mita in musungmu kinopung bo intaunea mita iḻimod, batúan in buḷud bo tombuḷudnea mopoḷuaidon in tapá mita.

YESAYA 49:9

Intau inta pinonjara pinoki poḷuaian-Ku; inta kon tampat mosindip diaan-Ku mayá in mobayag. Nodapot in inta kon tombuḷud inta noḷogat mosia in diábí kodaitan, kon kinoouput in daḷan oyúonbí in kaanon.

YEREMIA 23:8

táe podoyon kon i-Nakó, Allah inta nobiag, inta nodia kon umat in Israel iḻumuai nongkon butá tobatú kon dotá in utuan, bo nongkon bayongan in butá ibanea kon tampat inta ain pinoporaritan-Ku. Mosia in mogutundon kon butánea tontaní.”

YEREMIA 30:18

Ki Tuhan in noguman doman bui: “Moiko, umat-Ku in totabion-Kubí bo poguḻiton-Ku bui in kaadaanmu kon butámu tontaní Yerusalem in posindogonbí bui, bo komaḻignea in tompiaan.

YEREMIA 30:3

Sin moiangoibí in wakutunea Akuoi mopoguḻit bui in kaadaan in umat-Ku Israel bo Yohuda. Diaan-Kubí bui in mosia mayá in butá inta ain inogoi-Ku kon mogoguyang monia. Butá tatua in buibí mouḻí monia. Akuoi, ki Tuhan, ain nosingog.”

YEREMIA 31:8

Nongkon utuan dinia-Ku in mosia nobui; sinipun-Ku in mosia nongkon popod mita in butá. Intau bilog bo intau ḻempeng in moyotakinbí monia, bobay doman inta bagu nononggadí bo bobay inta dongkadon mogoḷat kon wakutu mononggadí. Mosia komintan in mamangoi mobayongbí totok in mamangoi in butá tanaa.

YEREMIA 32:37

Akuoi in mosipunbí kon bangusa tanaa nongkon bayongan butá tampat pinoporaritan-Ku kon i monia popisí in torú-Ku bo rogi-Ku kon i monia. Mosia in diaan-Kubí bui kon tampat tanaa bo ogoi-Kudon mogutun kon naa takin moaman.

YEREMIA 33:12

Ki Tuhan Inta Totok in mokawasa in noguman, “Butá bo kotánea mita inta ná padang gurun tanaa diá inutunan in intau andeka mahaḷuk. Táe umpaka natua, kon singgai moiduduimai oyúonbí in rawang mita in bonok tampat popokaanan in intau kon dombanea mita.

YEREMIA 50:19

Popobui-Kubí in intau in Israel mayá in butá monia. Mosia in mokaanbí kon bungai in pinomuḷa kon Buḷud in Karmel bo butá in Basan. Mosia in botuganbí in bungai in pinomuḷa kon butá in Epraim bo Gilead.

YEHEZKIEL 11:17

Akuoi, ki Tuhan Inta Totok in moḷantud, nogumandon kon sipunon-Kubí in mosia nongkon butá mita kon tampat inta kinoraritan monia, bo mopobui in butá in Israel kon i monia.

YEHEZKIEL 20:41

Naonda in moiko diaan-Ku ḷumuai nongkon butá mita inta pinoporaritan kon i monimu, sipunon-Ku in moiko bo motarima kon bayongan in kuruban payongonmu. Dá kotaauandon in bayongan in bangusa kon Akuoi naa in ki Allah inta Totok in mokudus.

YEHEZKIEL 20:42

Aka moiko bo diaan-Kudon mobui kon butá in Israel, butá inta pinodandi-Ku kon mogoguyangmu, yo kotaauandon monimu kon Akuoibí in ki Tuhan.

YEHEZKIEL 36:12

Umat-Ku Israel, in diaan-Kubí mobui bo mogutun kon butánea bui. Butá tatua in mobaḻídon kapunyaan monia tontaní bo umuran mobogoi in bungainea dá ki adí mita monia in diádon matoi bui in gogoy.’

YEHEZKIEL 36:24

Nongkon batúan in bangusa bo butá, moiko in sipunon-Kubí bo popobui-Ku kon butá monimu tontaní.

YEHEZKIEL 36:29

Moiko in poḷuaton-Kudon nongkon bayongan in inta mokokotor kon inimu. Parentaan-Kubí in gandum sinbá mobiag motoḷubú modapot in moiko in diádon kon dodai in onda in koantugan in gogoy.

YEHEZKIEL 36:30

Dugangan-Kubí in kotoḷubú in pangkoi mita in ayopmu bo bungai mita in pinomuḷa kon gobámu, dá moiko in diádon kon dodai in onda moiyitak kon malarat in kaanon inta mokoraat kon tangoimu kon sigad in bangusa mita.

YEHEZKIEL 38:8

Tongonupamai notaong sia in parentaan-Kudon monubu kon butá tobatú takin intaunea inta ain sinipun nongkon sigad in nobayong in bangusa bo inta kon singgai noiduduimai mogutun kon butá tatua takin moodom. Ki Gog in mongawasabí kon buḷud mita in Israel inta noonggotdon in noingongow bo nopuḻingdon in apug mita, táe tanaa inutunandon in rayat mita inta nobiagdon noodom.

YEHEZKIEL 39:25

Ki Tuhan Inta Totok in moḷantud in noguman, “Táe tanaa Akuoi in motabi bidon kon umat-Ku Israel buí i Yakub, bo baḻíon-Ku bui in mosia mobiag motompia. Tua in aidan-Ku sinbá tangoi-Ku umuran horomaton.

YEHEZKIEL 39:27

Akuoi in buibí modia kon i monia mobui nongkon butá mita in musung monia, bo kototusi-Ku in koontongandon kon bayongan in bangusa popisí in aid-Ku tatua.

AMOS 9:14

Baḻíon-Kubí in umat-Ku Israel mobiag motomoman bui. Mosia in buibí moposindog in kotá mita monia inta ain noumpag, bo mogutundon in mosia kon tua. Mosia in buibí momuḷa kon gobá mita in anggur, bo monginum kon anggurnea. Mosia in monompinomuḷa, bo mokaan kon bungai in boyónea.

MIKHA 2:12

Ki Tuhan in noguman bui, “Ei umat in Israel inta ki agatneapa! Moiko in notantúbí kon sipunon-Ku bo tobatúon naonda bo domba inta mobui mangoi kon ḷantungnea. Naonda bo rawang in bonok inta nopuḻing in domba, natua doman in butámu in mopuḻingdon bui in intau mobayong.

MIKHA 4:6

Ki Tuhan in noguman, “Moiangoibí in wakutunea Akuoi mosipun kon intau mita inta ihukum-Ku, mosia tuata inta nororiga kon pinoḷumbúan.

MIKHA 5:4

bo Sia in mobogoi in kobiagan modame. Aka tontara in Asyur monubu kon butá naton bo mondangat kon poḷoḷukadan naton, yo itoi mita naton inta moropot totok in potabádon momarang kon i monia. Itoi mita naton tatua in monaḷowdon kon Asyur podoyon kon ropot in pakakat in parang, bo moposaḷamat kon i naton nongkon kawasa monia.

ZEPANYA 3:13

Intau in Israel inta kiagatnea, diá bidon mogaid bui kon inta moraat kon i inekabí; mosia in diá bidon monguboḷ bui bo diá bidon bui mongakaḷ. Mosia in mobiag bidon motomoman bo motompia, bo diá bidon angoian in ondok kon i inekadon.”

ULANGAN 30:3

dá ki Tuhan Allahmu in monotabibí kon i monimu. Moiko in diaan-Neabí bui nongkon bangusa mita inta pinoporangkapan kon i monimu, bo bui ogoian in kobiagan motompia.