YEHEZKIEL 29:8 - Alkitab Singog In Mongondow Masa In Tanaa

⁸ Tuamai Akuoi, ki Tuhan Inta Totok in moḷantud, noguman kon inimu, kon Akuoi in mopotabá mangoi in tontara inta monubu kon inimu momaké in kedang, bo ḻimod kon intau takin bobiagonmu.

YEHEZKIEL 29:8 Mawu Ofanana

KINOBAḺIAN 6:7

dapot in Sia noguman, “Yopúon-Kudon in intau inta ain pinomia-Ku tua, bo takin doman bayongan in ḷagapan bo mahaḷuk mita ibanea, sin Akuoi in nomanasaḷdon ain nopomia kon i monia.”

IḶUAIAN 12:12

Kon doḷom tatua moḻibudon in Akuoi kon bayongan butá in Mesir, bo momatoi kon bayongan adí ḷoḷaki inta guya-guyang, pinomayá intau, ande biag. Akuoi in mohukumdon kon bayongan inta sumbaanmai monia kon Mesir, sin Akuoibí in ki Tuhan.

YEREMIA 32:43

Intau in moguman kon butá tanaa in nobaḻí naonda bo padang gurun inta diá inutunan in intau bo mahaḷuk, bo butá tanaa in noḷabúdon kon ḻima in intau in Babel. Táe Akuoi in moguman kon singgai moiduduimai gobá tudunea in buibí potaḷui kon ḻipú tanaa;

YEREMIA 7:20

Akuoi, ki Tuhan Inta Totok in moḷantud, in mopoumabí in torú-Ku inta motoyang kon baḷoi pooibadaan tanaa, kon intau bo kon mahaḷuk, bo kon pangkoi mita in kayu bo kon bungai mita in boyó. Torú-Ku in tumaga-tagab naonda bo tuḷú inta diá kopiongan.”

YEHEZKIEL 14:17

Dika-dika popoangoi-Ku in parang kon butá tatua, bo popoangoi-Ku in ḷoḷutam mita inta motoyang sin moyopú kon intau bo mahaḷuk.

YEHEZKIEL 25:13

Tuamai in potaau-Kudon kon Akuoi in mohukumbí kon Edom bo moḻimod kon bayongan in intau bo mahaḷuk kon tua. Sinangkub in butá tatua, nongkon kotá in Téman modapot kon kotá in Dedan, baḻíon-Ku moingongow totok; rayatnea in matoi kon poparangan.

YEHEZKIEL 30:10

Ki Tuhan Inta Totok in moḷantud in noguman, “Pakéon-Kubí in ki Datu Nebukadnezar nongkon Babel sin morimumud kon bayongan in kaoyúonan in Mesir.

YEHEZKIEL 30:4

Bodito moḷoben in moiantugbí kon Sudan. Kon Mesir mobaḻí in parang. Mobarong in intau in matoi; sinangkub in butá pogagowan bo baḻíon rumbunnea.