YEHEZKIEL 23:24 - Alkitab Singog In Mongondow Masa In Tanaa

²⁴ Tubuon monia in iko nongkon utuan takin tontara inta mobarong, takin doman kereta mita in parang bo kereta mita pododatogan kon tongkaaḷ. Kokada-kadai in kaḻeaw bo nogisapoyo in uwaja, mamangoi in mosia moḻibut kon inimu. Pomayá-Kubí mako in mosia monisig kon inimu podudui in hukum mita monia.

YEHEZKIEL 23:24 Mawu Ofanana

SAMUEL 2 24:14

Ki Daud in notubag, “Adodoia kaasí ah! Moboditodon in akuoi! Táe dika in akuoi hukumon in intau, dá mopia-piabí kon kita in hukumon i Tuhan, sin moḷoben in tabi-Nea.”

YEREMIA 47:3

Mosia in mokodongogbí kon goḷopak in sioḷ in kabaḷo, koḷangká in bayáan in kereta, bo goḷotak mako in bolanea. Guyanga in mobaḻíbí moḷungkoyó bo diá bidon morai kon i adínea.

YEREMIA 52:11

Nopaḷut mako kon tua ki Zedekia iḷontok kon mata, bo sinokig bo dinia kon Babel. Kon tua pinobonu in sia kon ponjara, bo diádon nokoimontanmai in iḻumuai kon tua nodapot in sia minatoi.

YEREMIA 52:9

Onda intua ki Datu Zedekia dinia kon i Datu Nebukadnezar kon kotá in Ribla kon daerah in Hamat, bo iḷabúan in hukuman minatoi.

YEHEZKIEL 16:38

Hukumon-Kubí in iko popisí in pinonuaḻingan bo pinoḻimodan inta ain inaidanmu tua. Kon bonu in rogi bo torú-Ku hukumon-Ku matoi in iko.

YEHEZKIEL 21:23

Intau mita in Yerusalem in diábí mopirisaya kon mosia in tubuon, sin mosia in nomiadon kon dodandian takin Babel. Táe toḻindap tanaa in mobogoi in tompoingat kon i monia kon mosia in domokonbí popisí in dosa mita monia.

YEHEZKIEL 23:45

Táe intau mita motoḷutui in monisigbí kon doyowa mogutat tatua noidoyon kon totuaḻingan bo pinoḻimodan, sin mosia in totuubí kon kotaḷá.”

YEHEZKIEL 26:10

Kabaḷo mita monia in totuu mobayong, dá goḷopak in bayáannea mopoḷayug in ḷobud bo momumbun kon inimu. Singog dowawá in tontara tumotakoi kon kabaḷo inta nogugut kon kereta pinodatogan kon tongkaaḷ bo kereta in parang in mokogugur kon dindingmu mita kon dodai in mosia tumaḻib kon bonawang mita tumuot kon kotá inta nobaḻídon apug tua.

YEHEZKIEL 26:7

Ki Tuhan Inta Totok in moḷantud in noguman, “Diaan-Kubí in ki Datu Nebukadnezar nongkon Babel sin monubu kon inimu, ei Tirus. Datu inta totok in moropot tatua in mamangoi nongkon utuan takin tontara mobarong, takin kabaḷo mobayong bo kereta mita in parang bo tontara tumotakoi kon kabaḷo.