YEHEZKIEL 23:22 - Alkitab Singog In Mongondow Masa In Tanaa

²² Ki Tuhan Inta Totok in moḷantud in noguman, “Ei Oholiba, mobúdon in iko kon intau mita inta kinoibogmu, táe popoyaat-Ku in gina monia sinbá tumorú kon inimu bo moḻibut kon inimu.

YEHEZKIEL 23:22 Mawu Ofanana

YEHEZKIEL 16:37

Tuamai, bayongan inta nokoimontandon kinotabimu sipunon-Ku, pinomayá inta kinoibogmu andeka inta kinodoímu. Simindogbí in mosia ḻimibu kon inimu bo moḷongkut kon bayongan in pakeangmu, dá ontongondon monia komintan in awakmu inta nopilang.

YEHEZKIEL 23:21

Ei Oholiba, moibogbí in iko mopoaid bui kon onu inta inaidanmu kon dodai in noguodpa in iko, kon tungkuḷ intau in Mesir mongogayokan takinmu.)”

YEHEZKIEL 23:23

Sipunon-Ku bo diaan kon inimu in bayongan in intau kinoibogmu nongkon Babel, Pekod, Soa, Koa, Asyur, bo intau mita in Kaldea. Diaan-Ku poangoi kon inimu in tayowmobiag mita inta mongoḷunat inta pangkat mongoḷantud, intau moḷoben, pojabat moḷantud bo itoi mita in tontara inta tumotakoi kon kabaḷo.

YEHEZKIEL 23:28

Ki Tuhan Inta Totok in moḷantud in noguman, “Akuoi in mobogoibí kon inimu in intau mita inta mokobú bo inta kinodoímu.

YEHEZKIEL 23:9

Tuamai in inogoi-Kudon in sia kon inta kinoibognea mita, intau mita in Asyur in totok in kinotanobannea tua.

WAHYU 17:16

Tungoi mopuḷú bo mahaḷuk inta inontongmu tua, moyaatbí in ginanea kon sundaḷ tatua. Daitonbí agowon monia in bayongan kapunyaannea, bo pilangan monia. Kaanonbí monia in tapúnea bo payongon monia in tuḷu.