YEHEZKIEL 21:7 - Alkitab Singog In Mongondow Masa In Tanaa

⁷ Aka ḻibóon monia mongo nongonu sin mogamuibí in iko, yo pogumandon kon morobonoḷ in ginamu popisí in habar inta moiduduimai. Habar tatua in mokoondok kon gina monia, moḷungkoyó in ḻima monia, duḷud monia mourot, modaitdon in ibog monia mobiag. Totuu kon wakutunea in moiangoidon, bo tua mita in mobaḻíbí. Akuoi ki Tuhan Inta Totok in moḷantud ain nosingog.”

YEHEZKIEL 21:7 Mawu Ofanana

SAMUEL 2 17:10

Dá intau mita inta totok in mongotorindog bo mobarani naonda bo singa in notantúbí kon angoianbí in ondok. Sin bayongan intau in Israel in nonotaau bidon kon ki amá i Tuang tua in pahlawan, bo intaunea mita in intau doman mita inta motorindog bo mongobarani.

DATU MITA 2 21:12

Tuamai, Akuoi, ki Tuhan Allah inta sinumba in intau in Israel, mopoangoidon in bodito inta totok in moḷoben kon Yerusalem bo kon Yohuda dá bayongan in intau inta mokodongog kon tua in moitaḻikokogdon.

MAZMUR 58:7

O Allah, putoḷdon in ingipon mita monia, rabutdon in uwaḷa in singa mita batánea tatua, Tuhan.

YESAYA 13:7

Pomuḷoi in intau naonda bo moḻemé in ḻimanea bo moinggamá in baraninea.

YESAYA 28:19

Moiko in umuran koantugan in bodito bo musti mobaba kon tua pomuḷoi in singgai, doḷo-doḷom, moutu in singgai bo doḷom. Moiko in mourotbí popisí in ondok aka komangaḻean monimu in koyow i Allah.

YESAYA 35:3

Koropot in ḻima inta moyangkó, koroton in duḷud inta mourot.

YESAYA 7:2

Kon dodai in ki datu in Yohuda nokodongog kon tontara in Siria in sinumuotdon kon butá in Israel bo nobaḻídon totakin, sia takin bangusanea totokdon in noondok, nodapot in gugurdon mako in mosia naonda bo pangkoi in kayu inta dinandú in tompot.

YEREMIA 26:12

Bo akuoi in noguman, “Ki Tuhan in nopotabá kon inakó nopotaau in koyow inta monayow kon Baḷoi Tuhan bo kotá tanaa ná inta ain dinongog monimu.

YEREMIA 49:23

Naa in pinoguman i Tuhan soaḷ Damsyik. “Intau inta nogutun kon kotá in Hamat bo Arpad in mogagawang bo moḻia-ḻiaw in gina popisí in nokodongog kon habar diá mopia. Gina monia in moondok bo moitoḻimayang mako naonda bo bokoḷ in dagat.

YEREMIA 50:43

Mokodongogmai kon habar tatua, datu in Babel kinodaitan in daya. Ginanea inagían in ondok, bo mokorasa kon mororiga naonda bo bobay inta mononggadí.

YEREMIA 8:18

Ginaku monakit bo mopomporí, amuiku diá koundaman.

OMBAḶ 5:17

Buḷud in Sion noingongowdon bo sinaḷáan; kon tua ungkú in kayuon nodondaḷoi magí-mako. Manangka intua gina nami nádon poropatoian, mongombaḷ in kami modapot in diádon motarang in mata nami.

YEHEZKIEL 20:49

Táe akuoi ki Yehezkiel nomayow poḷat moguman, “Tuhan Inta Totok in moḷantud, dika potabá in akuoi moguman kon tua! Bayongan in intau ain nogamui sin akuoi in moibog mosingog pongin tangkí dá mororiga komangaḻean.”

YEHEZKIEL 21:15

Binaḻínea in bangusa-Ku noinggamá in baraninea bo noḷabú noipintud. Inindoyó-Ku in kedang in kotá tatua inta mopouḻi-uḻinag naonda bo kilat, bo nosadiadon moḻimod.

YEHEZKIEL 21:6

Ei intau ilo-ilow, karakdon bo pogamuidon kon tayowon in intau mita in Israel, naonda bo iko in kinodaitandon in gina bo kinobuḻian in kamang.

YEHEZKIEL 21:8

Ki Tuhan in noguman kon inakó,

YEHEZKIEL 22:14

Mokobaḻípa andeka moropotpa degá in iko in mobuat kon ḻimamu naonda in hukumon-Ku mako in iko? Akuoi, ki Tuhan Inta Totok in moḷantud ain nosingog bo Akuoi in mogaidon kon onu in siningog-Ku.

YEHEZKIEL 24:19

Rayat in noḻibó, “Nongonu sin ki amá in nogaidbí kon nanaa? Onu in mangaḻenea kon inami?”

YEHEZKIEL 6:2

“Ei intau inta ilo-ilow, ḷangagaidon in buḷud mita in Israel, bo potaaudon in koyow-Ku soaḷ hukuman kon i monia.

YEHEZKIEL 7:17

Bayongan in intau mobaḻíbí moḻemé in ḻimanea bo mourot in duḷudnea.

YEHEZKIEL 7:26

Bodito bo habar diá mopia in umuranbí mamangoi. Moiko in mopoigumbí sinbá nabi mita moibogpa monoḻindap, táe diádon kotaauan monia. Ná doman tua in imang mita diádon koonu bo onu in tundúon kon umat, bo itoi mita in kodaitandon in tonggina.

DANIEL 5:6

Nobilaidon totok in sia bo nádomai tua in ondoknea nodapot in nourotdon totok in duḷudnea.

IMAMAT 26:36

Intaumu mita inta kon pinoḷumbúanpa kon butá intau, popogonúan-Kudon in ondok moḷoben, modapot in umpaka tongá singog in daun irupon tompot yo poḷaguian monia. Moiko in moḷagui naonda bo inaḷowan kon bonu in parang, bo moḷabú umpaka diá in musung kon diugmu.

NAHUM 2:10

Niniwe in norimumudon, moingongow bo noḷogat. Gina in noḻia-ḻiawdon sin moondok. Duḷud in moḻemédon bo mourot. Pogot in bayongan in intau nongobilaidon totok.

LUKAS 21:26

Intau mita in moondok totok in moyogintayow in onu inta mobaḻí kon dunia naa, bo bayongan kawasa kon baḷangon motombauk.

ULANGAN 20:8

Porwira mita in musti doman moguman nanaa kon inimu, ‘Oyúon degá in kon sigad monimu nion in mouyot bo moondok? Aka oyúon, motaaubí in sia mobui, sinbá sia in diá mokoponag kon gina in intau ibanea moparang.’

IBRANI 12:12

Tuamai, koropot in ḻimamu inta noḻemé bo duḷudmu inta mouyot tua!

YOSUA 5:1

Bayongan in datu in Amori kon dotá in toyopan kon Ongkag in Yordan, bo bayongan datu in Kanaan inta kon bingkí in Dagat Toyuak nokodongogdon kon Ongkag in Yordan ain iningkagan i Tuhan kon bonu in umat Israel iḷumoḷan kon ongkag tatua. Dá inagíandon in ondok in mosia bo uyotdon mako popisí in intau Israel.

YOSUA 7:5

Intau mita in Ai nondudur kon i monia nongkon ngara in kotá in Ai nodapot kon butá pongongaḻian kon buḷawan, bo noḻimod kon degá toḷu nopuḷú bo onom in intau kon sigad monia kon oyukmai in buḷud. Dá intau mita in Israel inangoiandon in ḻia-ḻiaw in gina bo ondok.

PETRUS 1 4:7

Kopaḷutan in yagi-yagi motoyongdon. Tuamai ḷukadaidon kopira in awak monimu bo umuran mokopoonow kon raian sinbá moiko in motaau mosambayang.