YEHEZKIEL 20:31 - Alkitab Singog In Mongondow Masa In Tanaa

³¹ Nodapot in singgai in naa moiko in noponajis in awak pinongin nodia kon sosumba bo notubá kon i adímu mita nobaḻí kuruban kon berhala mita. Bo mokobaḻípa doman in moiko in mopoigum in topotundú nongkon i-Nakó? Podoyon kon i-Nakó, ki Allah inta nobiag, ki Tuhan Inta Totok in moḷantud, moiko in diábí ogoi-Ku in mopoigum in topotundú nongkon i-Nakó.

YEHEZKIEL 20:31 Mawu Ofanana

AYUB 27:10

Musti in sia mopoimoḷat mako kon kobobiag mopia nongkon i Allah, bo diá moḷopi-ḷopí in mosambayang kon i-Nia.

AYUB 27:8

Oyúon degá in kamang kon intau binaradosa kon dodai in ki Allah monuntut kon dimukudnea?

MAZMUR 66:18

Aka kuma bo mopia in ginaku in monomayá kon aid moraat, yo notantúbí kon doíbí in ki Tuhan mokidongog.

AMSAL 28:9

Aka iko bo diá motoindudui kon hukum i Allah, yo ki Allah in doíbí doman kon sambayangmu.

YESAYA 1:15

Aka moiko motonggó kon ḻimamu sin mosambayang, doíbí in Akuoi moindoimai. Diábí pandungon-Ku mongo kotongonu in moiko mosambayang, doíbí in Akuoi mokidongog, sin ḻimamu tatua in pinoḻimodmu kon nobayong in intau.

YESAYA 57:5

Moiko in mosumba kon dewa mita koḷumbaan takin mopomayá mako in awakmu dumudui kon ibog kon ḻimonag in pangkoi mita in kayu karamatmu. Moiko in moḷobong kon i adímu mita kon oyuk in ongkag bo kon sigad mita in batu.

YEREMIA 14:12

Umpakabí in mosia mopuasa, doíbí in Akuoi moindoimai kon kuani monia mokituḷung; bo umpakabí in mosia moposumba kon i-Nakó in kuruban payongon bo kuruban gandum, yo diábí mosanang in gina-Ku kon i monia. Noyotoḻikudon kon tua, yopúon-Kubí in mosia in parang, in gogoy, bo in yampoi.”

YEREMIA 19:5

Mosia in noposindogdon in mezbah kon i Baal sin moposumba in adí mita monia nobaḻí kuruban payongon, bokaka Akuoi in diábí kon dodai in onda in nopotabá kon i monia nogaid kon tua, nodapotbí in diábí kon dodai in onda in ná tatua nomuká kon bonu in raian-Ku.

YEREMIA 7:31

Mezbah tobatú inta sinangoian Topet ain pinosindog monia kon Ḷopá in Hinom sin moposumba kon i adí mita monia nobaḻí kuruban payongon. Bokaka Akuoi in diábí kon dodai in onda in nopotabá kon i monia nogaid kon tua, nodapot in diábí kon dodai in onda in ná tatua in nomuká kon bonu in raian-Ku.

YEHEZKIEL 16:20

Onda intua pinosumbamu in ki adí mita naton, ḷoḷaki bo bobay, nobaḻí kuruban kon berhala mita. Diápa doman degá tugat in diá kotoinduduimu kon i-Nakó?

YEHEZKIEL 20:26

Pinomayá-Ku in mosia in noponajis in awak pinongin kuruban mita monia tontaní, nodapot in ki adí mita monia ḷoḷaki inta guya-guyang pinokuruban monia. Pinongin aid tatua Akuoi nohukum kon i monia sinbá kotaauan monia kon Akuoibí in ki Tuhan.

YEHEZKIEL 20:3

“Ei intau ilo-ilow, poyosingogdon in itoi mita tatua bo poguman kon Akuoi, ki Tuhan Inta Totok in moḷantud in noguman nanaa, ‘Mokobaḻíbí totok in moiko in moigum kon topotundú-Ku! Podoyon kon i-Nakó, ki Allah inta nobiag, doíbí in Akuoi poigumanmu kon topotundú! Akuoi, ki Tuhan Inta Totok in moḷantud ain nosingog.’

YEHEZKIEL 23:37

Mosia in nomiadon kon totuaḻingan bo noḻimod; mosia in nonuaḻingdon takin in berhala mita bo noḻimod kon i adí-Ku mita inta pinononggadí monia. Adí mita tatua in pinosumbadon monia kon berhala mita monia.

YEHEZKIEL 33:30

Ki Tuhan in noguman, “Ei intau ilo-ilow, iko in nobaḻídon toouman mako in intau tobangusamu aka mosia moyodungkuḷ kon diug in dinding mita in kotá andeka kon tayowon in ngara mita in baḷoi. Mosia in mosigumanan, ‘Koḻigai, indongogan mongo onu in koyow i Tuhan singgai in naa.’

AMOS 8:12

Intau in modondaḷoibí nongkon utuan mopobayá in toḷatan bo nongkon pomukaan mayá in toyopan sin motayak kon koyow-Ku, táe diábí mouḻí monia intua.

ZAKHARIA 7:13

Akuoi in doíbí notubag kon sambayang monia, sin mosia doman in doí mokidongog kon tungkuḷ in Akuoi nosingog.