YEHEZKIEL 16:26 - Alkitab Singog In Mongondow Masa In Tanaa

²⁶ Mesir, topodiugmumai inta moḷoben in ibognea tua, ain noyotakinmu nosiug. Sinumontuonbí in iko nonuaḻing sinbá tumorú in Akuoi.

YEHEZKIEL 16:26 Mawu Ofanana

DATU MITA IMITÁNEA 12:28

Naonda in noporai-raimai kon tua, nomia in sia kon patong sapi buḷawan bo noguman kon rayat, “Bangusa in Israel! Noonggotdon in moiko in minayá in Yerusalem sin moibada. Tanaa in naadon in ilahmu mita inta ain nodia kon i monimu iḻumuai nongkon Mesir!”

IḶUAIAN 32:4

Ginamá i Harun in nganti-nganting mita tatua, bodongka sinubánea nodapot in noḷoḷang bo binonunea kon pastaka tobatú bo pinomia patong sapi tobatú. Intau mita tatua noguman, “Ei Israel, naadon in ilah naton inta nodia kon i naton iḻumuai nongkon Mesir!”

YESAYA 30:21

Aka moiko bo tumabat nongkon daḷan, kon tumimu kodongogan in singog-Nea inta moguman, “Naa in daḷannea; pongin daḷan tanaa.”

YEREMIA 3:1

Ki Tuhan in noguman, “Aka buḷoi bobay gaaton i buḷoinea ḷoḷaki, bo bobay tatua in mobaḻídon ki buḷoi in intau ibanea, dá ki buḷoinea dungkuḷ in diá bidon motaau mogamá bui kon inia mobaḻí buḷoi, sin aid natua in mokogoguyaatbí kon butá tanaa. Iko Israel, in nobayongdon totok in ki buḷoimu, umpaka yo tanaa iko in moibog bui mamangoi kon i-Nakó!

YEHEZKIEL 23:3

Kon dodai in noguodpa, nogutun in mosia kon Mesir. Kon tua mosia nosiugdon takin ḷoḷaki, bo nobaḻídon sundaḷ.

YEHEZKIEL 23:8

Sia in umuranbí sinumundaḷ ná dungkuḷmai wakutu in kon Mesir, kon tampat inta dungkuḷ sia nosiug takin ḷoḷaki. Pinangkoi kon sia mongoadípa, sia in siniugandon bo pinomia saḷaku sundaḷ.

YEHEZKIEL 8:10

Dá akuoi in sinumuot doman bo noindoi. Dinding mita in yuang tatua ginambaran in noyagi-yagimai in uḷag bo mahaḷuk mita haram ibanea, bo noyagi-yagimai doman in gambar berhala inta sinumba in intau mita in Israel.

YEHEZKIEL 8:14

Dá dinia-Nea in akuoi minayá in bonawang dotá in utuan kon Baḷoi Tuhan bo pinoontong-Nea kon inakó in bobay mita inta mongombaḷmai kon kinopatoian i Dewa Tamus.

YEHEZKIEL 8:17

Ki Tuhan in noguman kon inakó, “Ei intau inta ilo-ilow, inontongmu degá intua? Intau mita in Yohuda tanaa in diá moorop aka tongá mogaid kon inta mokorongó tatua bo mogaid kon inta diádon monotaau kon intau kon sinangkub in butá. Nodapotbí in inaidan monia intua komintan kon naa, kon bonu in Baḷoi-Ku bo nokodugang kon torú-Ku bui. Indoiaika naonda in mosia moningkuḻe kon i-Nakó pinongin aid inta totok in mokotor tanaa!

IMAMAT 15:3

pinomayá inta iḻumuai ande inta diá iḻumuai.

YOSUA 24:14

“Dá, tanaa,” ki Yosua noguman doman nanaa, “horomatonbí in ki Tuhan. Pogundoidon kon i-Nia takin gina motuḻid bo mosatia. Ḷumbúdon in toḻindua in Tuhan inta sinumba in mogoguyangmu koḻipod kon Mesopotamia bo Mesir. Tongádon ki Tuhan in pogundoian.