YEHEZKIEL 16:13 - Alkitab Singog In Mongondow Masa In Tanaa

¹³ Natuata iko iḷambáan in buḷawan bo saḷaka; pakeangmu pinomia nongkon kaeng linen bo sutra sinomboréan. Motaaubí in iko mokaan kon roti pinomia nongkon torigu inta totok in mopia, takin biluk bo ḷana in zaitun. Koḷunatmu noiḷontúdon totok bo iko in nobaḻídon bokí.

YEHEZKIEL 16:13 Mawu Ofanana

KINOBAḺIAN 17:6

Akuoi in mobogoi kon inimu in adí bo ompu inta mobarong, bo kon sigad monia tua oyúon in mobaḻí datu mita. Buímu in mobaḻí moantó totok, dapot in mosia mobaḻí bangusa mita.

SAMUEL 2 8:15

Natuata in nobaḻí ki Daud nomarenta kon bayongan in Israel bo noḷukad sinbá rayatnea in umuran koadilon bo kopiaan in pomomarenta.

DATU MITA IMITÁNEA 4:21

Batúan in motoḷuadí oyúonbí in gobá in anggur bo gobá in ara. Kinoouputbí in kinobiagan i Salomo rayat kon bayongan in Yohuda bo Israel nongkon Dan nodapot in Bersyeba nobiag noaman bo notompia. Sin, bayongan in datu kon dotá in toyopan in Eprat notoguondok kon inia, bo bayongan in bangusa nongkon negara mita inta kon diugmai in dodatuan nea noyobayat takinnea. Butá kon dotá in toyopan kon Ongkag in Eprat nongkon Tipsah kon bingkí in Ongkag in Eprat minayá in toyopan ná kotá in Gaza kon Pilistin nodapot kon pinosigadan in Mesir, komintan kinawasa i Salomo. Bangusa mita kon butá tatua notoguondok kon inia bo moguboḻi kon iba. Bahan mita in kaanon inta paraḷuon i Salomo muḷoi in singgai in 5.000 noliter in topong inta moyimok, 10.000 noliter in topong inta nogoros, 10 in sapi kinobang, 20 in sapi kon popokaannea, bo 100 in domba. Koḻikud intua, rusa doman, rusa koḷakian, menjangan bo biag ḷumoḷayug.

EZRA 4:20

Nokoimontan doman in datu mita inta motorindog nomarenta kon tua bo nongawasa kon sinangkup in propinsi Eprat Toyopan bo noigum kon pajak bo iba.

EZRA 5:11

Mosia in notubag, ‘Kami naa in mogogundoi i Allah mongongawasa kon dunia naa. Kami in koyogot in moposindog in Baḷoi Tuhan inta pinosindog bo sinompakakatan kon puḷúan in taong inta noitaḻibdon i datu tobatú in Israel inta moḷoben.

AYUB 29:6

Bobiagonku nobogoi in susu mobarong totok. Mobayong doman in ḷana in pangkoi mita in zaitunku, umpaka pinomuḷa kon butá inta nobarong in batu.

MAZMUR 147:14

Sia in noḷukad kon butámu sinbá umuran moaman, bo mopokaan in gandum inta totok in mopia kon inimu modapot in mobotug.

MAZMUR 48:2

Totuubí moḷantud in ki Tuhan bo totok in dinayow kon kotá i Allah naton, kon tombuḷud inta motusi.

MAZMUR 50:2

Nongkon Sion, kotá inta totok in mogaga, Ki Allah in noitukat takin nonindar.

MAZMUR 81:16

Intau inta mondoí kon i-Nakó in potungkudon-Kubí, mosia in hukumonbí modapot in mononoi.

YESAYA 64:11

Baḷoi i Allah inta motusi bo momulia tampat in mogoguyang nami modayowmai kon ini-Mu, aindon kinaan in tuḷú; bayongan tampat inta kinoibog nami aindon nobaḻí goguyaatnea.

YEREMIA 13:20

Ki Tuhan in noguman kon intau in Yerusalem, “Taridiaidon! Musungmu mita in niondon taya-taya mangoi nongkon utuan! Kon onda in intau mita inta musti ḷukadan monimu bo inta totok in pongata-ngata mako monimu.

OMBAḶ 2:15

Bayongan in intau inta moitaḻib, morebeg kon inimu, sin norimumudon komintan in iko. Momombiḻing in mosia bo poḷat moguman, “Tuata degá in kotá inta totok in mogaga, kotá inta inyunggagá in dunia?”

YEHEZKIEL 16:10

Onda intua iḷutudan-Kudon in ḷambung inta sinomboréan, sapatu kuḻit inta mopia, bandow nongkon kaeng linen bo jubah sutra.

YEHEZKIEL 16:17

Nongkon ḷambá buḷawan bo saḷaka inta inogoi-Ku kon inimu, pinomiamu patong mita ḷoḷaki, bo nonuaḻing in iko takin patong mita tatua.

YEHEZKIEL 16:19

Inogoian-Ku in iko in kaanon torigu inta totok in mopia, biluk bo ḷana in zaitun inta nodarit. Táe tua mita pinosumbamubí kon berhala mita tatua sin moposanang in gina monia. Akuoi ki Tuhan Inta Totok in moḷantud ain nosingog.

YEHEZKIEL 23:40

Nodapotbí in mosia nokidia in sonsoma kon ḷoḷaki mita kon ḻipú mita inta nongoyayú, bo namangoi doman in mosia. Popisí in motomu kon intau mita tatua, dá taya dua mogutat tua in noinggú, nogicilá bo nopomaké in noyagi-yagimai in ḷambá.

YEHEZKIEL 27:16

Mododagang mita nongkon Siria in notaḷui kon pakakat mita inta pinotaḷuimu bo inta nongouḻímu mita inta mobayong tua. Inuboḻian monia in permata nongkon batu zamrud, kaeng nokamumu, kaeng sinujian, linen moaḷus, permata nongkon batu koral bo batu nopura delima.

HOSEA 2:5

Ki inámu in sundaḷ diá kotoguoyá. Sia in noguman, ‘Akuoi in mayábí kon inta kinotabiku mita inta nobogoi kon inakó in kaanon bo inumon, wol bo kaeng linen, ḷana in zaitun bo anggur.’

ULANGAN 8:8

Butá tatua nobogoi in noyagi-yagimai in gandum, anggur, bungai in ara, bungai in delima, pangkoi in zaitun bo biluk.

SAMUEL 1 10:1

Onda intua ki Samuel nogamá kon kendi inta kon bonu in ḷana zaitun, bo ḷana zaitun tatua pinopobutak kon uḷu i Saul, bo inayokannea in ki Saul poḷat noguman, “Ki Tuhan ain nopobaḻí kon inimu datu kon Israel umat-Nea. Iko in momarentabí kon umat-Nea bo moḷukad kon i monia nongkon musung mita monia. Naa in mobaḻí tomponuot kon inimu kon ki Tuhan in nomiḻídon kon inimu mobaḻí datu kon Israel umat-Nea:

SAMUEL 1 12:12

Tongá naonda in moiko nokoontong kon moiko in tubuondon i Nahas datu in Amon, moiko in nondoídon kon i Tuhan saḷaku datumu bo noguman kon inakó, ‘Kami in moibog parentaan in datu tobatú.’ ”