YEHEZKIEL 14:22 - Alkitab Singog In Mongondow Masa In Tanaa

²² Aka kuma bo oyúon in mokoḷagui bo moposaḷamat kon i adínea mita, taridiaidon in mosia aka mosia mamangoi kon inimu. Indoiai naonda in moraat monia, dá kotaauandon monimu kon noitugatbí in aid-Ku mohukum kon Yerusalem.

YEHEZKIEL 14:22 Mawu Ofanana

TAWARIKH 2 36:20

Rayat inta nobiagpa in dinianea kon Babel. Kon tua in mosia nobaḻí ki atanea bo ki ata in buínea nodapot in kon tungkuḷ in dodatuan Persia nongawasa.

YESAYA 24:13

Tuata in mobaḻí kon sinangkub in dunia kon batúan in bangusa. Notongkai ná kon sempo in posipunan kon bungai in boyó, kon dodai in bungai in zaitun ginamá nodapot in nodait bo bungai in anggur inta imbuitnea sinipú nongkon pangkoinea.

YESAYA 6:13

Modapot in aka kon sigad in intau mopuḷú oyúonpa in tobatú inta nogutun kon butá tatua, sia in yopúonbí doman. Táe naonda bo pangkoi in nunuk aka pupuḷon yo oyúonpa in tuodnea, natua doman oyúonpa in ki agat in bangusa tatua inta nobaḻí pomangkoian in umat inta motusi.”

YEREMIA 30:11

Akuoi in mamangoibí bo moiko in posaḷamaton-Kubí. Bangusa mita, inta pinoporaritan-Ku kon i monimu komintanbí yopúon-Ku, táe moiko in diábí pomiaan-Ku natua. Memang moiko in diábí moiḷagui kon hukuman táe hukuman-Ku kon i monimu in moadilbí podudui in inta ain sinantú. Akuoi, ki Tuhan ain nosingog.”

YEREMIA 4:27

Ki Tuhan in noguman kon sinangkub in dunia in mobaḻí padang gurun, táe Sia in diábí momutú kon tua komintan.)

YEREMIA 5:19

Táe aka mosia in moḻibó mongo nongonu sin Akuoi in nopoaidbí intua komintan kon i monia yo pogumandon ei Yeremia kon ná doman mosia in nonaḷá kon i-Nakó kon butá monia tontaní sin mogundoi kon dewa mita in bangusa ibanea, yo natua doman mosia in mobaḻí ata in intau ango-angoi kon butá ibanea.”

YEHEZKIEL 12:16

Tongosilai moyakag kon i monia in posaḷamaton-Ku nongkon parang, nongkon malarat in kaanon, bo nongkon yampoi in takit, sinbá kon yua-yuak in bangusa mita ibanea tatua yo mosia in monotaaudon kon mosia in nogaidon kon inta totok in moromú. Dá akuondon monia kon Akuoibí in ki Tuhan.”

YEHEZKIEL 16:54

Pongin natua dá mooyá in iko kon inimu tontaní, bo koempengmu in moponiatadon kon i utatmu mita kon totuu mopia in ukur monia.

YEHEZKIEL 16:63

Ampungan-Kubí in bayongan in taḷámu, táe diábí koḻionganmu intua bo angoianbí in oyá in moguman kon onu bo onu in iko. Akuoi ki Tuhan Inta Totok in moḷantud ain nosingog.”

YEHEZKIEL 20:43

Kon tua kotoropandon monimu in bayongan in oaid inta mokorongó inta ain nokonajis kon awakmu. Dá morongódon in moiko in mokotorop kon bayongan inta nobaḻí tatua.

YEHEZKIEL 31:16

Kon dodai in pangkoi in kayu poponagon-Ku kon dunia in intau minatoi, doradak in koḷabúannea in mokoondok kon bangusa mita. Bayongan in pangkoi in kayu kon Eden bo pangkoi mita in kayu inta notompiḻí kon Libanon inta nokouḻí kon tubig nobarong, bo inta ain noponag kon dunia inta totok in koḻimonag in mopia-piabí in gina in kinoḷabúan in pangkoi in kayu tatua.

YEHEZKIEL 32:31

Aka datu in Mesir takin tontaranea modapotdon kon dunia in intau minatoi bo mokoontong kon bayongan in intau tatua inta ain minatoi kon bonu in parang, mosia in moḻipoidon. Akuoi ki Tuhan Inta Totok in mokawasa ain nosingog.

YEHEZKIEL 36:20

Kon ondakabí in bayáan monia, mosia in umuranbí mopokotormai kon tangoi-Ku inta motusi. Sin intau mita in noguman nanaa, ‘Bangusa tanaa in umat i Allah, táe mosia in mustibí monaḷámai kon butá inta inogoi i Allah kon i monia.’

YEHEZKIEL 36:31

Kotoropanbí monimu in dodiamu inta moraat bo aidmu inta diá patus tua, bo morongódon bui in moiko kon awakmu tontaní popisí in dosamu mita bo aidmu inta diá mopia tua.

YEHEZKIEL 7:16

Tongosilai in kotaḻibanbí bo moḷagui mayá in buḷud. Kon tua mosia in nádon onda bo ḷagapan mita paḷoma inta binuntun nongkon ḷopá mita; komintanbí mogongot popisí in dosa mita monia.

MIKHA 5:7

Intau in Israel inta nogutunpa kon yua-yuak in bangusa mita in mobaḻídon naonda bo singa kon yua-yuak in mahaḷuk mita kon kayuon andeka kon yuak in paanan in domba kon rawang in bonok. Singa tatua in tumuot kon yua-yuak in paanan in domba tatua bo moritak poḷat momera-merak; diábí in mokopomuḻi kon domba mita tatua.

MARKUS 13:20

Aka kuma bo diádon impoḷokan i Allah i wakutunea tatua, dá diábí in tobatúmai in mosaḷamat. Táe popisídon in umat-Nea, dá impoḷokan i Allah in wakutu-Nea.

ULANGAN 4:31

Ki Tuhan Allahmu in Allahbí inta totok in kototabi. Sia in diábí monaḷámai ande moyopú kon i monimu, ande moḻiong kon dodandian inta pinomia-Nea tontaní takin mogoguyangmu.