YEHEZKIEL 13:20 - Alkitab Singog In Mongondow Masa In Tanaa

²⁰ Ki Tuhan Inta Totok in moḷantud in noguman kon bobay mita inta dumuí nabi tua, “Mobú in Akuoi in mokoontong kon ḻingkit mita ajimat inta pinaké monimu mongawasa kon kobiagan bo kopatoian in umat-Ku. Ḻingkit mita tatua in agowon-Kubí nongkon poguḻingkitan in ḻima monia, bo intau mita inta kinawasa monimu in poḷuaton-Ku.

YEHEZKIEL 13:20 Mawu Ofanana

YEHEZKIEL 13:18

bo potaaudon in onu in inta poguman-Ku, ki Tuhan Inta Totok in moḷantud kon i monia: ‘Moboditodon in moiko! Moiko in mopoḷutud kon bayongan intau in ḻingkit mita ajimat bo koḷob mita in uḷu inta mosakti sinbá mosia inta nomaké in natua mokokawasa kon kobiagan in intau ibanea. Moiko in moibog mongawasa kon kobiagan bo kopatoian in umat-Ku, bo kawasa tatua in pakéon monimu potayak kon kauntunganmu tontaní.

YEHEZKIEL 13:19

Moiko in nopoompámaidon kon i-Nakó kon tayowon in umat-Ku tongá bá mokouḻí kon tongonumai noyangkom in makoya bo tongonumai noputoḷ in roti. Intau mita inta diá kotaḷá, ḻimodon monimu bo intau mita inta patus matoi pinomayá mako monimu mobiag. Bo moiko in monguboḷ kon umat-Ku bo mosia in mopirisaya kon inimu.’ ”

YEHEZKIEL 13:21

Koḷob mita in uḷu inta kainimu in mosakti in berakon-Ku, bo umat-Ku in posíon-Ku nongkon tongganut in aidmu moraat modapot in mononoi. Dá kotaauandon monimu kon Akuoibí in ki Tuhan.