YAKOBUS 3:17 - Alkitab Singog In Mongondow Masa In Tanaa

¹⁷ Táe intau inta nokouḻí kon kabijaksanaan nongkon i Allah, yo sia in muna-munamai totok modarit, onda intua moibog in sia kon dodamean, mobahasa mako, bo motoindudui. Moḷoben in tabinea bo oaidnea mongopia. Diábí in sia momiḻí kon intau bo diábí tongá ki ubo-uboḷmai mopia.

YAKOBUS 3:17 Mawu Ofanana

DATU MITA IMITÁNEA 3:12

dá onu inta pinoigummu tatua in ogoi-Kubí. Baḻíon-Ku in iko mobija-bijaksana bo mopando-pandoi nongkon i inekabí doman, pinomayá kon dungkuḷmai andeka kon singgai moiduduimai.

DATU MITA IMITÁNEA 3:28

Kon dodai in bangusa in Israel nokodongog kon soaḷ bontow in tosingogon i Salomo kon bonu in pelekara tatua, nobangkaḷdon in mosia kon inia. Sin noniatadon kon ki Allah ain nobogoi kon inia in kabijaksanaan sin mopoaid in inta moadil.

DATU MITA IMITÁNEA 3:9

Manangka intua, Tuhan, aka motaau yo ogoiaipa in akuoi in kabijaksanaan inta pakéon kon momarenta kon umat-Mu tanaa takin moadil bo motaau mopoyoposi onda inta mopia bo onda inta moraat. Aka diá natua, yo diábí in akuoi mokoparenta kon umat-Mu inta mobarong naa!”

TAWARIKH 1 22:12

Bo igumon mako ki Tuhan Allahmu in mobogoi kon inimu in kabijaksanaan bo pandoi sin momarenta kon Israel podudui in hukum-Nea mita.

TAWARIKH 1 22:9

Umpaka natua, nodandi in Sia kon inakó nanaa: ‘Iko in mokouḻíbí kon adí ḷoḷaki tobatú inta momarenta takin mobiag motompia sin Akuoi in motuḷung kon inia dá diá in musung in monubu kon inia. Sia in tangoian ki Salomo sin kon bonu in sia in momarenta, Akuoi in mobogoibí in kobiagan motompia bo moaman kon bayongan in Israel.

AYUB 28:12

Táe kon onda in motaau potayakan kon hikmat? Kon onda in motaau pobalajaran naton sinbá momangaḻe?

AYUB 28:23

Tongábí ki Allah in nonotaau kon tampat in hikmat, tongábí Sia in nonotaau kon daḷan mopobayá intua,

AYUB 28:28

Ki Allah in noguman kon intau, “Sinbá mokouḻí kon hikmat, ki Allah in musti horomaton monimu. Sinbá momangaḻe, inta moraat musti poyayúon monimu.”

IḶUAIAN 36:2

Ki Musa nogoiní kon i Bezaleel, kon i Aholiab bo bayongan intau inta nokouḻí kon koahlian nongkon i Tuhan bo takin pia in gina mobantung, bo pinoki pomangkoiandon nogaid.

AMSAL 2:6

Ki Tuhanbí in mobogoi in hikmat; nongkon i-Niabí intau mokouḻí kon pongotahuan bo komomangaḻe.

YESAYA 2:4

Sia in mohakimbí kon sigad in bangusa mita, bo momontow kon pelekara kon sigad in suku mita in bangusa. Pitow in tontaḷon pomiaan pajeko, bo ginubat aidan roratab. Bangusa mita in diábí mositubuan, diábí domandon mosadia moparang.

YESAYA 32:6

Intau bodok mosingog kon tosingogon inta mobodok bo monomayá kon inta moraat. Onukabí in aidan andeka inta singogonnea in nobaḻí bidon singkuḻe kon i Allah. Diábí kon dodai in onda in sia mobogoi in kaanon kon intau inta gogoyon andeka oinumon kon intau inta morogang.

YESAYA 40:11

Naonda bo gombala Sia in noḷukad kon paanan-Nea; Sia tontaní in mosipun kon i monia. Ki adí mita in domba koyotan-Nea, takin moḷukó in tosingogon Sia in modia kon i indenea mita.

DANIEL 1:17

Ki Allah in nobogoi kon inaya opat in hikmat bo kototaau kon noyagi-yagimai in pais. Koḻikud intua ki Daniel inogoian doman in pandoi moginsilang kon mangaḻe in oontongon bo togoindop.

MALEAKHI 2:9

Dá baḻíon-Kubí doman in moiko poompáanmai in umat in Israel sin moiko in diá notoindudui kon koibog-Ku, bo popisí in moiko mopoyo-poyoposi kon intau kon dodai in motundú kon umat-Ku.”

MALEAKHI 3:3

Sia in mamangoi sin mohakim, naonda bo intau inta mondarit bo mopomurni in saḷaka. Naonda bo intau momomia kon logam mopomurni in buḷawan bo saḷaka, natuata in totabá i Tuhan in mopomurni in imang mita sinbá mosia in moposumba in kuruban mita podudui kon onu inta kinoibog i Tuhan.

MATIUS 23:28

Ná doman tua in moiko. Kon ḷuai koontongan intau mobanar; táe kon bonu in ginamu nopuḻing in oaid diá totuu bo moraat.”

MATIUS 5:8

Pia in kamang in intau inta motuḻid in ginanea; sin mosia tua inta mokoontong kon i Allah.

MATIUS 5:9

Pia in kamang in intau inta moibog in dodamean; sin mosia tua in tangoion ki adí mita i Allah!

LUKAS 21:15

Bá kotaauan monimu kon Akuoibí in moguman kon onu inta musti potubag monimu, sahingga saturu mita monimu tua, diá mokoḷawang ande mokobayow kon onu in singogon monimu.

LUKAS 6:36

Musti potonop monimu kon gina in totabi kon tumpaḷa intau ná ki Amámu nopuḻing doman in totabi kon intau!”

YOHANES 1:14

Pirman ain nobaḻí intau, Sia in nogutun kon sigad naton, bo kita ain nokoontong kon kamuliaan-Nea. Kamuliaan inta sinarima-Nea saḷaku Adí tuḷong i Amá. Pinongin i-Nia tua kita mokoontong kon i Allah bo tabi-Nea kon i naton.

YOHANES 1:47

Inontong i Yesus in ki Natanael namangoi, dá ki Yesus in noguman nanaa soaḷ ki Natanael tua, “Indoiai, tua in intau in Israel motuḻid, diábí in uboḷ kon ginanea!”

OUMAN IN RASUL MITA 11:24

Ki Barnabas naa in intaubí mopia, inta umuran kinawasa in Roho i Allah bo intau inta totok in mopirisaya kon i Tuhan sahingga moantódon in intau in dinumudui kon i Tuhan.

OUMAN IN RASUL MITA 9:36

Kon ḻipú tatua oyúon doman in bobay, tangoinea in ki Tabita. Sia in tobatú intau inta mopirisaya kon i Yesus. (Aka kon Yunani, ki Dorkas in tangoinea.) Sia in umuran mogaid kon inta mopia bo umuran moibog motuḷung kon intau mita inta nobiag nobogá.

SURAT I PAULUS KON JAMAAT RUM 12:18

Moiko musti moramuji mobiag mopopiaan takin bayongan in intau.

SURAT I PAULUS KON JAMAAT RUM 12:9

Kotabibí takin gina motuḻid. Poyayú inta moraat bo kadai kon onu inta mopia.

SURAT I PAULUS KON JAMAAT RUM 15:14

Utatku mita! Moyakinbí in akuoi kon totokbí in mobayong inta mopia in nion kon i monimu. Moiko nion in nonotaaubí doman kon bayongan in yagi-yagi bo mokomampubí doman mositongginaan.

KORINTUS 1 12:8

Oyúon intau in nokouḻí kon totabi mosingog kon inta mopia, oyúon doman in nokouḻí kon totabi motundú kon soaḷ ki Allah.

KORINTUS 2 10:1

Akuoi ki Paulus, inta kain intau in diá mobarani moyogintayow mako, tongá mobarani aka moyogiyayúan monimu. Tanaa mako pinodoyon kon koaḷus bo kopopia in gina i Kristus,

KORINTUS 2 6:6

Takin gina motuḻid, mobijaksana, mosabar bo mopia in gina, pinoniatadon nami kon kami in mogogundoibí i Allah. Bo takin kinumadai kon totuḷung in Roho i Allah, bo takin tabi inta noiḷuai nongkon gina inta motuḻid,

KORINTUS 2 7:11

Tungkuḷaika tarukira monimu onu in bungai in ajar in gina inta pinodudui kon ibog i Allah kon i monimu! Naa in bungainea; moiko in totu-totuubí moramuji moginsilang kon onu inta diápa notarang! Bo moyaatbí in gina monimu kon onu inta diá mopia, oyúon in porasaan moondok, mokotanobbí, tantú moropot in gina, bo oyúon in ibog mohukum kon inta kotaḷá! Kon bayongan soaḷ mita tanaa in moponiata bidon kon moiko in diá bidon kotaḷá.

KORINTUS 2 9:10

Sinadia-Neadon bibit kon intau inta mogogambor bo kaanon kon i naton. Siabí doman inta moposadia in bibit inambor monimu tatua, sinbá bungai in kopopia in gina monimu moguntu-guntuḷ domandon.

EPESUS 5:9

Sin nongkon bayag tuata momuká in bayongan oaid inta mopia, motuḻid bo mobiag totu-totuu kon tayowon i Allah.

PILIPI 1:11

Moiko in mobiag takin oaid mita inta totu-totuu mopia inta tongábí mouḻí nongkon i Yesus Kristus tontaní, dá ki Allah pomuliaan bo dayowon.

PILIPI 4:8

Naa in simpod in singogku utat mita, porai kon onu inta oyúon in baragunanea, bo onu inta motaau dayowon, ná soaḷ mita inta moitutui, inta horomatonmai, inta moadil, modarit, inta moromimit bo inta mopia.

KOLOSE 1:10

Dá moiko in mobiagdon podudui in ibog i Allah bo umuran mokosanang kon gina-Nea, sahingga kon bayongan yagi-yagi moiko in umuran mobogoi in bungai inta mopia. Bo pongotahuan monimu soaḷ ki Allah in modugang domandon.

TESALONIKA 1 2:7

Táe kami in tongábí umuran mokopopia kon oaid wakutu in kon yua-yuakpa monimu, naonda bo guyanga bobay monompia kon i adínea.

TIMOTIUS 1 5:21

Kon tayowon i Allah, bo i Yesus Kristus bo in malaekat mita inta piniḻí-Nea, pogumankudon kon inimu sinbá dumuduidon in iko totu-totuu kon onu inta sinundúku mita tanaa, ḷumbúbí in raianmu inta diá mopia kon i inekabí bo aidaidon in naa komintan bo dikabí mopoyoposi kon intau.

TIMOTIUS 2 2:24

Intau inta nogaid kon oaidan i Tuhan in diábí mopia aka moyogenggeng. Mustibí mokopoaḷus kon pososingog bo mokopoompá kon dodia kon tumpaḷa intau, bo kopira doman in motundú kon intau bo mosabar.

TITUS 1:15

Bayongan in yagi-yagi in nodaritbí aka kon intau mita inta nodarit in raian. Táe aka kon i monia inta raian mokotor bo inta diá mopirisaya kon i Tuhan, yo diábí in tobatúmai in modarit, sin raian bo gina monia in komintan domandon mokotor!

TITUS 3:2

Tongginaai sinbá mosia in diá umuran moibog moponapud in uboḷ kon intau ibanea andeka moibo-ibog mobobayowan i inekadon, sin maníka umuran mokopopia kon dodia kon tumpaḷa intau bo mokopoaḷus doman kon pososingog takin bayongan in intau.

IBRANI 12:11

Totuubí kon wakutu in kita sambokon, diábí mosanang in gina naton, sedang bo monakitbí totok. Táe moiduduimai kon tua, kita inta sinambok, yo sambok tatua in momaḷuibí kon oaid naton, sahingga in kita nobiagdon podudui in ibog i Allah, bo bungainea kon tua in mosanangdon totok in gina naton.

IBRANI 12:14

Poramuji umuran mobiag motompia takin bayongan intau. Poramuji doman mobiag mokudus takin i Tuhan. Sin diábí in tobatúmai intau mokoontong kon i Tuhan aka diá mobiag natua.

YAKOBUS 1:17

Pomuḷoi in oogoi inta mopia bo tombuinag inta mosompurna, namangoibí intua nongkon soroga, pinopoponag i Allah inta nomia kon bayongan inta nobayag kon ḷangit. Sia tua in ki Allah inta diá kon dodai in onda mobaḷui bo diábí doman mokopopisí in mogaid kon inta mosindip.

YAKOBUS 1:5

Aka oyúon in kon sigad monimu in diápa totok mobijaksana; yo musti mopoigum kon i Allah, dá ogoianbí i Allah in kabijaksanaan in sia. Sin takinbí pia in gina bo tabi in ki Allah in mobogoi kon batúan in intau.

YAKOBUS 2:13

Sin diábí poontong i Allah in tabi-Nea kon intau inta diá nonotaau in totabian. Táe tabibí in moḷobe-ḷoben nongkon hukuman!

YAKOBUS 2:4

Aka natua in aidan monimu, yo moiko in nopoyoposidon kon tumpaḷa intau bo monilai kon intau podudui in raian inta moraat.

YAKOBUS 3:15

Kabijaksanaan natua in deemanbí nongkon soroga. Tua in nongkon duniabí, nongkon ibog in intau, bo nongkon dimbuḷó!

YAKOBUS 4:8

Diugaidon in ki Allah, bo ki Allah in dimiugdon kon i monimu. Daritaidon in ḻimamu, moiko inta binaradosa! Bo insilangaidon in ginamu, moiko inta nonanga in gina!

PETRUS 1 1:22

Popisí in moiko bo umuran dinumudui kon onu inta sinundú i Allah, dá tabidon in nondarit kon i monimu sahingga in totu-totuudon in moiko motabi kon intau mita inta tumpaḷa mopirisaya kon i Kristus. Pogumanku bui, totu-totuudon positabian in moiko kon tobatú bo tobatú takin gina motuḻid.

PETRUS 1 2:1

Manangka intua, ḷumbúdon in bayongan inta moraat; kon i monimu, bo donaaidon umuran monguboḷ, momunapik. Dikadon mointoi, bo dikadon mohojat kon intau ibanea.

PETRUS 1 2:18

Utatku mita inta nobaḻí bobantung, kotoinduduibí kon i tuangmu bo totu-totuudon horomat in mosia; deemanbí tongá kon i monia inta mopia in gina bo mobahasa, táe kon i moniabí doman inta morogi.

YOHANES 1 3:18

Adíku mita! Donaaibí in kita motabi tongá kon bibig ande tongá kon singog, táe poniatabí in tabi tatua kon oaid naton.

YOHANES 1 3:3

Komintan intau inta oyúon in harapan nanaa kon i Kristus, musti totuu mokopodarit kon kobobiag, modarit nongkon dosa mita naonda bo ki Kristus nodarit doman.