ULANGAN 9:26 - Alkitab Singog In Mongondow Masa In Tanaa

²⁶ bo nosambayang nanaa: O Tuhan Inta Totok in Moḷantud, dikadon yopúon in umat kapunyaan-Mu tanaa, bangusa inta pinoḷuat-Mudon bo dinia-Mu iḻumuai nongkon Mesir takin ropot bo kawasa-Mu inta moḷoben.

ULANGAN 9:26 Mawu Ofanana

SAMUEL 2 7:23

Kon dunia naa in diábí in bangusa ná Israel. Tongábí Israel tuata in bangusa inta ain pinoḷuat-Mu nongkon pinononggataan sin mobaḻí umat-Mu tontaní. Bayongan in aid moḷoben bo inta mokoherang inta pinomia-Mu kon i monia, mopobaḻí kon tangoi-Mu ponango-nangoian kon dunia. Bangusa mita ibanea takin dewa mita monia aindon inuntun-Mu kon tungkuḷ in umat-Mu minayá noparang.

DATU MITA IMITÁNEA 8:51

Mosia in umat-Mubí tontaní inta ain dinia-Mu iḻumuai nongkon Mesir butá inta pinononggataan kon i monia.

DATU MITA IMITÁNEA 8:53

Iko, o Tuhan Allah, ain nomiḻí kon i monia nongkon sigad in bayongan bangusa sin baḻíon umat-Mu tontaní, ná inta ain pinoguman-Mu kon i monia pinongin mogogundoi-Mu ki Musa, kon tungkuḷ in Iko nodia kon mogoguyang nami iḻumuai nongkon Mesir.”

NEHEMIA 1:10

Tuhan, kami naa in mogogundoi-Mu mita, umat-Mu tontaní inta pinosaḷamat-Mu pinongin kawasa bo ropot-Mu inta motoyang.

MAZMUR 106:23

Dá niaton i Allah yopúon in umat-Nea, táe inimaḷowan i Musa, intau inta piniḻí-Nea. Ki Musa in nobaḻí tonsigad kon i monia, dá noonow in torú i Allah.

MAZMUR 107:2

Bui-buimaidon singog intua, ei moiko inta ain pinosaḷamat nongkon susa.

MAZMUR 28:9

Posaḷamatdon in umat-Mu, o Tuhan, barakataidon in intau-Mu mita. Kobaḻídon naonda bo gombala kon i monia, bo ḷukadaidon in mosia modapot in mononoi.

MAZMUR 57:1

Kon i itoi in mododondong. Podudui in dondong: Dika momutú. Mazmur i Daud, kon dodai in sia noḷagui sinumuot kon bonu in angob sin moḷagui kon i Saul.

MAZMUR 77:15

Ikobí in ki Allah inta nomia kon inta mokoherang, kawasa-Mu ain pinoniata-Mu kon yuak in bangusa mita.

MAZMUR 78:35

Mosia in nokotorop kon ki Allah in moḷoḷukad monia, bo ki Inta Totok in moḷantud in mopoposaḷamat monia.

MAZMUR 99:6

Ki Musa bo ki Harun noitakin doman in imang-Nea mita, ki Samuel in intau tobatú inta nosambayang kon i-Nia. Mosia in nokuani kon i Tuhan, bo sinubagan-Nea.

IḶUAIAN 15:13

Iko in nodia kon bangusa inta ain pinosaḷamat-Mu naa, sin onu in pinodandi-Mu tua doman in aidan-Mu. Ropot-Mu moḷoben pinogoḻingoi-Mu kon i monia, bo poḷat dinia-Mu pinobayá in butá-Mu inta motusi naa.

IḶUAIAN 33:13

Aka natua, dá potaaudon kon inakó onu in tomayá-Mu, Tuhan, sinbá akuoi in motaau mogaid kon oaidan-Mu bo umuran moposanang kon gina-Mu. Torop domandon kon bangusa tanaa ain piniḻí-Mu nobaḻí kapunyaan-Mu.”

IḶUAIAN 34:9

Gumannea, “Tuhan, aka totu-totuu kon ibog-Mu in akuoi, akuoi mopoigum, moibogdon ki Tuhan moyotakin nami. Bangusa tatua totuu kon motogat in gina, táe ampungaipa in raat bo dosa nami bo tarimadon kami mobaḻí umat-Mu tontaní.”

YESAYA 44:23

Porogiowdon moḷunganga, ei ḷangit, porogiowdon, ei bonu in butá! Porogiowdon takin ḷunganga in gina, ei buḷud mita! Natua doman in kayuon bo bayongan in pangkoi in kayu kon bonunea! Sin ki Tuhan in nopoontongdon in kamuliaan-Nea pinongin notobut kon Israel umat-Nea.

YESAYA 63:19

Pinomia-Mudon in kami naonda bo Iko in diá kon dodai in onda in nongawasa kon inami; naonda bo kami in diábí kon dodai in onda in nobaḻí umat-Mu.

YEREMIA 14:21

Toropdon in dandi-Mu, dika kaasí poompáan-Mumai in kami; dodandian-Mu takin inami dikabí inggamáan-Mu. Yerusalem in tampat pomomarentaan-Mu inta momulia, dika kaasí poompáan-Mumai.

YEREMIA 15:1

Ki Tuhan in noguman kon inakó, “Diá bidon in Akuoi motabi kon bangusa tanaa, umpakabí ki Musa bo ki Samuel in simindog kon naa mopoigum in totabi-Ku kon i monia. Potabádon mayá in bangusa tanaa, doídon in Akuoi moindoi kon i monia!

OMBAḶ 2:20

Kaasí Tuhan, indoiai bo taridiaipa in mosia inta iroriga-Mu tatua! Degá oyúon in nokoimontan-Mu pinomia natua? Ki iná nokaan kon i adínea inoyod inta kinotabi totok, imang bo nabi in iḻimod kon bonu in Baḷoi-Mu inta motusi.

MIKHA 6:4

Moiko in dinia-Kudon iḻumuai nongkon Mesir, bo pinoḷuat-Kudon nongkon pinononggataan; Akuoi in nopotabádon kon i Musa, kon i Harun, bo kon i Miryam sin modia kon i monimu.

ULANGAN 15:15

Toropdon kon moiko in koḻipod in atabí doman kon Mesir bo pinoḷuatdon i Tuhan Allahmu; tuamai in ogoiku in parenta tanaa kon inimu.

ULANGAN 21:8

Tuhan, ampungaidon in Israel umat-Mu inta pinoḷuai-Mu nongkon Mesir. Ampungaidon in kami bo dikadon mopobaba kon inami in taḷá kon intau inta iḻimod diá kotaḷá tatua.’

ULANGAN 32:9

Táe buí i Yakub in tanaa piniḻí i Tuhan kon i-Nia tontaní.

ULANGAN 7:8

Táe ki Tuhan nomiḻí kon i monimu sin motabi in Sia kon i monimu bo mogintompod kon dandi inta pinomia-Nea takin mogoguyangmu. Tuamai in noposaḷamat in Sia kon i monimu takin kawasa inta moḷoben bo nopoḷuat kon i monimu nongkon kawasa i datu in Mesir.

ULANGAN 9:12

Bo ki Tuhan noguman kon inakó, ‘Ḷagidon posiḻig, sin bangusamu inta diniamu iḻumuai nongkon Mesir nomiadon kon inta moraat. Mosia sinumabatdon nongkon parenta-Ku mita, bo nomiadon kon patong sin sumbáan.’

ULANGAN 9:27

Toropbí in bobantungmu mita ki Abraham, ki Ishak bo ki Yakub, bo dikadon indoianmai in dodia motontogat in gina, raat bo dosa in bangusa tanaa.

ULANGAN 9:29

Táe toropdon, o Tuhan, kon mosia naa in bangusa inta piniḻí-Mu nobaḻí umat-Mu, bo dinia-Mu nongkon Mesir takin ropot bo kawasa-Mu inta moḷoben.”

TITUS 2:14

Sia tuata inta ain noposarakan in awak-Nea sin mopoḷuat kon i naton nongkon bayongan inta moraat, bo kita in baḻíon-Nea tobatú umat inta noiḷuatdon nongkon kawasa in dosa bo tongádon mobaḻí umat-Nea inta morajing mogaid kon inta mopia.

IBRANI 9:12

Ki Kristus in sinumuot kon Yuang Totok in Motusi kon ḷoḷaigan tatua tongábí komintan, diá bidon mopobui-buimai. Dodai intua Sia in diábí nodia kon dugú in bembé koḷakian andeka dugú adí in sapi sin posumba, táe dugú-Neabí tontaní in dinia-Nea. Bo dugú-Neabí tatua in nopobebas kon i naton dapot in kopaḷutannea.

WAHYU 5:9

Mosia nopodondong in tobatú dondong mobagu, nanaa: “Iko in patus mogamá kon buk tatua bo moḷosi kon meterainea mita. Sin Iko ain iḻimod, bo dugú-Mu tatua, in pinoguboḻi-Mu kon intau nongkon bayongan suku, bahasa, negara bo bangusa sin ogoi kon i Allah.

SAMUEL 1 7:9

Tuamai in ki Samuel noratá kon ki adí in domba inta batáneapa, bodongka pinosumba nobaḻí sosumba payongon kon i Tuhan. Nopaḷut mako kon tua nosambayang in sia nopoigum sinbá ki Tuhan in motuḷung kon intau in Israel, bo inindogogan i Tuhan in sambayangnea tatua.