ULANGAN 8:15 - Alkitab Singog In Mongondow Masa In Tanaa

¹⁵ Ki Tuhan nodia kon i monimu nongin padang gurun inta nobendar mako bo inta motoyang, inta mobayong in uḷag mobisa bo bambau. Kon butá inta moingkag diá in tubig binaḻí-Nea in tubig iḻumuai nongkon batu, sinbá moiko motaau monginum dapot in moguḻí in yogangmu.

ULANGAN 8:15 Mawu Ofanana

MAZMUR 105:41

Binotak-Nea in buḷud batu, bo noitampurangdon mangoi in tubig inta noiḻig naonda bo ongkag kon padang gurun.

MAZMUR 114:8

inta nomaḷui kon batu karang nobaḻí tabang, bo buḷud batu nobaḻí bokaká in tubig.

MAZMUR 136:16

Dinia-Nea in umat-Nea nongin padang gurun; tabi-Nea in umuran mononoi.

YESAYA 30:6

Nanaa in koyow i Tuhan soaḷ mahaḷuk mita inta kon butá in toḷatan, “Totabá mita nopodatog kon keledai bo unta monia in tombuinag mita, bo nongin butá inta nopuḻing in inta mokoondok inta pinogutunan in singa, uḷag mobisa bo naga kokoḻikipan. Tombuinag mita tatua pinosumba monia kon bangusa tobatú inta diá mokotuḷung kon i monia.

YESAYA 35:7

Bungaion inta mopatú in mobaḻí tabang, butá inta mobota-botak, pomukáan in bokaká. Tampat inta dungkuḷ pinogutunan in ungkú in kayuon, in kobiagandon in utó bo bakung.

YESAYA 43:19

Taridiaika, Akuoi in nogaidon kon inta mobagu; tanaa in momangkoidon, diá degá inontongmu? Akuoi in momiabí kon daḷan kon padang gurun, bo ongkag mita kon rawang kayuon.

YEREMIA 2:6

Akuoi in diádon pinandungmai; Akuoi, inta ain nokapit kon i monia kon daḷan, bo nodia kon i monia iḻumuai nongkon Mesir sinumaḻib kon rawang in bungaion, tampat inta diá in mobobiag inta nobayong in pobeukan, bo inta noingkag bo mokoanib doman – tampat inta diá inutunan bo diá bayáanmai!

HOSEA 13:5

Kon butá nobota-botak kon padang gurun, Akuoibí in noḷukad kon i monimu.

PINOGIAPAN 20:11

Bo ki Musa notonggó kon tungkud tatua bo nomorot kon buḷud batu tatua kodua. Dá noiroputdon magí in tubig norogot totok, dá bayongan intau bo bobiagon nonginumdon kon tua.

PINOGIAPAN 21:6

Dá pinopoangoidon i Tuhan kon yua-yuak in bangusa tatua in uḷag mita inta mongobisa. Nobarong intau in Israel in minatoi sinobak in uḷag mita tatua.

KORINTUS 1 10:4

bo nonginum kon tubig inta ain doman sinantú kon inumon monia. Mosia komintan in nonginum kon tubig nongkon buḷud batu inta umuran kotaki-takin monia; buḷud batu tatua in ki Kristus.

ULANGAN 1:19

“Bo pinodudui kon parenta i Tuhan Allah naton, kita in monaḷámai kon Buḷud in Sinai bo mayá mongin padang gurun inta mobendar bo motoyang mopobayá ná buḷud mita in intau Amori. Kon dodai in kita modapot kon Kades-Barnea,

ULANGAN 32:13

Binaḻí-Nea in mosia nongawasa kon buḷud mita; mosia in nokaan kon bungai in boyó kon gobá mita monia bo nonginum kon biluk in kayuon kon buḷud batu. Mosia nokouḻí kon ḷana nongkon pangkoi in zaitun inta nobiag kon butá inta nopuḻing in batu.