ULANGAN 7:19 - Alkitab Singog In Mongondow Masa In Tanaa

¹⁹ Toropdon in bodito mita inta motoyang inta inontong monimu tontaní, soaḷ mita inta mokoherang, bo ropot inta moḷoben inta pinaké i Tuhan Allahmu sin mopoḷuat kon i monimu. Ná doman in popoaid i Tuhan Allahmu kon bayongan bangusa inta kinoondok monimu.

ULANGAN 7:19 Mawu Ofanana

MAZMUR 136:12

pinongin ḻima inta moropot bo motorindog; tabi-Nea in umuran mononoi.

MAZMUR 44:4

Butá tatua in diábí inagow monia nopomaké in kedang; diábí doman ropot monia tontaní in nokopountung kon i monia, táe pinodoyonbí kon kawasa bo sindar in kinoangoian-Mu, sin noibog in Iko notuḷung kon umat-Mu.

MAZMUR 77:12

Akuoi in moibog monorop kon inta inaidan-Mu mita o Tuhan, monanob kon inta mokoherang mita inta inaidan-Mu dungkuḷmai.

IḶUAIAN 6:6

Moiko in baḻíon-Ku umat-Ku, bo Akuoi in mobaḻí ki Allahmu. Dá kotaauandon monimu kon Akuoi naa in ki Tuhan, Allahmu, inta nopoḷuat kon i monimu nongkon pinononggataan kon Mesir.

ULANGAN 29:3

Moiko in nokoontong domandon kon bodito mita inta motoyang, mujizat mita bo inta mokoherang mita inta pinomia i Tuhan.

ULANGAN 3:21

Bo akuoi in noguman kon i Yosua: Iko nokoontongdon kon bayongan inta pinomia i Tuhan Allahmu kon i Sihon bo kon i Og, datu doyowa tatua. Natuabí doman in pogogaid-Nea kon bayongan datu inta agowonmu in butánea.

ULANGAN 4:34

Dodai in onda in oyúon in ilah tobatú inta nobarani nogamá kon bangusa tobatú nongkon bangusa mita inta oyúon bodongka binaḻí umatnea tontaní, ná inta inaidan i Tuhan Allahmu kon inimu kon Mesir? Inontongdon monimu tontaní naonda in ki Allah takin ropot inta moḷoben nopoangoi in bodito bo parang, nomia kon inta mokoherang mita bo nomia kon soaḷ mita inta motoyang totok.

YOSUA 10:25

Nopaḷut mako kon tua, ki Yosua noguman kon porwira mita tatua, “Dika moḻia-ḻiaw in gina bo dika moondok. Pokoyakin bo pokobarani in moiko, sin nanaabí in pogogaid i Tuhan kon bayongan in musungmu.”

YOSUA 24:17

Ki Tuhan Allah natondon inta nopoḷuat kon mogoguyang naton bo kon inaton doman tontaní nongkon pinononggataan kon Mesir. Kita in nokoontongdon kon inta mokoherang mita inta pinomia i Tuhan. Ki Tuhan in umuranbí moḷukad kon i naton kon binayáan naton, sinumaḻib kon butá mita in intau mita ibanea.

YOSUA 3:10

Aka moiko mayádon monubu, yo notantú bidon kon untunonbí i Tuhan in intau in Kanaan, Het, Hewi, Peris, Girgasi, Amori bo Yebus. Bo kon dodai in Poti Dodandian i Tuhan inta nomaḻí kon dunia naa ḷumoḷandon kon Yordan umuna kon i monimu, yo ontongondon monimu kon ki Allah inta nobiag in kon yua-yuakdon monimu.