ULANGAN 4:32 - Alkitab Singog In Mongondow Masa In Tanaa

³² Tarididon in singgai koḷabung, kon dodai in moiko diápa pinononggadí, pinangkoi kon singgai kon wakutu in ki Allah nomia kon intau kon dunia naa. Tayakdon kon bayongan dunia. Dodaibí in onda in soaḷ inta motoyang tua nobaḻí? Dodai in onda in oyúon in intau inta nokodongog kon soaḷ onu inta nobaḻí ná tatua?

ULANGAN 4:32 Mawu Ofanana

KINOBAḺIAN 1:27

Natuata in ki Allah nomia kon intau, pinomia-Nea in mosia naonda bo batangan-Nea tontaní. Pinomia-Nea in mosia ḷoḷaki bo bobay.

SAMUEL 2 7:23

Kon dunia naa in diábí in bangusa ná Israel. Tongábí Israel tuata in bangusa inta ain pinoḷuat-Mu nongkon pinononggataan sin mobaḻí umat-Mu tontaní. Bayongan in aid moḷoben bo inta mokoherang inta pinomia-Mu kon i monia, mopobaḻí kon tangoi-Mu ponango-nangoian kon dunia. Bangusa mita ibanea takin dewa mita monia aindon inuntun-Mu kon tungkuḷ in umat-Mu minayá noparang.

AYUB 8:8

Intau moarip tungkuḷ intua musti indoianmu, bo tano-tanobonmu in pongalaman in mogoguyang.

MAZMUR 44:1

Mazmur in inanakan i Korah. Dondong topotundú. Kon i itoi in mododondong.

IḶUAIAN 34:10

Ki Tuhan noguman kon i Musa, “Tanaa mako Akuoi momiadon kon dodandian takin bangusa Israel. Kon tayowon mata monia Akuoi mogaid kon inta mokoherang mita inta diápa dodai onda inaidan kon sigad in bangusa inta kon ondaka in kon dunia naa. Bayongan bangusa in mokoontong kon soaḷ mita mokoherang inta pomiaan-Ku, sin Akuoi, ki Tuhan in momiabí kon tobatú oaidan inta motoyang kon i monimu.

YESAYA 45:12

Akuoibí in ki Tuhan inta nomia kon butá, bo inta nomaḻí kon intau sin mogutun kon tua. Pinodoyon kon kawasa-Ku Akuoi in nosongká kon ḷangit, bo nomarenta kon mata in singgai, buḷan bo tundi mita.

YOËL 1:2

Indongogaidon, ei guhanga mita in ḻipú; taridiaidon, ei bayongan intau in Yohuda. Nokoimontandon degá in ná tanaa in nobaḻí kon singgai kinobiaganmu, andeka kon dodai in mogoguyangmu?

AMOS 3:2

“Nongkon bayongan in bangusa kon dunia, tongábí moiko totobatú nion inta bangusa inta kinotaauan-Ku bo inta inindoian-Kumai. Tuamai in moḷoben in dosamu, bo notantúbí kon hukumon-Ku in moiko.”

MATIUS 24:31

Bo Sia in mopotabá kon malaekat-Nea mita ḷumuai, bo mogirup kon bansí inta mopia totok in singognea sin mosia mosipun kon intau mita inta aindon piniḻí-Nea nongkon popod mita in dunia, bo nongkon popod in ḷangit tobotak modapot popod in ḷangit tobotak doman.”

MARKUS 13:27

Sia in mopotabábí in malaekat-Nea mita sin mosipun kon umat inta ain piniḻí-Nea nongkon siku mita in dunia naa, nongkon popod mita in dunia mopobayá in popod in ḷangit.”

ULANGAN 28:64

Ki Tuhan in moporangkapbí kon i monimu kon sigad in bangusa mita kon bayongan dunia naa. Kon tua moiko in mosumba kon ilah mita inta pinomia nongkon kayu bo batu, ilah mita inta diá kinotaauan monimu bo diá doman kinotaauan in mogoguyangmu.

ULANGAN 30:4

Umpakabí moiko noirangkapdon kon dunia naa, sipunonbí i Tuhan Allahmu in moiko bo diaan mobui.

ULANGAN 32:7

Toropdon in singgai muna, taridiaidon in singgai mita tungkuḷ intua. Ḻibódon kon guyangamu, sinbá mosia in mopotaau kon inimu.

ULANGAN 33:29

Kosanangdon in iko, ei Israel! Diábí in bangusa ná iko pinosaḷamat i Tuhan. Ki Tuhan in naonda bo pitow bo oḻingoi kon inimu; sin moduḷu kon inimu bo mobogoi in kauntungan kon inimu. Musungmu mita in mamangoibí mokikotabimai, bo iko in totokbí in moritak kon i monia.”

ULANGAN 4:7

Bangusa moḷobenbí kon onda in ko ilah inta námai tua in kododagin aka paraḷuon ná kododagin i Tuhan Allah naton kon i naton? Sia in motubag toonukabí in kita mokuani mokituḷung kon i-Nia.