ULANGAN 32:47 - Alkitab Singog In Mongondow Masa In Tanaa

⁴⁷ Topotundú mita tatua in deemanbí tosingogon mita inta diá in mangaḻenea, táe kobiaganmubí. Duduiaidon in bayongan parenta tatua, sinbá moumur in kobiagan monimu kon butá inta diádon moonggot bo ḻitúan monimu kon ḷoḷan in Ongkag in Yordan.”

ULANGAN 32:47 Mawu Ofanana

AMSAL 3:18

Intau inta kumadai motantú kon hikmat in mokouḻíbí kon kobiagan inta moitutui bo mosanang.

AMSAL 3:22

dá kobiaganmu in koḷukadanbí – mopia bo mokosanang.

AMSAL 4:13

Tantú torop in totundú inta ain sinarimamu kon inakó. Ḷukadai intua kopira, sin pongin totundú tatua kodapotanmu onu in sinayakmu.

AMSAL 4:22

Intau inta nonotaau kon tua in mobiagbí bo mosehat.

YESAYA 45:19

Akuoi in diábí tongá umuni-uni in mosingog, andeka tongá bunion kon intau ibanea. Akuoi in diábí nopotabá kon umat-Ku Israel motayak kon i-Nakó takin diá in mangaḻenea. Akuoi, ki Tuhan, mosingog kon inta banar, bo mopotaau kon onu inta totuu.”

IMAMAT 18:5

Duduiaidon in atorang mita bo hukum mita inta ogoi-Ku kon i monimu. Aka aidan monimu in natua, mosaḷamat in kobobiagmu. Akuoi naa in ki Tuhan.”

AMOS 5:4

Ki Tuhan in noguman kon intau in Israel, “Pobuidon mangoi kon i-Nakó, dá mobiagbí in moiko.

MATIUS 6:33

Táe, tayakpa muna in ki Allah bo aidaidon onu inta kinoibog-Nea. Dá komintan tua in ogoi-Neabí doman kon inimu.

OUMAN IN RASUL MITA 7:38

Ki Musabí tuata inta kon yua-yuak in bangusa Israel kon padang gurun, inta nobaḻí tonsigad kon malaekat inta nopoyaput in singog kon inia kon Buḷud in Sinai takin mogoguyang naton. Sia tuata inta notarima kon habar inta nobiag nongkon i Allah sin poyaput kon i naton.

ULANGAN 30:16

Singgai naa akuoi momarenta kon i monimu sinbá motabidon kon i Tuhan Allahmu bo motoindudui kon i-Nia poḷat mogaid kon bayongan in parenta-Nea sinbá moiko in mobiag motompia bo mobaḻí bangusa inta moḷoben. Ki Tuhan Allahmu in momarakatbí kon i monimu kon butá inta diádon moonggot in ḻitúan monimu.

ULANGAN 31:13

Pongin aid natua yo ki adímu mita inta diápa dodai in onda in nokodongog kon hukum i Tuhan Allahmu in mokodongogdon bo mobalajar mohoromat kon i Tuhan kon bonu in mosia mobiag kon butá inta diádon moonggot bo ḻitúan monimu kon ḷoḷan in Ongkag in Yordan.”

ULANGAN 33:25

Igumon mako kotánea mita in oḻingoian in ḷoḻingkop mita in ngara nongkon bitú bo uatoi sinbá kobiagannea in umuran moaman bo motompia.”

ULANGAN 4:40

Duduiaidon in bayongan hukum inta inogoiku kon inimu singgai naa, dá moiko bo buímu in mobiag motompia bo umuran oyúon kon butá inta inogoi i Tuhan Allahmu nobaḻí kapunyaanmu mononoi.”

ULANGAN 4:6

Aidai intua pokosatia. Aka aidan monimu in natua, dá kobobijaksanamu in moniatadon kon bangusa mita ibanea. Aka kodongogandon monia in hukum mita tatua, yo mosia in mogumanbí nanaa, ‘Totuu mobijaksana bo mopandoi in bangusa inta moḷoben tatua!’

ULANGAN 8:3

Pinomayá-Nea mako in moiko ginogoi, bo moiko inogoian-Nea in manna sin kaanon. Moiko bo mogoguyang monimu diápabí dodai onda nokaan kon kaanon natua. Inaidan i Tuhan in natua sin motundú kon i monimu kon intau tua in diábí mobiag tongá nongkon kaanon, táe nongkon bayonganbí doman in onu inta siningog i Tuhan.

TIMOTIUS 1 4:8

Latihan in awak naa in tongábí topiḻik in baragunanea, táe aka molatih moibada yo moibaragunabí kon bayongan in yagi-yagi, sin oyúon in dandi kon kobiagan tanaa mako bo kobiagan kon singgai moiduduimai.

PETRUS 2 1:16

Kon wakutu in kami nopotaau kon inimu kon naonda in komomulia in koangoian i Tuhan naton ki Yesus Kristus, tua in inouman nami deemanbí tongá pinodoyon kon ouman mita in intau inta diá in mangaḻenea. Táe kamuliaan i Kristus tatua ain bidon inontong in mata nami tontaní.

PETRUS 2 1:3

Ki Allah in nomakédon kawasa-Nea sin mobogoi kon i naton in bayongan yagi-yagi inta paraḷu pakéon kon kobiagan sinbá motoindudui kon i-Nia. Tua in inaidan-Nea pinongin onu inta kinotaauan naton soaḷ ki Yesus Kristus, inta ain nogoiní kon i naton sinbá mobiag moyotakin-Nea kon tampat-Nea inta mopia bo moonow.

WAHYU 22:14

Mosanangdon totok in intau inta nomatá kon jubahnea kinodarit totok. Mosia in motaau mokaan kon bungai in pangkoi in kayu kobiagan bo tumuot kon bonu in kotá mongin ngaranea.