ULANGAN 32:22 - Alkitab Singog In Mongondow Masa In Tanaa

²² Torú-Ku in moborambangdon naonda bo tuḷú inta momokak modapot kon dunia in intau minatoi. Tuḷú tatua in momokak kon bayongan in butá takin tombonunea, bo buḷud mita modapot in kon uakatnea mita.

ULANGAN 32:22 Mawu Ofanana

MAZMUR 144:5

O Tuhan, bukataidon in ḷangit-Mu bo poponagdon, ḻiaidon in buḷud mita sinbá monompoyok.

MAZMUR 21:9

Sia in modakopbí kon bayongan in musungnea, bo nodomok kon bayongan in intau inta nondoí kon i-Nia.

MAZMUR 46:2

Ki Allah in mogogoḻingoi bo pangkoi in ropot naton; Sia in umuranbí taḷaoḷat bo mokotuḷungbí kon bonu in yoyiga.

MAZMUR 83:14

O Allah, potabudon in mosia naonda bo ḷobud, naonda bo baḻeká inta inirup in tompot.

MAZMUR 86:13

Sin Iko in tantúbí notabi kon inakó takin tabi moḷoben; Iko in noposaḷamatdon kon nyawaku nongkon bubú in poḷoḷobongan.

MAZMUR 97:3

Tuḷú in iḷumekep kon tayowon-Nea, nomokak kon musung kon ḻibu-Neamai.

YESAYA 24:6

Tuamai in ki Tuhan ain nongutuk kon butá bo nohukum kon intaunea popisí in aid monia. Mosia in pinokak bo tongá topiḻik in nongkon i monia in nosaḷamat.

YESAYA 30:33

Nongkon koḻipodpabímai ain sinadia in tampat potubáan kon i datu in Asyur. Tampat tatua modaḷom bo mooḷad, binonuan in kayu pondungú inta noyoguntuḷdon. Ki Tuhan in mopoyongkitdon intua pongin mopoirup in poginaan-Nea ná ongkag in balerang.

YESAYA 54:10

Umpaka buḷud mita bo tombuḷud mita modandú, Akuoi in diábí mogogai in monotabi kon inimu. Dodandian dodamean-Ku in umuran-Kubí kadaian,” Guman i Tuhan inta notabi kon inimu.

YEREMIA 15:14

Kon butá in intau inta diá kinotaauan monia, Akuoi in mopobaḻíbí kon i monia ata in musung mita monia, sin torú-Ku in noiḻimpódon naonda bo tuḷú inta tumagab bo doídon mopiong.”

YEREMIA 17:4

Moiko in pakisadon mobogoi in butá inta ain inogoi-Ku kon inimu, bo baḻíon-Ku in moiko mobantung kon musungmu kon butá inta totokbí in diá kinotaauanmu. Tua in inaidan-Ku komintan popisí in torú-Ku noiḻiudon naonda bo tuḷú inta nodokot bo diádon kopiongan.”

YEREMIA 4:4

Kadaiai in dandimu kon i-Nakó, Tuhanmu, bo awakmu in tongádon ogoi kon i-Nakó, ei intau mita in Yohuda bo Yerusalem. Aka diá, yo torú-Ku in tumagabdon bo momokak naonda bo tuḷú inta diábí kopiongan i inekabí. Tua komintan in moiumabí kon inimu popisí in aidmu mita inta moraat.”

OMBAḶ 2:2

Bayongan in rawang in bonok kon butá in Yohuda, irimumud-Nea takin diá in tabi. Kon bonu in torú-Nea dinangatan-Nea nodapot in noumpag in dinding mita inta nogoḻingoi kon butá tatua. Dodatuan tatua takin itoinea mita iḷabú-Nea nodapot in mokooyádon.

OMBAḶ 2:3

Kon bonu in torúnea inta tumaga-tagab, ropot in Israel pinutoḷ-Nea. Kon wakutu in kita sinubu in ḷawang, mobogat in gina-Nea in motuḷung. Naonda bo tuḷú moborambang momokak kon bayongan in yagi-yaginea, natuata in ki Tuhan sinumorú kon i naton komintan.

OMBAḶ 2:4

Naonda bo musung, Sia in nomadang kon puḷu in piot-Nea bo pinopotayow-Nea kon i naton in piot-Nea. Bayongan in intau inta nokosanang kon gina naton, nodait iḻimod-Nea. Sia in noporoput in torú-Nea naonda bo tuḷú kon bonu in kotá in Yerusalem tanaa.

OMBAḶ 4:11

Ki Tuhan in nopoumadon in torú-Nea bo nonurub kon kotá in Sion nodapot in noyompat dapot in butá.

YEHEZKIEL 19:12

Táe sia irabut in ḻima mita inta irumogi, onda intua pinogonag kon butá. Tompot in pomukaan nogirup, nogingkag kon bungainea inta mopia. Tanganea noputoḷ, noingkag bo sinurub.

YEHEZKIEL 22:21

Yo, sipunon-Ku in mosia kon Yerusalem, mopoyongkit in tuḷú torú-Ku kon ḻimonag monia, dá iḷoḷayat in mosia.

YEHEZKIEL 38:19

Bo takin totok in tumorú indoyóon-Ku in mosia, kon singgai tatua in mobaḻídon in ḻinug inta motoyang totok kon butá in Israel.

IMAMAT 26:20

Bayongan inta irorigaanmu diádon in mangaḻenea, sin butámu in diá bidon in mangaḻenea bo pangkoi in ayop monimu diábí momungai.

AMOS 5:6

Pobuidon mangoi kon i Tuhan, dá moiko in mobiagbí. Aka moiko mobui mangoi kon i-Nia, Sia in mamangoibí naonda bo tuḷú inta ḷumekep bo momagong kon bayongan intau in Israel. Kon Betel diábí tobatúmai in intau in mokopiong kon tuḷú tatua.

AMOS 7:4

Akuoi in bui nokoontong kon tobatú oontongon nongkon i Tuhan Inta Totok in moḷantud. Inontongku in Sia koyogot in mosadia mohukum kon umat-Nea pongin tuḷú. Tuḷú tatua in ḷumekep kon bayongan in baḷangon kon ḻimonag in butá bo momangkoidon momokak kon gobá in tudunea.

MIKHA 1:4

Buḷud mita ḷumoḷayat kon paḷad in sioḷ-Nea naonda bo lilin kon bonu in tuḷú inta modokot; butánea in moḻitu moibonu kon oyuknea mita, naonda bo tubig kon tudu in tombuḷud inta moiḻig monag.

HABAKUK 3:10

Nokoontongmai kon ini-Mu, buḷud mita in nodandú nongkon ḷangit noḷabú in uyan naonda bo pinopobutak. Tubig kon ḻimonag in butá moboḷontung in singognea, bokoḷnea in molitodanmai bo monomburá.

ZEPANYA 1:18

Kon singgai inta motoyang tatua ki Tuhan in mopoontongbí in torú-Nea, dá bayongan in buḷawan bo saḷaka monia in diábí mokoposaḷamat kon i monia. Sinangkub in dunia in morimumudbí moḷoḷayat tubáan in tuḷú in torú-Nea. Bo daḻi-daḻíbí rabuton-Nea in bayongan nyawa kon butá tanaa.

ZEPANYA 3:8

Táe pokoingat! Oḷatdon in singgainea simindog in Akuoi saḷaku intau inta mopongadu. Sin sinantú-kudon kon modondon kon bangusa mita bo dodatuan mita sin mopoḷabú in torú-Ku kon i monia. Bayongan in butá in modaitbí kaanon in tuḷú torú-Ku.

PINOGIAPAN 16:33

Dá noigonagdon in mosia kobia-biagpa doman kon bonu in dunia intau minatoi takin bayongan kapunyaan monia. Butá inta nobotak tatua nomumbun bo mosia diádon inontong iḻiom in butá.

PINOGIAPAN 16:35

Bo ki Tuhan nopoangoi in tuḷú inta nomokak kon doyowa nogatut bo ḻima nopuḷú in intau inta noposumba in dupa tatua.

MATIUS 10:28

Bo donaaibí moondok kon i monia inta moḻimod kon awak, táe diá inogoian in kawasa morabut kon nyawa. Kotoguondokbí kon i Allah inta kokawasa moḻimod kon awak bo morabut kon nyawa kon bonu in naraka.

MATIUS 18:9

Bo aka matamu mokopopisí kon inimu baradosaan, yo kuil bo ḷumbú. Sin maníka diá in mata tosimpaḷ táe iko in mobiag moyotakin i Allah dika in motompodpa in mata táe pogonag kon bonu in tuḷu in naraka.”

MATIUS 23:33

Ei intau mongoromú moiko in buí in intau moraat! Moiko in diábí mokoḷagui kon pohukuman kon bonu in naraka?

ULANGAN 29:20

Ki Tuhan in diábí mongampung kon intau ná tatua. Táe, Sia in kotugatanbí in torú i Tuhan inta moḷoben, bo bayongan bodito inta pinais kon bonu in buk tanaa in moiumabí kon inia modapot in sia yopúon i Tuhan.

TESALONIKA 2 1:8

bo takin tuḷú inta kodoko-dokot. Sia in mamangoi mohukum kon intau mita inta diá mopirisaya kon i Allah bo inta doí mokidongog kon Habar Mopia i Yesus Kristus ki Tuhan naton.

IBRANI 12:29

Sin ki Allah naton in naonda bo tuḷu inta mokopokak.