ULANGAN 24:17 - Alkitab Singog In Mongondow Masa In Tanaa

¹⁷ Dika mogagow kon hak in intau ango-angoi bo in adí uno-unon, bo dika mogamá kon pakeang in boba-bobay tobatú sin baḻíon jaminan.

ULANGAN 24:17 Mawu Ofanana

AYUB 22:6

Aka ki utatmu bo diá mokouboḻi kon boḻinea, daitonmu agowon in bayongan in ḷambungnea.

AYUB 24:3

Keledai in intau uno-unon, pinoḷagui monia; sapi in intau boba-bobay, ginamá monia nobaḻí tontagú.

IḶUAIAN 22:20

Ki ine in moposumba in kuruban kon inta ilah mita ibanea mako koḻikud in kon i-Nakó, inta Tuhan, yo musti hukumon matoi.

IḶUAIAN 23:2

Dika moibog moyokapog in intau mobarong aka mosia mogaid kon moitaḷá andeka mopotabat in atorang takin mopoyaput in tosingogon inta diá totuu.

IḶUAIAN 23:6

Dika tombogaanmu intau bogá aka monantú kon taḷá.

IḶUAIAN 23:9

Dika mopomia ibo-ibog kon intau ango-angoi; sin kinorasaandon monimu naonda in mobaḻí intau ango-angoi, sin koḻipod moiko nion intau doman ango-angoi kon butá in Mesir.”

AMSAL 31:5

Sin, aka datu monginum kon oinumon mokoḷoḷangu, yo koḻionganneadon in hukum bo hak in intau moyangkó.

MOHOHUTUBA 5:8

Modapot in kobiagan i datu noitogotbí kon bungai in boyó.

YESAYA 1:23

Itoimu mita momomarontak bo nobaḻí ki ata in mononakow; mosia in moibog motarima kon tombuinag bo doit posogó. Mosia in doíbí moduḷu kon uno-unon kon pongadilan; doí mokidongog kon popongaduan in boba-bobay mita.

YESAYA 3:15

Nongonu sin moiko in mondorotbí kon umat-ku bo momakisa mogamá kon kapunyaan in intau bogá? Akuoi, ki Tuhan Inta Totok in moḷantud bo Totok in mokawasa ain noguman.”

YESAYA 33:15

Moiko in mokotahangbí aka moiko in mosingog bo mogaid kon inta totuu. Dika motayak kon untung pongin momakisa mogamá kon intau bogá, bo dika motarima kon doit tondan in pelekara. Dika dumudui kon intau inta monomayá kon poḻimodan andeka aid moraat ibanea.

YEREMIA 22:3

“Pokoadildon bo pokojujur. Poḷuatdon nongkon kawasa in inta monondorot in intau inta dinorot. Dika mondorot andeka mopoaid in moraat kon intau ango-angoi, adí uno-unon, andeka boba-bobay. Dika moḻimod kon intau inta diá kotaḷá kon tampat tanaa.

YEREMIA 5:28

bo moḷongó bo mobiag motompia. Aid monia moraat diá in imbuitnea. Mosia in diábí moadil kon pelekara in adí mita uno-unon, bo diá moduḷu kon hak in intau mita inta dinorot.

YEHEZKIEL 22:29

Intau mita nooyúon monompobaḻik bo mogagow. Pomiaan monia ibo-ibog in intau bogá bo motayak kon kauntungan kon intau ango-angoi.

YEHEZKIEL 22:7

Diábí tobatúmai in intau inta nogutun kon inimu in mohoromat kon guyanganea. Iko in monompobaḻik kon intau ango-angoi bo motayak kon kauntungan nongkon roriga in boba-bobay bo uno-unon.

IMAMAT 19:33

Dika mopoaid in diá mopia kon intau angoi-angoi inta nogutun kon butámu.

MIKHA 7:3

Komintandon mopandoi in mogaid kon inta moraat. Pojabat bo hakim moigum kon doit pompon in bibig, bo tongguḷu in intau mobayong in momakisadon kon koibognea, natuata in yopopog monia moyotakin.

ZAKHARIA 7:10

Dikabí mondorot kon intau boba-bobay, adí uno-unon, intau mita ango-angoi inta nogutun kon yua-yuak monimu, andeka ki ineka in nobiag noyempeng. Bo dika doman monomayá kon moraat kon tumpaḷa intau.’

MALEAKHI 3:5

Guman i Tuhan Inta Totok in mokawasa, “Akuoi in mamangoibí kon inimu sin mohakim. Akuoi in ḷagidon mobaḻí sakusi kon mososihir mita, kon intau mita inta mototuaḻingan, inta noguman kon uboḷ, inta notombogá kon dodai in nobogoi in gaji kon intau inta sinondanan, inta nondorot kon intau boba-bobay, uno-unon, bo intau ango-angoi, bo kon intau mita inta diá mohoromat kon i-Nakó.”

LUKAS 3:14

Oyúon doman in tontara in noḻibó, “Yo aka kami, onu in aidan nami?” Tubag i Yohanes, “Donaai mogagow bo donaai momakisa kon intau poḷat moponapud in inta diá mita totuu. Pakédon in gajimu tontaní!”

ULANGAN 1:17

Aka monantú yo dika mobogat kon toḷosi; musti potongkaion in monantú kon taḷá kon batúan in intau. Dika moondok kon i ineka, sin onu inta sinantú monimu tua in namangoibí nongkon i Allah. Aka pelekara tobatú bo mobogatmu totok tantúon, yo diádon mangoi kon inakó, bain akuoi in monantú kon tua.

ULANGAN 16:19

Kon bonu in mogamá kon kaputusan, mosia in diábí motaau kinotantu-tantúnea ande mobogat kon toḷosi. Mosia in diábí doman motaau motarima kon doit tondan in pelekara, sin tondan in pelekara tua in mokobilog kon intau, nodapot in intau mobijaksana bo mojujur, dá mogamádon kon kaputusan inta diá moadil.

ULANGAN 24:13

táe mustibí pobuionmu kon inia pomuḷoi in doḷom, sinbá motaau pakéonnea pomuḷoi in mosiug. Dá sia in mopoyaputdon in sukur moantó bo iko in koibogdon i Tuhan Allahmu.

ULANGAN 24:18

Toropdon kon moiko in nokoimontandon nobaḻí ata kon Mesir bo pinoḷuai i Tuhan Allahmu; tuamai in akuoi mobogoi in atorang tanaa kon inimu.

ULANGAN 24:6

Aka moiko mopoḷuan in onuka kon intau ibanea, dikabí mogamá kon batu poḷoḻintog in intau tatua kon gandum sin baḻíonmu jaminan. Sin aka gamáanmu in batu tatua, yo moiko in nogagowdon kon onu inta pakéon monia pomiag kon tombonu in baḷoinea.

ULANGAN 27:19

‘Kinutuk in intau inta mogagow kon hak in intau ango-angoi, adí uno-unon bo inta dongka boba-bobay.’ ‘Amin!’

YAKOBUS 2:6

Táe moiko ain noningkuḻe kon intau mita inta nobiag nobogá, bokaka intaubí mita inta nooyúon in mondorot bo mogugut kon i monimu pobayá in pongadilan!