ULANGAN 24:16 - Alkitab Singog In Mongondow Masa In Tanaa

¹⁶ Dika hukumon matoi in intau tatua popisí in aid moraat inta inaidan i adínea, bo dika mohukum matoi kon adí popisí in aid moraat inta inaidan in guyanganea. Batúan intau tongábí motaau hukumon matoi popisí in aidneabí tontaní.

ULANGAN 24:16 Mawu Ofanana

TAWARIKH 2 25:4

Táe ki adí mita in pogawai mita tatua in diábí iḻimodnea sin sia in dinumuduibí kon parenta i Tuhan kon bonu in Buk i Musa inta noguman, “Dika mohukum matoi kon guyanga popisí in aid moraat inta inaidan in adí mita monia, bo dika mohukum matoi kon adí mita popisí in aid moraat inta inaidan in guyanga monia. Batúan intau in tongábí motaau hukumon matoi popisí in aidnea tontaní inta moraat.”

YEHEZKIEL 18:20

Intau inta nomia kon dosa, siabí in matoi. Adí in diábí umuran mobaba kon bungai in aid moitaḷá i amánea; ná doman tua amá in diábí doman mobaba kon bungai in dosa mita i adínea. Intau mopia in mokouḻíbí kon tontuḻí inta mopia popisí in aidnea inta mopia. Bo intau moraat in motarimabí doman kon roriga popisí in aidnea inta moraat.

YEHEZKIEL 18:4

Nyawa in batúan intau in Akuoibí in kitogi, pinomayá nyawa in guyanga andeka nyawa i adínea. Intau inta baradosa siabí in matoi.

DANIEL 6:24

Totok in nopia in gina i datu bo pinarentaneadon sinbá ki Daniel in poḷuaiondon kon angob tatua. Naonda in inaidandon in parenta tatua, noniata magí yo diábí in kekeb topiḻikmai kon i Daniel, sin sia in nopirisaya kon i Allahnea.

PINOGIAPAN 26:11

Táe ki adí mita i Korah diábí in noitakin kinoḻimodan.

SAMUEL 1 22:16

Táe ki datu in noguman, “Ahimelek! Iko bo bayongan in ginaḷummu in mustibí matoi.”