ULANGAN 23:18 - Alkitab Singog In Mongondow Masa In Tanaa

¹⁸ Ná doman tua in doit inta nouḻí kon pinosundaḷan tatua in diábí motaau in diaan kon Baḷoi i Tuhan Allahmu sin poguboḻi kon dandimu, sin kinodoíbí i Tuhan Allahmu in bobay sundaḷ kon kuil mita pososumbaan bo boḻi in pinosundaḷan.

ULANGAN 23:18 Mawu Ofanana

DATU MITA IMITÁNEA 14:24

Kon tampat mita tatua mosia sumundaḷ sin mosumba kon dewa. Nodapot in ḷoḷaki mita mopobayá doman in oaidan nobaḻí sundaḷ. Intau in Yohuda nomia kon bayongan oaidan inta moromú inta pinomia in bangusa mita inta ain pinoguntun i Tuhan kon dodai in intau in Israel tumuotdon kon butá tatua.

MAZMUR 22:16

Sigoḷokku noingkag naonda bo rumog in posilag, diláku notorondódon. Tuhan, sinaḷáan-Mu in akuoi kon tudu in ḷobud nádon onda bo intau inta ain minatoi.

AMSAL 26:11

Ná ungkú inta bui mokaan kon totukanea, natua doman in intau bodok inta mobuimai kon kobobodoknea.

YESAYA 61:8

Ki Tuhan in noguman, “Akuoi in moibog kon inta moadil bo mondoí kon pondorotan bo aid moraat. Akuoi in mobogoibí in tondan pinogaidanmu takin satia, bo motogot kon dodandian mononoi takin i monimu.

YEHEZKIEL 16:33

Sundaḷ tobatú in umuranbí uboḻian, táe noyotoḻikudon intua ikobí in mobogoi in tombuinag kon intau mita inta kinoibogmu, nodapotbí in dondouḷuganmu in mosia in doit sinbá mamangoi nongkon bayongan in tampat bo mosiug takinmu.

IMAMAT 18:22

Ḷoḷaki diábí motaau in mososiugan takin doman ḷoḷaki; kinodoíbí i Allah in oaid natua.

IMAMAT 19:29

Dika mopoompámai in tangoi i adímu mita bobay takin mopobaḻí kon i monia bobay sundaḷ kon kuil. Aka momia kon natua yo moiko in aindon noporomúmai kon butámu, bo oaid mita inta moromú tatua mongawasadon kon tua.

IMAMAT 20:13

Aka intau ḷoḷaki tobatú bo mosiug doman takin ḷoḷaki ibanea tobatú, yo mosia tua ain nomia kon oaid inta moraat bo mokooyá, dá taya dua tua musti hukumon matoi. Mosia in minatoi sin pinopisí in taḷá monia tontaní.

IMAMAT 7:16

Aka intau tobatú modia kon kuruban dodamean sin mogintompod kon dandinea, ande kuruban inta nomuká nongkon ginanea tontaní, diá bidon musti kodaiton kaanon kon singgai doman tatua. Ibanea in motaaubí kaanon mobangon monik.

MIKHA 1:7

Patongnea mita inta mongomahaḷ in rimumudon, bo bayongan in pakakat inta ogoi kon bobay mita inta mopobayá in oaidannea kon kuil in tubáan, takin bayongan in berhalanea in yompaton. Tua mita in nouḻí monia kon pinoibadaannea kon i dewa in koḷumbaan. Tanaa bayongan intua akutondon in musungnea mita sin posumbadon mobaḻí sukur kon dewa mita monia.”

HABAKUK 1:13

Táe naondabí sin Iko in mokotahangbí in moindoi mako kon intau mita moraat bo moḻingá tatua? Kinotaauanku kon Iko in noiḻiubí kon motusi in moindoi kon aid moraat! Kinotaauanku kon mototukabí in Iko in mokoontong kon aid diá moadil! Dá, nongonu sin Iko in tongábí kibio-biómai kon tungkuḷ in intau motoḷutui irimumud in intau moraat?

MALEAKHI 1:14

Binaḷadon in ki inta motombuḻitok inta noposumba kon i-Nakó in biag inta diá mopia, bo inta munadon nopodandi in biag mopia kon sigad in biagnea mita sin posumba kon i-Nakó! Sin Akuoibí in ki Datu Inta Moḷantud, bo ihoromat in bayongan in bangusa.”

MATIUS 7:6

Donaaidon moiko mobogoi in barang inta mokudus kon ungkú. Bo donaai moiko mopogarab in mutiaramu kon boké, sinbá diá tongá rita-ritakannea mako intua bodongka mobuimai moyingki-yingkit kon i monimu.”

ULANGAN 12:6

Kon tampat tatuata in podiaan monimu kon kuruban payongon takin kuruban mita ibanea, sosumba mopuḷú noporosenmu takin sosumba mita ibanea, kuruban poguboḻi kon dandimu, kuruban ibogmu tontaní bo adí in sapi bo bembé dombamu inta muna pinogadí.

ULANGAN 22:21

dá bobay tatua in musti diaan kon tayowon in baḷoi in guyanganea. Kon tampat tatua ḷoḷaki mita nongkon kotá tatua musti mogandur in batu kon bobay tatua dapot in matoi. Bobay tatua ain nogaid kon inta mokooyá kon bangusa naton sin nosiugdon takin ḷoḷaki kon dodai in diápa pinobuḷoi kon dodai in sia nogutunpa kon baḷoi i amánea. Aid monimu tatua monginggamá kon aid moraat tatua.

ULANGAN 23:21

Aka moiko nopodandi in onuka kon i Tuhan Allahmu, dikabí in umuran momaḷu-maḷui kon wakutu in mogintompod kon dandi tatua, sin umuranbí tuntuton i Tuhan Allahmu intua, bo baradosaanbí in moiko aka diá intompodan monimu intua.

PILIPI 3:2

Mokopoingatdon kon i monia inta umuran mogaid kon inta diá mopia, mosia inta motaaudon tangoion ‘ungkú’. Mosia inta umuran momakisa kon bá sunatondon mita in bayongan intau.

PETRUS 2 2:22

Singog moiduduimai naa noyokaan totok in oaid monia tua, “Ungkú mokaanbí bui kon totukanea, bo boké inta ain ininggúan kinodarit buibí doman in sia mayá ḷumobong kon bonu in yoná.”

WAHYU 22:15

Táe intau mita inta nogaid kon soaḷ mita inta moromú, inta moibog monggaing, bo intau mita inta mogaid kon soaḷ mita inta mokotor, inta moḻimod, mosumba kon berhala, bo intau mita inta mouboḷ, pinomayá tosingogon ande oaid, komintan intau natua, kon ḷuai in kotá in tampatnea.