ULANGAN 15:19 - Alkitab Singog In Mongondow Masa In Tanaa

¹⁹ “Adí in sapi bo bembé domba koḷakian inta muna pinogadí mustibí posumba kon i Tuhan Allahmu. Sapi tatua in diábí motaau in pakéon pomajeko, bo domba in diábí motaau in gonsingan.

ULANGAN 15:19 Mawu Ofanana

IḶUAIAN 13:12

moiko in musti moposumba in adí monimu ḷoḷaki inta guya-guyang bo bayongan bobiagon koḷakian inta muna pinogadí. Tua komintan ki Tuhan in kitogi,

IḶUAIAN 13:2

“Posumbadon in bayongan adí ḷoḷaki inta guya-guyang kon i-Nakó. Bayongan in adí ḷoḷaki guya-guyang Israel, bo bayongan in bobiagon koḷakian inta muna pinogadí, tua in Akuoi in kitogi.”

IḶUAIAN 22:29

Kon wakutu inta ain sinantú, pobogoibí in sosumba kon i-Nakó inta nongkon boyó in gandummu, ande in anggurmu bo ḷana in zaitunmu. Posarakaidon kon i-Nakó in ki adí monimu mita ḷoḷaki inta guya-guyang,

IḶUAIAN 22:30

ná doman tua in sapi bo domba koḷakian inta muna pinogadí. Pomayádon mako in mahaḷuk mita tatua takinpa ki inánea kon bonu in pitu nosinggai koonggotnea, bodongka posarakandon kon i-Nakó kon singgai noginwaḷu.

IḶUAIAN 34:19

Bayongan adí ḷoḷaki inta guya-guyang bo bobiagon koḷakian inta muna pinogadí tua in Akuoibí in kitogi,

IMAMAT 27:26

Biag inta muna pinogadí in mobaḻíbí kapunyaan i Tuhan, dá diábí motaau posumba mobaḻí kuruban ibog tontaní. Adí in sapi, adí in domba ande adí in bembé inta muna pinogadí in kapunyaanbí i Tuhan.

PINOGIAPAN 18:15

Bayongan inta muna pinononggadí kon sigad in intau andeka bobiagon inta pinosumba in intau Israel kon i-Nakó, tua in nobaḻí silaimu. Táe musti tobuton monimu in adímu mita inta guya-guyang, bo adí mita in bobiagon inta haram inta pinogadí muna.

PINOGIAPAN 18:17

Táe sapi, domba bo bembé inta muna pinogadí, in diábí motaau tobuton. Bobiagon tatua in sinantú bidon kon i-Nakó bo musti pokuruban. Pobutak in dugúnea kon mezbah bo ḷongónea in tubádon mobaḻí kuruban. Ronginginea mokosanang kon gina-Ku.

SURAT I PAULUS KON JAMAAT RUM 8:29

Mosia inta ain piniḻí i Allah, aindon sinantú-Nea nongkon pinomangkoianmai sinbá mobaḻí motombatangan i Adí-Nea ki Yesus Kristus. Sahingga in Adí tatua mobaḻí Adí guya-guyang kon sigad in bayongan utat.

ULANGAN 12:11

Onda intua ki Tuhan Allahmu momiḻí kon tampat tobatú inta motaau posumbaan kon i-Nia. Kon tuata in musti monimu bayáan bo modia kon bayongan inta ain pinogumanku, tuata in kuruban payongon bo kuruban mita ibanea, sosumba mopuḷú noporosen bo sosumba inta pinonangoi inta pinodandimu kon i Tuhan.

ULANGAN 12:17

Kon tampat pogogutunanmu diábí motaau in moiko mokaan kon sosumba mopuḷú noporosen nongkon gandummu, anggurmu, ḷana zaitunmu, sapi ande bembé dombamu inta muna pinogadí, kuruban poguboḻi kon dandimu, kuruban ibogmu tontaní ande sosumba ibanea.

ULANGAN 14:23

Kon tayowon i Tuhan Allahmu, kon tampat inta piniḻí-Nea, inta mobaḻí tampat pooibadaan, moiko musti mokaan kon sosumba mopuḷú noporosen nongkon gandum, tubig in anggur, ḷana in zaitun takin adí in sapi bo adí in bembé dombamu inta muna pinogadí. Aidai intua sinbá umuran in moiko mobalajar mohoromat kon i Tuhan Allahmu.

ULANGAN 15:18

Aka moiko mopoḷuat in ata tobatú, dika momanasaḷ, sin kon bonu in onom notaong sia ain notuḷung kon oaidanmu takin tongá tongobotak in gaji in bobantung tobatú. Aidaidon in parenta tatua, dá ki Tuhan Allahmu in momarakatbí kon bayongan inta aidanmu.”

ULANGAN 16:11

Kon tayowon i Tuhan Allahmu, kon tampat inta piniḻí-Nea, moiko musti moposanang in gina moyotakin i adímu mita, bobantungmu mita bo intau in Lewi, intau ango-angoi, adí uno-unon bo intau mita inta dongkadon boba-bobay inta nogutun kon kotámu mita.

ULANGAN 16:14

Pobarasanangdon takin i adímu mita, in bobantungmu mita, in intau in Lewi, intau ango-angoi, adí uno-unon bo inta dongka boba-bobay mita inta nogutun kon kotámu mita.

IBRANI 12:23

Moiko in sinumakin kon tobatú pinoyodungkuḷan inta morame totok – pinoyodungkuḷan in adí mita guya-guyang i Allah, inta pinaisdon in tangoi monia kon bonu in soroga. Moiko in namangoi sinumayow kon i Allah hakim in bayongan intau naa. Moiko in sinumayow kon roho mita intau mopia inta ain sinompurna.