ULANGAN 12:7 - Alkitab Singog In Mongondow Masa In Tanaa

⁷ Kon tua doman, kon tayowon i Tuhan Allahmu, moiko moyotakin in motoḷuadímu musti mongaan takin ḷunganga in gina sin bayongan inta iramujimu oyúon in mangaḻenea sin binarakatan i Tuhan Allahmu.

ULANGAN 12:7 Mawu Ofanana

TAWARIKH 1 29:22

Kon singgai tua mosia in nongaan bo nonginum takin pia in gina kon tayowon i Tuhan. Bo kon induaneadon in mosia nopotaau kon ki Salomo in nobaḻí datu. Pinodoyon kon tangoi Tuhan, mosia in nopobaḻídon kon inia nobaḻí datu monia bo ki Zadok in nobaḻí imang.

NEHEMIA 8:9

Nokodongogmai kon pinobacaan kon Hukum tatua, pinongoibu in rayat bo poḷat nongombaḷ. Dá ki gubernur Nehemia bo ki Imang Ezra inta nonotaau totok in Hukum tatua bo intau mita in Lewi inta noginsilang kon Hukum tatua, noguman kon bayongan in rayat nanaa, “Singgai naa in singgai inta mokudus kon i Tuhan Allahmu, dá dikadon pongoibúon andeka mongombaḷ.

MOHOHUTUBA 3:12

Kinotaauanku kon i naton in diábí in moiḻiu in pia koḻikudbí in moḷunganga in gina bo motarima kon onu in oyúon kinoouput in kinobiagan naton.

MOHOHUTUBA 3:13

Mopia-piabí kon kita komintan mongaan bo monginum poḷat mokaan kon onu in siniḷopían naton. Tua in ki Allahbí in nobogoi.

MOHOHUTUBA 5:18

Aka intau tobatú motarima kon kaoyúonan bo kapunyaan nongkon i Allah, bo sia in inogoian in wakutu mopomaké in kaoyúonan tatua, mustibí in sia moibog mosukur bo mopomaké in bayongan inta siniḷopíannea. Tua in ki Allahbí doman in nobogoi.

YESAYA 23:18

Kauntungan bo boḻi in pinogaidan inta nouḻínea in diábí tagúonnea, táe posumbaneabí kon i Tuhan. Intau mita inta nosumba kon i Tuhan in mopomakébí in doit tatua sin potaḷui kon kaanon bo pakéon kon inta paraḷu monia.

YESAYA 62:9

Táe moikobí inta nosipun kon bungai in boyónea, in mokaan kon bungainea bo modayow kon Tuhan; bo moiko in nosipú kon bungai in anggur, in monginumbí kon tubignea kon bosí in Baḷoi-Ku.”

YEHEZKIEL 44:3

Táe mongongawasa inta nomarenta in motaaubí mayá in bonawang tatua sin mokaan kon kaanon motusi kon tayowon-Ku. Sia in mustibí tumuot mongin yuang moḷoben bo mobui mongin tua doman.”

YOËL 1:16

Kokaanon in nodaitdon noyompat kon tayowon in mata naton kon Baḷoi i Allah naton diádon in giow pia in gina.

YOËL 2:26

Tugatbí in kaanon kon i monimu bo mokorasabí kon mobotug. Ki Tuhan Allahmu in pomuliaanbí monimu, sin nobayong in inta mokoherang in inaidan-Nea kon inimu. Umatku in diá bidon motaau in tososingkuḻe mako!

IMAMAT 23:40

Kon singgai dungkuḷ tua moiko in musti mosipú kon bungai in boyómu kon gobámu mita, bo dáun doman mita in palem bo tanga mita in kayu inta norubombong, bo pangkoidon in ramean inta nobaḻí singgai pia in gina sin mohoromat kon i Tuhan Allahmu.

MALEAKHI 2:13

Bo naa in aidmu inta ibanea. Mezbah i Tuhan in pinuḻingandon monimu in ḷuá; moiko in nongombaḷ bo mogamui sin ki Tuhan in doídon kon kurubanmu mita.

OUMAN IN RASUL MITA 2:46

Pomuḷoi in singgai mosia in moyosipun kon Baḷoi Tuhan; mosia mongaan doman moyotakin kon baḷo-baḷoiannea. Tua komintan inaidan monia takin pia in gina bo takin doman dodia inta moompá.

ULANGAN 12:12

Kosanangdon in gina kon tayowon i Tuhan Allahmu, takin adímu mita, bobantungmu mita bo intau mita in Lewi inta nogutun kon kotámu mita, sin intau mita in Lewi diá nokouḻí kon tonsilai kon butámu.

ULANGAN 12:18

Moiko bo adímu mita, moyotakin in bobantungmu mita bo intau mita in Lewi inta nogutun kon kotámu, musti mokaan kon sosumba tatua kon tayowon i Tuhan Allahmu, kon tampat inta piniḻí i Tuhan Allahmu. Bo kon tampat tatua moiko musti moḷunganga in gina sin bayongan onu inta iramujimu.

ULANGAN 12:8

Aka wakutu tatua moiangoidon, yo donaaidon ná tanaa in oaid monimu. Umaaipa in tanaa mako moiko moibada kinooibogbí in ginamu,

ULANGAN 14:23

Kon tayowon i Tuhan Allahmu, kon tampat inta piniḻí-Nea, inta mobaḻí tampat pooibadaan, moiko musti mokaan kon sosumba mopuḷú noporosen nongkon gandum, tubig in anggur, ḷana in zaitun takin adí in sapi bo adí in bembé dombamu inta muna pinogadí. Aidai intua sinbá umuran in moiko mobalajar mohoromat kon i Tuhan Allahmu.

ULANGAN 14:26

Potaḷuidon in doit tatua kon onu in koibog monimu – sapi ande bembé domba, tubig in anggur ande oinumon inta mokoḷoḷangu – bo kon tampat tatua, kon tayowon i Tuhan Allahmu, moiko motoḷuadí musti mongaan moyotakin bo moposanang in gina.

ULANGAN 15:20

Pomuḷoi in taong moiko tobaḷoian musti mokaan kon tapúnea kon tayowon i Tuhan Allahmu, kon tampat inta piniḻí i Tuhan.

ULANGAN 26:11

Posukurdon sin bayongan rijiki inta ain inogoi i Tuhan Allahmu kon inimu bo tombonu in baḷoimu. Anutaidon in intau in Lewi bo intau ango-angoi inta nogutun kon sigad monimu tumakin kon porayaan tatua.

ULANGAN 27:7

Posumbadon doman in kuruban dodameanmu bo kaandon kon tua takin koḷunganga in gina kon tayowon i Tuhan Allahmu.

ULANGAN 28:47

Moiko aindon binarakatan i Tuhan Allahmu kon bayongan yagi-yagi, táe doí mogundoi kon i-Nia takin gina motuḻid bo moḷunganga.

PILIPI 4:4

Kosanangdon in gina monimu sin ain nopirisaya bo nobiag notobatú takin i Tuhan. Buipa doman pogumanku: kosanangdon in ginamu!