ULANGAN 12:14 - Alkitab Singog In Mongondow Masa In Tanaa

¹⁴ táe tongábí kon tampat inta piniḻí i Tuhan kon butá in sukumu tobatú. Tongábí kon tua in musti poposumbaan monimu in kuruban payongon bo mogaid kon oaidan mita ibanea inta pinarentaku kon inimu.

ULANGAN 12:14 Mawu Ofanana

DATU MITA IMITÁNEA 8:29

Poigumon mako singgai doḷom Iko moḷukad kon baḷoi tanaa inta ain piniḻí-Mu nobaḻí tampat pososumbaan kon ini-Mu. Igumon mako nongkon tampat pogogutunan-Mu kon soroga Iko mokidongog bo mongampung kon inakó takin umat-Mu aka kami mamangoi tumayow kon baḷoi tanaa bo mosambayang kon ini-Mu.

DATU MITA 2 18:22

Noiduduimai kon tua porwira in Asyur tatua in noguman, “Andeka degá moiko in mosingog kon moiko in moharap mako kon i Tuhan, Allahmu? Kon dodai in ki Hizkia nomarenta kon bá intau in Yohuda bo Yerusalem in tongá bidon moibada kon tayowon in mezbah kon Yerusalem, yo inta iyompatnea tua in mezbah bo tampat mita posumbaan kon i Tuhan tontaní.

TAWARIKH 1 22:1

Dá ki Daud in noguman, “Kon tampat tanaa in mustibí posindogon in Baḷoi Tuhan Allah. Bo kon mezbah tanaadon intau in Israel musti moposumba in kuruban payongon kon i Tuhan.”

MAZMUR 5:7

Yopúon-Mu in intau mita inta moibog monguboḷ. Mopopak bo moḷoḻimod mobú in Iko in mokoontong.

MAZMUR 9:11

Intau inta nonotaau kon ini-Mu mogoḷat mako kon ini-Mu, o Tuhan, intau inta mosumba kon ini-Mu diábí taḷaan-Mu.

IMAMAT 17:3

Aka intau tobatú nongkon bangusa Israel moposumba in sapi, domba ande bembé kon i Tuhan, mahaḷuk tatua musti ratáannea kon tayowon ngara in Ḷoḷaigan i Tuhan. Aka ratáannea kon tampat ibanea, yo noḷawangdon in sia kon hukum sin nopobutakdon in dugú. Sia in diá bidon iapon anggota in umat i Allah.

KORINTUS 2 5:19

Kami nopotaau kon ki Kristus in binaḻí bidon i Allah tonsigad sinbá intau in motaaudon mamangoi moyodame takin-Nea. Tua komintan inaidan i Allah sin diá bidon pinononggina-Nea mako in bayongan taḷá inta ain inaidan in intau kon i-Nia. Bo Siabí doman tua in nobogoi in oaidan kon inami mopoyaput in habar mita tatua.

ULANGAN 12:11

Onda intua ki Tuhan Allahmu momiḻí kon tampat tobatú inta motaau posumbaan kon i-Nia. Kon tuata in musti monimu bayáan bo modia kon bayongan inta ain pinogumanku, tuata in kuruban payongon bo kuruban mita ibanea, sosumba mopuḷú noporosen bo sosumba inta pinonangoi inta pinodandimu kon i Tuhan.

ULANGAN 12:13

Moiko in diábí motaau moposumba in kurubanmu kon bayongan tampat inta piḻíon monimu tontaní,

ULANGAN 12:15

Táe motaaubí in moiko moratá kon bobiagonmu bo mokaan kon tapúnea kon ondakabí in pinogutunanmu. Moiko in motaaubí in mokaan dapot in komampuan monimu kaanon in bayongan inta inogoi i Tuhan Allahmu kon inimu. Pomuḷoi in intau pinomayá inta nodarit ande inta nonajis, motaaubí in mokaan kon ponoyá tatua, ná doman tua moiko motaau mokaan kon tapú in kijang ande tapú in rusa.

ULANGAN 12:18

Moiko bo adímu mita, moyotakin in bobantungmu mita bo intau mita in Lewi inta nogutun kon kotámu, musti mokaan kon sosumba tatua kon tayowon i Tuhan Allahmu, kon tampat inta piniḻí i Tuhan Allahmu. Bo kon tampat tatua moiko musti moḷunganga in gina sin bayongan onu inta iramujimu.

ULANGAN 12:5

Nongkon bayongan butá in suku in mita Israel, ki Tuhan Allahmu in momiḻíbí kon tampat tobatú sinbá bangusa naton motaau mamangoi in tayowon-Nea bo mosumba kon i-Nia.

ULANGAN 14:23

Kon tayowon i Tuhan Allahmu, kon tampat inta piniḻí-Nea, inta mobaḻí tampat pooibadaan, moiko musti mokaan kon sosumba mopuḷú noporosen nongkon gandum, tubig in anggur, ḷana in zaitun takin adí in sapi bo adí in bembé dombamu inta muna pinogadí. Aidai intua sinbá umuran in moiko mobalajar mohoromat kon i Tuhan Allahmu.

ULANGAN 15:20

Pomuḷoi in taong moiko tobaḷoian musti mokaan kon tapúnea kon tayowon i Tuhan Allahmu, kon tampat inta piniḻí i Tuhan.

ULANGAN 16:2

Bayádon kon tampat inta piniḻí i Tuhan kon porataan kon tobatú bembé domba ande sapi mobaḻí sosumba Paska sin mohoromat kon i Tuhan Allahmu.

ULANGAN 17:8

Aka oyúon in pelekara inta diá motaau putuson in hakim mita kon tua sin totuu mororiga, umpamanea pelekara poḻimodan inta sinuod ande diá sinuod, bobayowan soaḷ kapunyaan ande mositompaḻían kon awak, yo moiko in mustibí mayá kon tampat inta piniḻí i Tuhan Allahmu.

ULANGAN 18:6

Aka intau in Lewi inta nongkon kotá ondaka kon Israel mamangoi kon tampat inta piniḻí i Tuhan bo moibog mogutun kon tua,

ULANGAN 31:11

Moiko in mustibí mobaca kon hukum mita tanaa koḷangonon kon tayowon in intau mita in Israel inta mamangoi mosumba kon i Tuhan Allahmu kon tampat inta piniḻí-Nea.

IBRANI 13:15

Tuamai potonsigad naton kon i Yesus, kita in musti umuran modayow kon i Allah; tua in nobaḻí kuruban sukur naton kon i-Nia, inta pinosumba naton pinongin singog in bibig sin mopomulia kon tangoi-Nea.

YOSUA 22:29

Popirisayadon, kami in doíbí moḷawang kon i Tuhan ande mogogai mogundoi kon i-Nia takin modugang kon mezbah ibanea sin pobogoian kon kuruban payongon ande kuruban gandum ande pobogoian kon sosumba, bokaka mezbah i Tuhan Allah naton oyúondon kon tayowon in Ḷoḷaigan koangoian i Tuhan.”

YOSUA 9:27

Táe mosia tua in binaḻí ata – mononiai kon kayu bo mononangkob kon tubig pakéon in intau in Israel bo pakéon kon mezbah i Tuhan. Nodapotpabí in tanaa mosia umuranpabí nogaid kon oaidan tatua kon tampat inta piniḻí i Tuhan nobaḻí tampat pooibadaan kon i-Nia.