ULANGAN 12:12 - Alkitab Singog In Mongondow Masa In Tanaa

¹² Kosanangdon in gina kon tayowon i Tuhan Allahmu, takin adímu mita, bobantungmu mita bo intau mita in Lewi inta nogutun kon kotámu mita, sin intau mita in Lewi diá nokouḻí kon tonsilai kon butámu.

ULANGAN 12:12 Mawu Ofanana

DATU MITA IMITÁNEA 8:66

Kon singgai noginwaḷu pinotabádon i Salomo nobui in intau mita tatua. Mosia komintan in nodayow kon inia bodongka nobui kon baḷoi monia takin pia in gina, sin bayongan in barakat inta ain inogoi i Tuhan kon mogogundoi-Nea ki Daud bo kon bangusa Israel umat-Nea.

TAWARIKH 2 29:36

Dá nosanangdon in gina i Datu Hizkia bo rayatnea sin kon bonu in wakutu notoyong ki Allah ain nogaid kon tua komintan.

NEHEMIA 8:9

Nokodongogmai kon pinobacaan kon Hukum tatua, pinongoibu in rayat bo poḷat nongombaḷ. Dá ki gubernur Nehemia bo ki Imang Ezra inta nonotaau totok in Hukum tatua bo intau mita in Lewi inta noginsilang kon Hukum tatua, noguman kon bayongan in rayat nanaa, “Singgai naa in singgai inta mokudus kon i Tuhan Allahmu, dá dikadon pongoibúon andeka mongombaḷ.

MAZMUR 147:1

Dayowdon in ki Tuhan! Sin mopiabí totok in modayow kon i-Nia, bo mokosanangbí in mopodondong in dondong dodayow kon i-Nia!

IMAMAT 23:40

Kon singgai dungkuḷ tua moiko in musti mosipú kon bungai in boyómu kon gobámu mita, bo dáun doman mita in palem bo tanga mita in kayu inta norubombong, bo pangkoidon in ramean inta nobaḻí singgai pia in gina sin mohoromat kon i Tuhan Allahmu.

PINOGIAPAN 18:20

Ki Tuhan noguman doman kon i Harun, “Moiko in diábí mokouḻí kon tonsilai onu bo onu. Kon butá inta pinodandi-Ku tua diábí in tobonsigmai in butá in mobaḻí kapunyaanmu. Akuoi, ki Tuhan, in nobaḻí tonsilaimu.”

PINOGIAPAN 18:26

mopotaau in parenta tanaa kon intau in Lewi: Aka moiko motarima nongkon intau in Israel kon mopuḷú noporsen inta inogoi i Tuhan kon inimu mobaḻí silaimu, yo moiko in musti mobogoi in mopuḷú doman noporsen kon i Tuhan inta mobaḻí sosumbamu inta sinondímu.

YOHANES 13:8

“Donaai, Tuhan,” guman i Petrus kon i Yesus, “donaaibí mokoimontanmai Tuhan mondarit kon sioḷku!” Táe ki Yesus in notubag, “Aka diá daritan-Ku iko, yo iko in diábí mokouḻí kon tonsilai nongkon i-Nakó.”

OUMAN IN RASUL MITA 8:21

Diá motaau iko in dumudui mogaid takin nami, sin diá motuḻid in ginamu kon i Allah.

ULANGAN 10:9

Tuamai suku in Lewi diá nokouḻí kon butá tonsilai ná suku mita ibanea, sin ki Tuhanbí tua in tonsilai warisan monia, ná inta pinoguman i Tuhan Allahmu kon i monia.)

ULANGAN 12:18

Moiko bo adímu mita, moyotakin in bobantungmu mita bo intau mita in Lewi inta nogutun kon kotámu, musti mokaan kon sosumba tatua kon tayowon i Tuhan Allahmu, kon tampat inta piniḻí i Tuhan Allahmu. Bo kon tampat tatua moiko musti moḷunganga in gina sin bayongan onu inta iramujimu.

ULANGAN 12:19

Ḷukadai sinbá diá modapot in moiko mopomayá mako in kaum Lewi moiḷaḻe kon bonu in moiko mogutun kon butá tatua.

ULANGAN 12:7

Kon tua doman, kon tayowon i Tuhan Allahmu, moiko moyotakin in motoḷuadímu musti mongaan takin ḷunganga in gina sin bayongan inta iramujimu oyúon in mangaḻenea sin binarakatan i Tuhan Allahmu.

ULANGAN 14:29

Kaanon tatua in ogoibí kon intau in Lewi sin mosia in diá kobutá, bo kon intau ango-angoi, adí uno-unon bo inta dongka boba-bobay inta nobiag kon kotámu mita. Mosia in motaaubí in mamangoi mogamá kon bayongan inta paraḷuon monia. Aka aidan monimu in natua, dá ki Tuhan Allahmu in momarakatbí kon bayongan onu inta inaidanmu.”

ULANGAN 16:11

Kon tayowon i Tuhan Allahmu, kon tampat inta piniḻí-Nea, moiko musti moposanang in gina moyotakin i adímu mita, bobantungmu mita bo intau in Lewi, intau ango-angoi, adí uno-unon bo intau mita inta dongkadon boba-bobay inta nogutun kon kotámu mita.

ULANGAN 16:14

Pobarasanangdon takin i adímu mita, in bobantungmu mita, in intau in Lewi, intau ango-angoi, adí uno-unon bo inta dongka boba-bobay mita inta nogutun kon kotámu mita.

ULANGAN 18:6

Aka intau in Lewi inta nongkon kotá ondaka kon Israel mamangoi kon tampat inta piniḻí i Tuhan bo moibog mogutun kon tua,

ULANGAN 26:11

Posukurdon sin bayongan rijiki inta ain inogoi i Tuhan Allahmu kon inimu bo tombonu in baḷoimu. Anutaidon in intau in Lewi bo intau ango-angoi inta nogutun kon sigad monimu tumakin kon porayaan tatua.

ULANGAN 26:12

Pomuḷoi in taong nogintoḷu moiko in musti mobogoi in sosumba mopuḷú noporosen, tuata in mopuḷú noporosen nongkon bungai in boyó kon butámu kon imang Lewi, intau ango-angoi, adí uno-unon bo inta dongkadon boba-bobay, dá kon bonu in bayongan kotámu mosia mokouḻí kon kaanon inta paraḷuon monia. Aka mopaḷutdon,

ULANGAN 27:7

Posumbadon doman in kuruban dodameanmu bo kaandon kon tua takin koḷunganga in gina kon tayowon i Tuhan Allahmu.

YOSUA 13:14

Suku in Lewi in diá nokouḻí kon tonsilai butá nongkon i Musa, sin ki Tuhan ain noguman kon i Musa kon tonsilai in suku Lewi tua in nongkon kurubanbí mita inta sinubá kon mezbah inta inogoi kon i Tuhan Allah Israel.

YOSUA 13:33

Táe suku Lewi in diábí nokouḻí kon butá topiḻikmai nongkon i Musa. Ki Musa in noguman kon i monia kon inta mobaḻí tonsilai monia in kurubanbí mita inta pinosumba kon i Tuhan Allah in Israel.