TITUS 1:15 - Alkitab Singog In Mongondow Masa In Tanaa

¹⁵ Bayongan in yagi-yagi in nodaritbí aka kon intau mita inta nodarit in raian. Táe aka kon i monia inta raian mokotor bo inta diá mopirisaya kon i Tuhan, yo diábí in tobatúmai in modarit, sin raian bo gina monia in komintan domandon mokotor!

TITUS 1:15 Mawu Ofanana

AMSAL 21:4

Intau moraat tatua in binaradosa, popisí in kinawasa in dodia bo ḷoḷatúnea.

AMSAL 30:12

Oyúon in intau in tumangoi motusi in sia bokaka totokbí in moromú in sia.

HAGAI 2:13

Onda intua ki Hagai in noḻibó bui, “Aka kuma bo oyúon in intau inta nobaḻí nonajis popisí in noḻiai kon mayat, bo onda intua sia in noḻiai kon tobatú kokaanon tatua, yo degá kaanon tatua in mobaḻídon monajis doman?” Imang mita in notubag, “Oo, notantú bidon!”

MATIUS 15:18

Táe onu in siningog monimu tua in komintanbí nongkon bonu in gina; bo tuatabí inta mokonajis kon intau.

OUMAN IN RASUL MITA 10:15

Táe bui oyúon in singog in dinongog noguman, “Onu inta aindon sinantú i Allah motaau kaanon, dikabí anggapon monimu haram intua.”

SURAT I PAULUS KON JAMAAT RUM 14:14

Popisí in akuoi bo notobatúdon i Tuhan Yesus, dá mopirisayabí totok in akuoi kon diábí in tobatúmai monajis. Soaḷ tatua najis podudui intau tobatú, aka tua inanggapnea najis.

SURAT I PAULUS KON JAMAAT RUM 14:20

Ḷukadaibí sinbá diá tongá soaḷ kokaanon, iko momoguyaat kon onu inta ain inaidan i Allah. Komintan kaanon diábí in pinoton, motaaubí modait kaanon, táe aka onu in kinaanmu tua mokopopisí kon intau ibanea baradosaan, dá iko in kotaḷá.

SURAT I PAULUS KON JAMAAT RUM 14:23

Táe intau inta moondo-ondok in mokaan kon onu inta motaau kaanon, tongá pangabisannea in nokaan doman kon kaanon tatua, yo potaḷáan i Allah in sia, sin tua inaidannea diá pinodoyon kon koyakinannea soaḷ onu in noitutui bo onu inta noitaḷá. Onuka in aidan takin diá podoyon kon koyakinan yo dosabí intua!

KORINTUS 1 10:23

Kain intau, “Kita in motaaubí mogaid kon onukadon in kino ibog naton.” Totuubí doman! Táe onu in aidan naton tua, diábí komintan baraguna. “Kita in motaaubí in mogaid kon onukadon in kinoibog naton” – táe onu in kinoibog naton tua, diábí komintan mokobiag kon i naton.

KORINTUS 1 10:25

Moiko in motaaubí in mokaan kon onukabí in pinotaḷui kon pasar in ponoyá. Kumudungbí in motaḷui, dikabí morai kon yagi-yagi umpaka oyúon in mokobogat mita kon bonu in ginamu.

KORINTUS 1 10:31

Onukabí in aidan monimu – pinomayá kaanon ande inumon – yo aidaibí komintan takin mopoyaput in sukur kon i Allah.

KORINTUS 1 8:7

Umpaka natua, táe diábí komintan intau in nonotaau kon soaḷ tatua. Sin umaaipa doman masa in tanaa oyúonpa in umuran mosumba kon berhala mita. Tuamai oyúonpa doman in raian kon kaanon inta ain pinosumba kon berhala in kaanonbí doman in berhala. Manangka intua aka kaanon monia in kaanon tatua yo porasaan monia in baradosaanbí in mosia; tua komintan popisíbí in diápa noguyang in pirisaya monia.

TIMOTIUS 1 6:5

bo umuran moyogenggeng. Raian in intau mita natua ain nobangkung bo diádon motaau pirisayaanmai. Inanggap monia in agama naa in motaaubí potayakan kon kauntungan tontaní.

IBRANI 10:22

Tuamai, koḻigai dimiugdon in kita kon i Allah takin gina motuḻid bo totu-totuudon mopirisaya sin gina naton in dinaritandon nongkon raian mita inta mongoraat, bo awak naton in dinaritan domandon in tubig inta modarit totok.

IBRANI 12:15

Ḷukadaibí sinbá diá tobatúmai in intau ḷumuai nongkon kobiagan inta pinodoyon kon totabi i Allah, sinbá diá in mobaḻí rasum inta mokopomuká kon ropatoi bo inta mokogoguyaat kon kobiagan intau mobayong.

IBRANI 9:14

Dá aka dugú bo ḷobud mokodarit kon onu inta nokotor kon intau mita tatua, yo bambíkabí dugú i Kristus! Pinongin Roho inta diá mato-matoi, ki Kristus ain noposumba in awak-Nea tontaní kon i Allah saḷaku kuruban inta nosompurna. Tuabí in nondarit kon gina naton nongkon upacara mita inta diá in baragunanea, sinbá kita umuran mosumba kon i Allah inta nobiag.