TESALONIKA 1 5:11 - Alkitab Singog In Mongondow Masa In Tanaa

¹¹ Tuamai umuranbí positongginaan bo mosirigonan kon gina ná inta biasamai aidan monimu.

TESALONIKA 1 5:11 Mawu Ofanana

SURAT I PAULUS KON JAMAAT RUM 14:19

Tuamai koḻigai bá tayakon naton onu inta mokopoangoi kon dodamean bo mosibiagan.

SURAT I PAULUS KON JAMAAT RUM 15:14

Utatku mita! Moyakinbí in akuoi kon totokbí in mobayong inta mopia in nion kon i monimu. Moiko nion in nonotaaubí doman kon bayongan in yagi-yagi bo mokomampubí doman mositongginaan.

SURAT I PAULUS KON JAMAAT RUM 15:2

Mustibí in kita moposanang doman in gina i utat naton, sin kopiaan doman monia, bá koyakinan monia in modugang doman moropot.

KORINTUS 1 10:23

Kain intau, “Kita in motaaubí mogaid kon onukadon in kino ibog naton.” Totuubí doman! Táe onu in aidan naton tua, diábí komintan baraguna. “Kita in motaaubí in mogaid kon onukadon in kinoibog naton” – táe onu in kinoibog naton tua, diábí komintan mokobiag kon i naton.

KORINTUS 1 14:12

Natua doman in moiko, kinotaauankubí kon moiko in moibogbí doman moramuji motayak kon totabi mita nongkon Roho i Allah. Tongá mopia totok aka moiko moramuji doman mopobaraguna in totabi mita tatua sin pobangon kon jamaat sinbá mobiag.

KORINTUS 1 14:29

Aka oyúon in habar nongkon i Allah in poyaput intau doyowa toḷu, yo musti poyaput, yo intau ibanea in musti mokidongog bo raion kopiaan onu in pinoguman monia tua.

KORINTUS 1 14:5

Mopiabí doman in ginaku aka moiko in motaau moposingog in bahasa inta mokoherang. Táe mopia-piabí kon motaau mopoyaput in habar nongkon i Allah. Sin intaubí inta motaau mopoyaput in habar nongkon i Allah in moponti-ponting nongkon intau inta nonotaau kon bahasa inta mokoherang; koḻikudbí in aka kotaauannea in mangaḻe in bahasa tatua, sahingga in komangaḻean doman in jamaat intua bo modugang morigon in pirisaya monia.

KORINTUS 2 12:19

Motaaubí singogon nami kon noonggot bidon moiko in umuran nosangka mako kon i nami, kon kami tantú mobela kon oaid nami inta diá mopia kon tayowon monimu. Kon tayowon i Allah bo kinotaauanbí i Kristus. Kami moguman kon i monimu, kon bayongan naa, uḻe, utat mita inta kinotabiku, inaidan nami naa lantaranbí bá mobiag bo modugang in pirisaya monimu.

EPESUS 4:12

Mosia naa in inogoi i Allah sinbá umat i Allah tokotompiaan sinbá mosia in motaau mogaid kon oaidan i Tuhan bo moduḷu moposindog in awak i Kristus.

EPESUS 4:16

Kon bonu in pimpinan-Nea bayongan in anggota in awak tatua nopipid notompia noyotondoḷ in ugat bo buk mita in tuḷan. Bo aka kon batúan in anggota mita tatua in mogaid podudui in oaidannea dá bayongan awak in mobiagbí moguyang bo moropot bo kototabi.

EPESUS 4:29

Aka mosingog in moiko yo dika mosingog kon inta moraat, singogdon in onu inta mokobaraguna moginropot kon pirisaya bo singog mita tonggina inta motaau potuḷung kon intau ibanea. Sin singog mita inta baraguna in mokopoangoi kon kopiaan kon i monia inta mokodongog.

TESALONIKA 1 4:10

Bo tua komintan aindon pinoontong monimu kon bayongan utat inta kon Makedonia. Táe, tantúbí tongginaan nami in moiko sinbá modugang motompia in kobobiag monimu.

TESALONIKA 1 4:18

Tuamai in pakédon in singog tanaa kon mosirigonan kon gina in tumpaḷa utat.

TIMOTIUS 1 1:4

Poguman kon i monia kon donaaibí tongá umuran monarukiramai kon ouman mita inta diá totuu bo soaḷ ouman kinobaḻian inta diá in gogainea. Tua komintan in tongábí mokopomuká kon ropatoi inta diá in baragunanea bo deemanbí inta mokobiag motompia podudui in kasaḷamatan inta inogoi i Allah kon intau inta mopirisaya kon i-Nia.

IBRANI 10:25

Kita in musti umuran moyosipun moyotakin bo umuran mosambayang. Donaai mokopomaḷat ná intau ibanea. Mustibí doman umuran in kita mositongginaan, sin kinotaauan bidon naton kon diá bidon moonggot bo mamangoi bui in ki Tuhan.

IBRANI 3:13

Manangka intua bá diá tobatúmai in kon sigad monimu in kotombodokan in aid inta moraat bo moḷawangdon kon i Allah, dá umurandon positongginaan in moiko pomuḷoi in singgai wakutu in tumpaḷapa nobiag kon masa inta sinangoian kon Buk Motusi “Singgai in Naa”.

PETRUS 2 1:12

Tuamai tantú ponoropku intua kon i monimu, umpakabí kinotaauandon monimu, sinbá moiko in mopirisayadon totok kon totundú nongkon i Allah inta ain sinarima monimu tatua.

YUDAS 1:20

Táe moiko, utatku mita, tompiabí saḷaḷu in kobobiagmu podudui in pirisayamu kon i Yesus Kristus. Pirisaya inta totok in modarit. Bo posambayangdon takin kawasa in Roho i Allah,