TAWARIKH 2 33:14 - Alkitab Singog In Mongondow Masa In Tanaa

¹⁴ Onda intua ki Manasye in noginḷantud kon dinding in ḷuai inta kon dotá in pomukaan kon Kotá i Daud. Pinangkoinea nongkon tampat tobatú kon ḷopá kon diug in bokaká in Gihon bo minayá ná utuan nodapot in Bonawang Toyá bo dotá in kotá inta sinangoi Opel. Kon batúan in kotá inta dininding kon Yohuda, sinampatnea doman in tobatú tongguḷu totokan in tontara.

TAWARIKH 2 33:14 Mawu Ofanana

DATU MITA IMITÁNEA 1:33

ki datu in noguman kon i monia, “Oinídon in porwiraku mita bo bayádon kon i Salomo adíku ḷoḷaki poyotakin monia. Popotakoidon in sia kon bagalku tontaní, bo diádon in sia kon bokaká in tubig in Gihon.

DATU MITA IMITÁNEA 1:45

bo ki Zadok takin ki Natan ain noduí kon inia kon bokaká in tubig in Gihon. Tanaa mosia in nobuidon kon kotá sindaḷan morogiow morame, bo bayongan in kotá modoḻiok. Tuata in rame inta dinongog monimu koina.

TAWARIKH 2 17:19

Mosia tuata inta nopobayá in oaidan monia kon Yerusalem. Koḻikud intua, ki datu in nokiḷukad doman kon pinonobatúan mita ibanea kon dinding mita kon butá in Yohuda.

TAWARIKH 2 27:3

Ki Yotambí inta noposindog in Bonawang Utuan kon Baḷoi Tuhan, bo noginrigon kon dinding in Yerusalem kon butá inta sinangoian Opel.

TAWARIKH 2 32:30

Ki Datu Hizkia tuata inta nodimpot kon bokaká in tubig in Gihon, bo pinobayá pinongin daḷan in tubig kon ḻimonag in butá pinobayá in kotá in Yerusalem. Bayongan inta inaidan i Hizkia noḷapatbí.

TAWARIKH 2 32:5

Bo ki datu in noginropot kon poḷoḷukadan in kotá pinongin nonompia kon dindingnea, noposindog in ḷangkeang mita kon tudunea bo noposindog in dinding ibanea kon ḷuai. Koḻikud intua nonompia doman in sia kon dinding inta pinosindognea kon tudu in butá inta pinomumbun kon dotá in pomukaan kon dotá in Yerusalem koyongan. Nopotabá doman in sia nokiaid in nobayong totok in pandong bo kaḻeaw.

NEHEMIA 12:39

Bo kami in nongin Bonawang Epraim, Bonawang Koyongan, Bonawang Toyá, Ḷangkeang Hananeel bo Ḷangkeang Mea noidapot kon Bonawang Domba. Pipidan nami in nogogai kon diug in Bonawang Poḷoḷukadan kon diug in Baḷoi Tuhan.

YESAYA 32:14

Nodapot in komaḻig in taḷaan bo ki iná in kotá inta morame mobaḻídon moingongow. Buḷud bo ḷangkeang mita poḷoḷukadan sinondodaidon in butá modapot in mononoi. Keledai mita ḻindong bo domba mita in modondaḷoi magí mako kon tua bo mokaan kon bonok kon tua.

ZEPANYA 1:10

“Kon singgai tatua,” natuata in guman i Tuhan, “kodongoganbí in ombaḷ kon Bonawang in Toyá. Singog in amui in kodongoganbí nongkon ḻipú mobagu, bo singog in koumpagan inta motoyang in modoradá mako in kon tombuḷud mita.