TAWARIKH 2 30:17 - Alkitab Singog In Mongondow Masa In Tanaa

¹⁷ Nobayong in nongkon sigad in intau inta kon tua in diápa nopotusi in awak, dá mosia in diábí motaau moratá kon domba sin pakéon kon kuruban in Paska. Tuamai intaudon mita in Lewi in nogaid kon tua kon i monia bo noposumba kon i Tuhan.

TAWARIKH 2 30:17 Mawu Ofanana

TAWARIKH 2 29:34

Imang mita inta ain nopotusi in awak monia in noyakag dá diá nokodait nonaip kon bayongan in biag tatua. Tuamai mosia in binantungan in intau mita in Lewi, sin intau in Lewi in mosati-satia kon atorang in potusian. Mosia in tantúbí nobantung nodapot in tugatdon in imang inta ain nopotusi in awak.

IḶUAIAN 12:6

Biag tatua in tagúonpa monimu kon tua dapot in tanggal mopuḷú bo opat. Kon singgai tatua, moḷolabungmai bayongan umat Israel musti moratá kon ki adí in domba tatua.

YEHEZKIEL 44:11

Kon bonu in Baḷoi-Ku, mosia in tongábí motaau in mogundoi kon i-Nakó saḷaku mobobantung kon oaidan bo moḷukad kon bonawang. Mosia in motaaubí in moratá kon mahaḷuk mita inta mobaḻí kuruban payongon bo posumba, bo mosia in mustibí umuran mobantung kon umat.

PINOGIAPAN 9:7

bo noguman, “Kami naa in nonajis sin ain nokadai kon intau minatoi. Táe nongonu sin kami in diábí ogoi moposumba in kuruban kon i Tuhan moyotakin in utat mita nami?”

YOHANES 11:55

Wakutu intua motoyongdon Singgai in Paska intau Yahudi. Nobayongdon intau nongkon ḻipu-ḻipúannea in minayádon in Yerusalem sin mopobayá in adat pondaritan kon awak kon wakutu in diápa singgai porayaan tatua.