TAWARIKH 1 29:17 - Alkitab Singog In Mongondow Masa In Tanaa

¹⁷ Kinotaauankubí kon Iko in monungkuḷ kon gina in intau kon batúannea bo kinoibog-Mu in intau inta motuḻid in ginanea. Takin gina nobayag bo pia in gina posumbaku in naa komintan kon ini-Mu. Akuoi in nokoontongdon tontaní kon naonda in umat-Mu inta noyosipun kon naa nodia kon sosumba monia kon ini-Mu takin pia in gina.

TAWARIKH 1 29:17 Mawu Ofanana

TAWARIKH 1 28:9

Bo ki Daud in noguman kon i Salomo nanaa, “Adíku, igumonku sinbá ki Allah inta sinumba i amámu, in akuonmu nobaḻí ki Allahmu. Iko in mustibí mogundoi kon i-Nia takin ḻimbatúon in gina bo gina mobayag. Sin kinotaauan-Neabí in bayongan raian bo ibog naton. Aka iko motayak kon i-Nia, yo mouḻímubí in Sia, táe aka iko monaḷámai kon i-Nia, yo indoíon-Nea bidon in iko modapot in mononoi.

TAWARIKH 1 29:16

Oo Tuhan, Allah nami, bayongan in pakakat inta koboḻi naa in sinipun nami kon naa sin moposindog in baḷoi tobatú kon ini-Mu sinbá kami in motaaudon mohoromat kon tangoi-Mu inta motusi. Táe tua komintan in sinarimabí nami nongkon ini-Mu tontaní bo kapunyaan-Mubí doman.

TAWARIKH 1 29:18

Oo Tuhan Allah, inta sinumba i Abraham, i Ishak bo i Yakub, mogoguyang nami, igumon mako ḷukadan-Mu mako sinbá umat-Mu tantú motabi kon ini-Mu ná tanaa mako bo tuḷungaidon sinbá mosia in umuran mosatia kon ini-Mu.

TAWARIKH 1 29:9

Rayat in nobogoibí takin pia in gina kon i Tuhan bo noḷunganga in gina sin nobayongdon in pinosumba monia. Nosanang domandon totok in gina i Datu Daud.

TAWARIKH 2 6:30

yo igumon mako Iko nongkon tampat pinogutunan-Mu kon soroga moibogpa kaasí mokidongog bo mongampung kon i monia. Tongábí Iko in monotaau kon bonu in gina in intau. Tuamai in popoaidon kon intau podudui kon aid mita monia,

MAZMUR 15:2

Intau inta nobiag diá in bogit bo nogaid kon inta mopia, bo takin gina motuḻid moguman kon inta totuu;

MAZMUR 17:3

Aka ujion-Mu in ginaku bo mamangoi monaridi kon inakó kon dodai in doḷom, yo mouḻí-Mubí kon motuḻid in ginaku; onu in siningogku noitombutungbí kon onu in iraiku.

MAZMUR 51:6

Tongábí kon ini-Mu, tongábí kon ini-Mu binaradosa in akuoi, bo pinomiaku in onu inta inanggap-Mu moraat. Dá patusbí hukumon-Mu in akuoi, moadilbí in pononantú-Mu.

MAZMUR 51:8

Iko in monuntut kon kototuḻid in gina; pogonúaidon in ginaku in hikmat-Mu.

MAZMUR 7:9

Iko in mohakim kon umat intau; pobayádon in inta moadil, o Tuhan, sin diábí kotaḷá in akuoi.

AMSAL 11:20

Ki Tuhan in doíbí kon intau inta gina moraat, táe Sia in motabibí kon intau inta nobiag diá in bogit.

AMSAL 16:2

Bayongan aid in intau degá mopiabí in ontongonnea tontaní, táe ki Tuhanbí in noindoimai kon bonu in ginanea.

AMSAL 17:3

Buḷawan bo saḷaka in ujionbí kon tuḷú, táe gina in intau in ujionbí i Tuhan.

AMSAL 21:2

Bayongan aid in intau degá mopiabí in kon bonu in raiannea tontaní, táe ki Tuhanbí in moindoi kon makusud in ginanea.

YEREMIA 17:10

Akuoi, ki Tuhan monaridi kon gina, bonu in dodob in intau ujion-Ku kon batúan in intau tuḻían-Ku podudui in dodianea, bo aidan-Ku podudui in oaidnea.”

YOHANES 1:47

Inontong i Yesus in ki Natanael namangoi, dá ki Yesus in noguman nanaa soaḷ ki Natanael tua, “Indoiai, tua in intau in Israel motuḻid, diábí in uboḷ kon ginanea!”

OUMAN IN RASUL MITA 24:16

Tuamai akuoi in umuran moramuji totok sinbá ginaku in umuran modarit kon tayowon i Allah bo kon tayowon in intau.

KORINTUS 2 1:12

Noḷunganga totok in gina nami, sin noyakin bidon in kami kon kobobiag nami kon dunia naa – apapa doman hubungan nami bo i monimu – tantúbí nami sinompia takin gina motuḻid bo nobayag. Tua komintan in inaidan nami, deemanbí pinodoyon kon kapandoian raian in intau, táe pinodoyonbí kon ropot inta pinonotabi i Allah.

KORINTUS 2 9:7

Táe poigumonku mako moiko mobogoibí takin pia in gina, diá tongá pakisa, sin intaubí inta mobogoi takin pia in gina in kotabi i Allah.

ULANGAN 8:2

Toropdon! Opat nopuḷú notaong koonggotnea in ki Tuhan Allahmu nodia kon i monimu kon bonu in binayáan moyayú sinumaḻib kon padang gurun. Binayáan tatua imakusud i Tuhan monungkuḷ kon i monimu, sinbá koontongan-Neadon onu in kon bonu in ginamu bo indoian-Nea mongo moiko mokopotoindudui kon parenta-Nea mita.

TESALONIKA 1 2:10

Motusi in kobobiag nami, mobanar bo diá in yagi-yagi inta diá mopia in inaidan nami kon i monimu inta ain nopirisaya kon i Kristus. Inontong bidon monimu tontaní in kami bodongka bidon ki Allah in nonotaau kon tua komintan.

PILEMON 1:20

Manangka intua, podoyon kon tangoi i Tuhan tuḷungaipa in akuoi, posanangpa in ginaku saḷaku Utat inta tumpaḷa notobatú i Kristus.

PILEMON 1:7

Uḻe Pilemon utatku, tabimu kon bayongan in umat i Allah, nokosanangdon totok kon ginaku bo nokodugang domandon kon ropot in pirisayaku! Bayongan in gina in umat i Allah in pinosanangmudon.

IBRANI 4:12

Sin pirman i Allah tatua in singogbí inta nobiag bo moropot bo Siabí in moḷani-ḷanit nongkon pitow inta doyowa in matanea. Singog tatua in tumurak nodapot in nopoyotondí in jiwa bo roho; boḻikatog bo tuḷan bobubuton, sahingga in kotaauanneadon totok in raian bo niat in intau.

WAHYU 2:23

Dumoduduinea mita in ḻimodon-Kubí doman sinbá kotaauandon in bayongan jamaat kon Akuoibí naa in Sia inta nonotaau kon raian bo gina intau. Bo moiko in tuḻían-Kubí podudui in aid monimu tontaní.

SAMUEL 1 16:7

Táe ki Tuhan noguman kon i Samuel, “Dikabí in iko koakaḷan in pogotnea inta moḷunat bo awaknea inta moḷantud; deemanbí sia in kinoibog-Ku. Deemanbí ná poyoyindoi in intau in poyoyindoi-Ku. Intau in moindoi kon batangannea, táe akuoi in moindoibí kon ginanea.”