SAMUEL 2 18:26 - Alkitab Singog In Mongondow Masa In Tanaa

²⁶ moḷoḷukad tatua nokoontong kon oyúonpa doman in intau tobatú in namangoi sindaḷan doman moribatuk. Dá nomaḷú bui in sia, “Indoiai! Oyúonpa doman in intau ibanea inta noribatuk doman tontaní.” Ki datu in notubag, “Tantú nodiabí doman in sia kon habar inta mopia.”

SAMUEL 2 18:26 Mawu Ofanana

SAMUEL 2 18:25

Moḷoḷukad tatua in nomaḷú monag nopotaau intua kon i datu, bo ki datu in noguman, “Aka sia tontaní, yo notantú bidon kon habar mopia in dinianea.” Naonda in intau tatua motoyongdon moyaput,

SAMUEL 2 18:27

Moḷoḷukad tatua in noguman, “Intau inta muna tatua in ki Ahimaas. Kinotaauanku nongkon pororibatuknea.” “Sia in intau mopia,” guman i datu, “tantú nodiabí in sia kon habar mopia.”

DATU MITA 2 7:10

Tuamai in nobuidon in mosia kon Samaria bo nomaḷú kon moḷoḷukad kon bonawang in kotá, “Minayádon in kami kon pinononḷoḷaigan in intau in Siria, bo noniata magí diá bidon in intau in kon tua. Kabaḷo bo keledai monia kinobayáanmai nami in noitogotpabí mako kon pototogotannea, bo ḷoḷaigan mita in tongádon sinaḷáan mako natua.”