SAMUEL 2 18:17 - Alkitab Singog In Mongondow Masa In Tanaa

¹⁷ Onda intua mayat i Absalom binuat bo pinogonag kon bonu in parigí inta moonag kon kayuon. Parigí tatua binumbunan monia in batu nodapot in kinoḷantud. Bayongan tontara in Israel noḷagui nobui kon baḷoinea-baḷoinea.

SAMUEL 2 18:17 Mawu Ofanana

SAMUEL 2 19:5

Ki Yoab minayá kon tayowon i datu bo noguman, “Kon singgai in naa ki Tuang Datu in nokopooyámai kon intau i Tuang Datu, bokaka mosiadon tua in noposaḷamat kon nyawa i Tuang Datu, nyawa in adí ḷoḷaki bo bobay i Tuang Datu, i buḷoi inta sinonibuḷoi bo inta diá sinonibuḷoi i Tuang Datu.

SAMUEL 2 19:8

Onda intua sinimindogdon in ki datu bo iḻumuai, bo iḻimitú kon diug in ngara. Intaunea mita nokodongogdon kon sia in kon tua, bo namangoidon in mosia komintan kon tayowonnea. Bo kon dodai intua bayongan in tontara in Israel noḷaguidon mita, bo nobuidon kon baḷoinea-baḷoinea.

SAMUEL 2 19:9

Kon bonu in bayongan suku in Israel nomukádon in bobayowan. Guman monia, “Ki Datu Daud ain noposaḷamat kon inaton nongkon intau in Pilistin bo nopoḷuatdon kon inaton nongkon musung mita ibanea, táe tanaa in sia in noḷaguidon kon i Absalom bo nonaḷámai kon butá tanaa.

SAMUEL 2 20:1

Kon Gilgal oyúon in intau mononuyayow tangoinea in ki Seba. Ki adí i Bikri in sia, nongkon suku in Benyamin. Kon dodai in ki Daud bo intaunea mita namangoi, nogirup in ki Seba kon torompet bo nomaḷú, “Diábí in tondoḷ naton bo i Daud. Onubí in mangaḻenea dumudui in kita kon inia? Ei intau mita in Israel, koḻigai mobui in kita!”

SAMUEL 2 20:22

Bo minayádon in sia takin mokaḻet nopotaau in makusudnea kon intau inta nogutun kon kotá tatua. Nopaḷut mako kon tua uḷu i Seba pinongkó bo pinogambat kon i Yoab. Onda intua nogirup in ki Yoab kon torompet bo intaunea mita in nonaḷámaidon kon kotá tatua bo nobuidon kon baḷoinea-baḷoinea. Ki Yoab in nobuidon kon Yerusalem bo minayá kon tayowon i datu.

DATU MITA 2 14:12

Tontara in Yohuda in sinaḷow bo bayongan in tontaranea noḷagui bo nobui kon baḷoinea-baḷoinea.

DATU MITA 2 8:21

Tuamai, iḷumuaidon in ki Yehoram takin bayongan in kereta in parangnea nopobayá ná Zair. Kon tua kinopung in sia in tontara in Edom, táe naonda in nodoḷom monag sia takin tongguḷu totokan in tontara inta sinumakoi kon kereta nondangat kon kopungan in musung, bo tontara mita monia in noḷagui poḷat nobui kon baḷoinea-baḷoinea.

AMSAL 10:7

Monanob kon intau mopia in mobaḻíbí barakat, táe intau moraat in baḷúdon koḻiongan.

ULANGAN 21:20

Mosia in mustibí moguman kon guhanga mita tatua, ‘Adí nami naa motogat in gina, moibog moḷawang bo doí dumudui kon i nami, sia moibog mopomia ibo-ibog kon doit bo monginum dapot in moḷoḷangu.’

ULANGAN 21:21

Bo intau mita ḷoḷaki kon kotá tatua musti mogarab in batu kon adí tatua modapot in matoi. Aid natua moponiata kon moiko in monginggamá kon aid moraat. Bayongan in intau kon Israel in mokodongogdon kon tua bo angoiandon in ondok.”

YOSUA 10:27

Kon dodai in mata in singgai sinumoyop, podudui in parenta i Yosua, mayat mita tatua pinopoponag bodongka binayá pinogonag kon bonu angob inta pinogadopan monia koina. Onda intua batu mita moḷoben pinopotaḷob kon bibig in angob tatua. Umaai in tanaa batu mita tatua kon tuapa doman.

YOSUA 7:26

Nopaḷut mako kon tua binumbunandon monia in tampat tatua in batu inta mobarong totok bo dapot in tanaa oyúonpa doman intua. Tuamai in tampat tatua in sinangoianpa Ḷopá in Roriga. Dá noobotdon in torú i Tuhan.

YOSUA 8:29

Datu in kotá tatua in binambé kon oigi tobatú, bo pinomayá mako nodapot in ḷoḷabungnea. Kon dodai in mata in singgai sinumoyop, pinoki gamádon i Yosua in mayat tatua bo iḷumbú kon tayowon in ḷoḻingkop moḷoben in kotá. Onda intua tampat tatua binumbunan in batu inta mobarong totok. Batu mita tatua umuranpabí oyúon nodapot in tanaa mako.

SAMUEL 1 4:10

Onda intua noparangdon totok in intau in Pilistin bo poḷat nonaḷow kon intau in Israel. Intau in Israel noḷagui minayá in ḷoḷaigannea-ḷoḷaigannea. Totuu moḷoben in kinotaḷowan tatua: aindon 30.000 in tontara in Israel in minatoi.