PETRUS 2 3:16 - Alkitab Singog In Mongondow Masa In Tanaa

¹⁶ Kon bayongan surat i Paulus tua mita umuranbí pinaisnea. Bo totuubí kon oyúon in tongonumai nohal kon suratnea mita in mororiga totok komangaḻean in bonunea tua. Bo inta mororiga totok komangaḻean tatua, sinokotuui in intau mita inta diá nonotaau kon onu bo onu bo inta diá noroton in pirisayanea. Soaḷ mita tatua in diá bidon mokoherang, sin bonupa in Buk Motusi ramujion doman monia pomiaan natua. Tongá oaid monia tatua in mokoboditobí doman kon i monia tontaní.

PETRUS 2 3:16 Mawu Ofanana

KINOBAḺIAN 49:4

Iko in mogampang moḻimbok naonda bo tubig, sahingga in deemandon iko inta totok in moponting; sin iko ain nosiug takin i buḷoiku inta bobantung tua, kinotoranmudon tosiugan i amámu.

DATU MITA IMITÁNEA 10:1

Datu bobay kon butá in Syeba nokodongogdon kon habar soaḷ ki Salomo. Dá namangoi in sia kon Yerusalem sin monungkuḷ kon i Salomo takin nobogoi in tangkí mita inta mongobogat raion.

MAZMUR 56:5

Akuoi in nodayow kon i Allah popisí in onu inta pinodandi-Nea; akuoi in mopirisaya kon i-Nia, dá diá moondok in akuoi, diábí mokopongonu in intau kon inakó.

IḶUAIAN 23:2

Dika moibog moyokapog in intau mobarong aka mosia mogaid kon moitaḷá andeka mopotabat in atorang takin mopoyaput in tosingogon inta diá totuu.

IḶUAIAN 23:6

Dika tombogaanmu intau bogá aka monantú kon taḷá.

YEREMIA 23:36

Mosia in diá bidon motaau momaké in istila ‘bobabaan i Tuhan.’ Aka oyúonpa in momaké in istila tatua, yo baḻíon-Ku in koyow-Ku totu-totuu mobaḻí bobabaannea. Intau inta noguman ‘bobabaan i Tuhan’ tongábí monuui kon tosingogon-Ku, Allah monia, Allah inta nobiag, Tuhan Inta Totok in mokawasa.

HABAKUK 1:4

Hukum in diá pinandungmai bo inta moadil in diábí pinosindog. Intau moraat in moiḻiu kon intau inta mojujur, dá inta moadil in poyotuuion.

MATIUS 15:3

Táe ki Yesus notubag kon i monia, “Nongonu sin moiko in diábí doman dumudui kon parenta i Allah, tongá popisí in adat in mogoguyang?

MATIUS 15:6

yo intau tatua in diá bidon patus mohoromat kon guyanganea. Aka oaid monimu bo natua, yo inanggap monimu in Pirman i Allah in diádon baraguna sin popisí in adatmu tontaní in mobara-baraguna.

MATIUS 22:29

Ki Yesus in noguman kon i monia nanaa: “Moiko nion noitaḷá in pororai monimu, sin diá kinomangaḻean monimu in bonu in Buk Motusi, bo kawasa i Allah.

ULANGAN 16:19

Kon bonu in mogamá kon kaputusan, mosia in diábí motaau kinotantu-tantúnea ande mobogat kon toḷosi. Mosia in diábí doman motaau motarima kon doit tondan in pelekara, sin tondan in pelekara tua in mokobilog kon intau, nodapot in intau mobijaksana bo mojujur, dá mogamádon kon kaputusan inta diá moadil.

PILIPI 3:19

Intau mita natua in moputúbí, sin tuhan monia in sianbí monia, bo aid monia inta moromú tua duíonbí monia; sin tongábí bonu in dunia naa in umuran raion monia.

IBRANI 5:11

Nobayongpabí in musti popotaau nami kon i monimu in soaḷ kadudukan i Yesus saḷaku Imang Moḷoben, táe moyoyiga totok in moginsilang kon tua sin moḷaḷoi totok in pororai monimu.

PETRUS 1 1:1

Utatku mita umat inta piniḻí i Allah, inta noibaya-bayá mako kon butá in Pontus, Galatia, Kapadokia, Asia bo Bitinia! Akuoi, ki Petrus, rasul i Yesus Kristus in mopoigum mako sinbá ki Allah mobogoi in barakat bo kobiagan motompia kon i monimu. Moiko in piniḻí nobaḻí umat i Allah podudui in tomayá i Allah, Amá naton. Roho i Allah nopobaḻídon kon i monimu umat inta mokudus, inta mobiag bo tongá mosumba kon i Allah, sinbá moiko in tongá motoindudui kon i Yesus Kristus bo potusion in dugú-Nea.

PETRUS 1 2:8

bo “Tuata in batu inta nobaḻí kopopintudan in intau, batu inta mokopopisí kon i monia moḷabú.” Mosia in moipintud sin mosia diá mopirisaya kon singog i Allah. Natuabí in sinantú i Allah kon i monia.

PETRUS 2 2:1

Koḻipod kon sigad in umat i Allah, oyúondon in intau mita inta mongaku nabi, táe deemanbí in mosia tua totuu nabi. Natuabí doman in mobaḻí kon sigad monimu, moiangoibí intau mita inta mongaku guru, táe onu inta tundúon monia tua in diábí totuu. Mosia in motundú kon uboḷ, sahingga intau inta mopirisaya kon i monia in mokouḻí kon hukuman. Bo mosia tua diá mopirisaya kon mongongawasa inta ain nopobebas kon i monia. Aid monia natua in mokobodito kon i monia tontaní, bo tua in diádon moonggot in moiantug kon i monia.

PETRUS 2 2:14

Mosia tua in diábí mogoga-gogai in mogaid kon dosa, bo totok moibog in mosia motayak kon bobay inta monakaḷ. Bo intau mita inta diápa noroton in pirisaya monia modait tongganutan monia. Gina monia tua in noibiasa bidon moturá. Mosia tua in binutung bidon!

PETRUS 2 3:14

Manangka intua, Uḻe utatku mita inta kinotabiku, wakutu in moiko mogoḷatpa mako kon koangoian in Singgai tatua, yo poramujibí totu-totuu sinbá mobiag modarit takin diábí in mokotor kon tayowon i Allah. Bo ḷukadaibí in hubungan mopia takin i Allah.

PETRUS 2 3:2

Bo umuranku doman anjuron mako sinbá tantú monorop kon onu inta ain pinoguman in nabi mita i Allah tungkuḷ intua bo moponorop doman mako kon parenta i Tuhan bo i Datu Mopoposaḷamat, inta ain pinotaau in rasul mita kon i monimu.

YUDAS 1:4

Sin diá kinotaa-taauanmai, naanta oyúon bidon in intau mita ibanea inta umuni-uni mako bo sinumuot kon yua-yuak naton. Mosia tua in intau mita moraat inta mopoyotuuy in habar soaḷ totabi i Allah naton. Makusud monia tua in motayakbí kon kasampatan mopoaid in onu inta kinoibog in awak monia. Mosia tua in diá mopirisaya kon ki Yesus Kristus tua in mongongawasa bo Tuhan naton. Nongkon tungkuḷpabímai hukuman kon i monia tua aindon pinotaau muna kon bonu in Buk Motusi.