PETRUS 2 2:14 - Alkitab Singog In Mongondow Masa In Tanaa

¹⁴ Mosia tua in diábí mogoga-gogai in mogaid kon dosa, bo totok moibog in mosia motayak kon bobay inta monakaḷ. Bo intau mita inta diápa noroton in pirisaya monia modait tongganutan monia. Gina monia tua in noibiasa bidon moturá. Mosia tua in binutung bidon!

PETRUS 2 2:14 Mawu Ofanana

AYUB 31:7

Aka kuma bo akuoi in sinumabatdon kon daḷan inta moitutui, andeka ginaku noibogdon kon inta mokotor, aka ḻimaku bo nogaidon kon dosa,

AYUB 31:9

Aka kuma bo akuoi in nokoimontandon nongibog kon i buḷoi in topodiugku, bo umado-adop mako, sinarapku in sia kon ḻikud in ḷoḻingkop,

AMSAL 5:6

Diá motantú in sia kon daḷan inta mopobayá in kobiagan; diá kinotaa-taauannea mako kon sia in sinumabatdon kon daḷan tatua.

AMSAL 6:25

Dika in iko koakaḷan monia in koḷunat monia, dika moitontong kon mata monia inta modondouḷug.

YESAYA 1:16

Daritaidon in awakmu kodariton totok. Gogaiai in bayongan inta moraat inta inaidan monimu tua. Dikadon bui mogaid kon inta moraat,

YESAYA 34:5

Ki Tuhan ain nosadia kon pitow-Nea kon soroga, bo tanaa pitow tatua in moiantug kon bangusa in Edom inta ain pinopoḷabúan in hukuman bo yopúondon.

YESAYA 65:20

Ki adínea mita diábí in matoi kon tungkuḷ mointokpa, bo intau mogurang mokodapotbí kon umur moḷanggó. Intau inta umur mogatut notaong in inanggapbí nobagupa, bo inta minatoi noiuna kon tua in inanggap kinotugatan in hukuman-Ku.

YEREMIA 13:23

Motaau degá in intau morondí momaḷui kon kuḻitnea, andeka harimau monginggamá kon baḷangnea? Notantúbí kon diá! Natuabí doman in moiko inta aid moraat noipakédon yo diábí domandon inta mogaid kon inta mopia.

YEHEZKIEL 13:18

bo potaaudon in onu in inta poguman-Ku, ki Tuhan Inta Totok in moḷantud kon i monia: ‘Moboditodon in moiko! Moiko in mopoḷutud kon bayongan intau in ḻingkit mita ajimat bo koḷob mita in uḷu inta mosakti sinbá mosia inta nomaké in natua mokokawasa kon kobiagan in intau ibanea. Moiko in moibog mongawasa kon kobiagan bo kopatoian in umat-Ku, bo kawasa tatua in pakéon monimu potayak kon kauntunganmu tontaní.

MATIUS 12:34

Ei moiko buí inta moromú, naondabí in moiko motaau mosingog kon soaḷ mita inta mopia aka moiko tontaní in mogaid doman kon inta diá mopia? Sin onu siningog in bibig tuabí doman inta iḷumuai nongkon bonu in gina!

MATIUS 23:14

Koboditodon in moiko, mototundú mita kon agama bo intau mita in Parisi: Moiko in intau mita inta mongomunapik. Moiko monguboḷ kon intau mita inta dongkadon boba-bobay bo mogagow kon baḷoi monia. Moiko in mosambayang koḷanggo-ḷanggóon sin ponaḷob kon oaid monimu inta moraat tatua. Tuamain hukuman i Allah kon i monimu in pastibí kon moboga-bogat nongkon intau ibanea!]

MATIUS 25:41

Bo Sia in noguman doman kon i monia inta kon dotá in koḷoigi-Nea, ‘Bayádon in moiko nongkon tayowonku, sin moiko in intau mita inta binaḷa! Bayádon bo tuotdon kon bonu in tuḷu inta diá mopio-piong sin tua in sinadia in Ibilis bo malaekatnea kon i monimu!

MATIUS 5:28

Táe Akuoi in moguman kon inimu: pomuḷoi in intau inta mokobobuimai kon bobay tobatú bo moibog kon inia, yo sia tua aindon nonuaḻing takin bobay tatua kon bonu in ginanea.

MARKUS 13:22

Sin ki inta deeman totu-totuu mopoposaḷamat bo ki inta deeman doman totu-totuu nabi in mamangoibí. Mosia in mogaid doman kon soaḷ mita inta diá in poḻiuan, bo soaḷ mita inta mokoherang sin ponguboḷ, bo aka oyúon in kasampatan yo mopoyaying doman kon umat mita i Allah.

YOHANES 5:44

Naondabí in kopopirisaya monimu aka moiko tongábí motayak kompé dayowon in intau ibanea, diábí moramuji sinbá dayowon i Allah inta totobatú tua?

SURAT I PAULUS KON JAMAAT RUM 16:18

Sin intau mita inta momia kon natua, deemanbí mogaid sin kopontingan i Kristus inta Tuhan naton, táe tongábí motayak kon kasanangan in gina monia tontaní. Dondouḷug bo singog monia moaḷus inta kodongogan tua in tongábí pakéon monia monguboḷ kon intau mita inta diápa nonotaau in onu bo onu.

KORINTUS 1 11:19

Tongá oyúonbí doman in pianea kon tua, sinbá koontongandon in intau inta totu-totuu nobaḻí Keresten.

EPESUS 2:3

Koḻipod, kita komintan in ná doman mosia tua; kita nobiag dinumudui doman kon tabiat in awak naton bo nogaid kon onu inta mokosanang kon awak bo raian naton. Wakutu intua kita naa in intaubí doman inta kinotugatan in torú i Allah, ná doman mosia tua.

EPESUS 4:14

Dá kita in diábí naonda bo mongoadí mita inta pinoyaying magí-mako in noyagi-yagimai in totundú in intau mita inta mongomunapik. Mosia tua in mongonguman kon diá totuu sin mopotaḷá kon onu inta noitutui.

KOLOSE 2:18

Donaaibí pomayá mako monimu in porugionmai in intau mita inta ki ubo-uboḷmai inumompá kon dodia bo inta mosumba kon malaekat mita. Intau tatua in moḷoḷatú takin raiannea mita inta modunia bo dumodia kon inta oontongon mita monia,

PETRUS 2 2:18

Mosia in umuran mopodandi in uboḷ mita bo inta diá baraguna. Ibog monia inta mokotor totok tatua pinaké monia mopoyaying kon i monia inta bagupa nopirisaya kon i Tuhan.

PETRUS 2 2:3

Popisí in mosia motamaa, dá intau mita inta deeman totuu guru tua in mongonguman kon inimu in ouman mita inta tongá ai-aidan monia tontaní sinbá kouḻían monia kon kauntungan in moiko. Táe bá kotaauan monimu, pongadilan inta mopoḷabú in hukuman kon i monia tua in noonggot bidon in sinadia, bo koyoyangan inta ain sinantú kon i monia in mogoḷat bidon mako.

PETRUS 2 3:16

Kon bayongan surat i Paulus tua mita umuranbí pinaisnea. Bo totuubí kon oyúon in tongonumai nohal kon suratnea mita in mororiga totok komangaḻean in bonunea tua. Bo inta mororiga totok komangaḻean tatua, sinokotuui in intau mita inta diá nonotaau kon onu bo onu bo inta diá noroton in pirisayanea. Soaḷ mita tatua in diá bidon mokoherang, sin bonupa in Buk Motusi ramujion doman monia pomiaan natua. Tongá oaid monia tatua in mokoboditobí doman kon i monia tontaní.

YOHANES 1 2:16

Bayongan in yagi-yagi inta kon bonu in dunia naa, tua in kinoibog in awak inta baradosa naa, onu inta koontongan bo inta pongaḷakuang, tua komintan in deemanbí nongkon i Amá, táe nongkon duniabí naa.

YUDAS 1:11

Mobodito in mosia! Mosia in dinumuduidon kon onu inta inaidan i Kain. Inta tongá popisí in bá mokouḻí kon doit, dá nogaidon kon onu inta diá kinoibog i Allah, ná doman ki Bileam. Bo mosia tua in irimumud doman popisí in nomarontak ná ki Korah.

WAHYU 12:9

Naga inta moḷoben tatua in pinogarab kon ḷuai! Sia tua in uḷag guranga, Ibilis in tangoinea ande Dimukud Moraat, inta monguboḷ magí-mako kon dunia naa. Sia in iḷumbú kon dunia naa takin malaekatnea mita.