PETRUS 2 1:4 - Alkitab Singog In Mongondow Masa In Tanaa

⁴ Natua in aid i Allah mobogoi kon i naton in barakat-Nea inta moḷoben bo baraguna totok inta ain pinodandi-Nea. Sinbá aka barakat tatua oyúondon kon i monimu, yo moiko in diádon kawasaan in ibog mita moraat inta mokogoguyaat kon dunia naa, bo moiko in moitakin motarima kon sipat i Allah.

PETRUS 2 1:4 Mawu Ofanana

SURAT I PAULUS KON JAMAAT RUM 9:4

Mosia tua in intau inta piniḻí bo binaḻí-Neadon ki adí-Nea mita tontaní. Sia in noponiatadon in kawasa-Nea kon i monia. Sia in nomia kon dodandian takin i monia bo nobogoi in hukum in agama. Pinoguman domandon i Allah kon i monia in soaḷ pooibada bo mosia in notarima domandon kon dandi mita i Allah.

KORINTUS 2 1:20

Sin ki Allah nopototuu in dandi-Nea pinongin i Yesus. Tuabí in nobaḻí dodoyonan sahingga intau moguman “Amin” kon i Allah sin ki Yesus Kristus. Tua in inaidan nami sinbá dayowon in ki Allah.

KORINTUS 2 3:18

Tongá tanaa mako, pogot naton naa in diá bidon kinokoḷubungan, bo moposindar bidon in bayag i Tuhan Yesus. Tuamai tantú baḷuian ná Sia in kita; koonggot-koonggot, yo kobayag-kobayag domandon in kita. Bayag tatua in nongkon Roho, bo Roho tatua in ki Tuhanbí.

KORINTUS 2 6:17

Manangka intua, taḷaaidon in intau mita inta diá nonotaau kon i Allah, bo pokopoyayúdon in moiko kon i monia. Donaaidon moibog moḻiai kon onu inta diá mopia, aka natua in moiko, yo tarimaan-Kubí.

GALATIA 3:16

Ki Allah ain nobogoi in dandi-Nea mita kon i Abraham bo kon buínea mita. Kon dodandian tatua diábí in pinoguman nanaa, “bo kon intau mita inta buí i Abraham”. inta aka tomangaḻean yo moantó in intau. Nanaabí in pinais, “bo kon intau inta buí i Abraham”. mangaḻenea in tongábí tobatú in intau, tuata in ki Kristus.

GALATIA 6:8

Aka ki ine in nomuḷa pinodoyon kon tabiat in intau, yo kopatoian in mouḻínea. Táe aka sia bo nomuḷa pinodoyon kon koibog in Roho i Allah, yo kobiagan mononoi in mouḻínea nongkon Roho i Allah.

EPESUS 4:13

Sahingga in kita komintan motobatúdon kon pirisaya bo motongkaidon in pongortian kon soaḷ ki Adí i Allah. Bo kita in mobaḻí intau mita inta noguyangdon kon pirisaya, inta koonggot-koonggot kodugang-kodugangdon in kososompurna ná ki Kristus.

KOLOSE 3:10

Bo tanaa moiko inogoiandon in kobiagan inta mobagu. Moiko nion in nobaḻí bidon intau nobagu, inta koyogot toimbaguon i Allah inta nopomia kon i monimu podudui in batangan-Nea tontaní. Makusudnea bá totu-totuudon kotaauan monimu in ki Allah.

IBRANI 12:10

Aka guyanga naton kon dunia naa in motundú yo noterbatasbí sin tongábí onu inta inanggap monia mopira. Táe aka ki Allah in motundú yo tua in kopiaanbí naton tontaní. Sinbá kita in mokouḻí doman kon silai inta mopia nongkon i-Nia.

IBRANI 9:15

Tuamai ki Kristus in nobaḻí tonsigad kon tobatú dodandian inta nobagu, sinbá intau inta inoinídon i Allah in motarimadon kon barakat mita mononoi inta ain pinodandi i Allah. Tua komintan in mobaḻíbí sin oyúon in minatoi; Siata in ki Kristus. Kinopatoian-Nea tatua in nopobebasbí kon intau mita nongkon taḷá mita inta pinomia monia wakutu in dodandian inta muna pinaképa.

YAKOBUS 1:27

Podudui ibog i Allah, ibada inta moitutui in motuḷungbí kon adí mita inta uno-unondon bo kon i monia inta dongkadon boba-bobay inta nobiag moyoyiga, poḷat doman moḷukad kon awak tontaní sinbá diá poguyaaton in dunia naa.

PETRUS 2 1:1

Utat mita inta totu-totuudon nopirisaya ná doman kami naa! Ki Yesus Kristus, inta Allah bo Datu Mopoposaḷamat naton in nobogoidon in kasampatan kon i naton mopirisaya kon i-Nia, sin Sia ain nogaid kon onu inta mobanar. Surat tanaa in nongkon i Simon Petrus, tobatú mogogundoi bo rasul i Yesus Kristus.

PETRUS 2 3:13

Táe kita in umuranbí mogoḷat mako kon dandi i Allah. Dandi i Allah tua in soaḷbí ḷangit bo butá inta mobagu inta motompia bo moadil.

PETRUS 2 3:9

Diábí moḷaḷoi in ki Tuhan mogintompod kon onu inta ain pinodandi-Nea, umpakabí oyúon intau in mosingog kon moḷaḷoi in Sia. Táe ki Tuhan in umuranbí mosabar in moindoi mako kon oaid monimu, sin doíbí in Sia aka tobatúpamai intau kon sigad monimu in moputú. Ibogon-Nea, bayongan intau in mogogaidon in mogaid kon dosa.

YOHANES 1 2:25

Bo naa in pinodandi i Kristus tontaní kon i naton: kobiagan motompia bo mononoi.

YOHANES 1 3:2

Utat mita inta kinotabiku! Tanaa mako kita ain nobaḻí ki adí i Allah, táe kaadaan naton kon singgai moiduduimai in diápa notarang.Tongá kinotaauan naton kon aka ki Kristus in mamangoi, kita naa in mobaḻí ná Sia, sin kita in mokoontong kon i-Nia kon bonu in kaadaan-Nea inta sabanarnea.