PETRUS 2 1:1 - Alkitab Singog In Mongondow Masa In Tanaa

¹ Utat mita inta totu-totuudon nopirisaya ná doman kami naa! Ki Yesus Kristus, inta Allah bo Datu Mopoposaḷamat naton in nobogoidon in kasampatan kon i naton mopirisaya kon i-Nia, sin Sia ain nogaid kon onu inta mobanar. Surat tanaa in nongkon i Simon Petrus, tobatú mogogundoi bo rasul i Yesus Kristus.

PETRUS 2 1:1 Mawu Ofanana

YESAYA 12:2

Totuu, ki Allah tua in mopoposaḷamatku, akuoi in mopirisaya kon i-Nia. Akuoi in diábí moondok, sin Sia in moginropot kon inakó. Mopoposaḷamatku in ki Allah, Kon i-Nia in popoyaputanku in dondong.

YEREMIA 33:16

Intau in Yohuda bo intau inta nogutun kon Yerusalem in posaḷamatonbí bo mobiag moaman. Kotá in Yerusalem in tangoian ‘Tuhan Mopoposaḷamat Naton’.

MATIUS 10:2

Naa in tangoi monia mopuḷú bodoyowá tua: Ki Simon (inta dinonoi ki Petrus) bo ki Andreas ki utatnea, ki Yakobus ki adí i Zebedeus bo ki Yohanes ki utatnea.

MATIUS 4:18

Kon tungkuḷ in ki Yesus minayá nongin bingkí in Danow Galilea, Sia in nokoontong kon intau taya dua mogutat, ki Simon (inta dinonoi ki Petrus) bo ki Andreas ki utatnea. Tua in tangoi monia. Mosia in koyogot mobukayad kon landará kon danow sin tuabí in oaidan monia, modomok kon toyá.

LUKAS 1:47

bo mopia totok in ginaku sin ki Allah in mopoposaḷamatku.

LUKAS 11:49

Tuamai hikmat i Allah in noguman nanaa, ‘Akuoi mopotabá in nabi mita bo rasul mamangoi kon i monimu; ibanea in ḻimodon bo ibanea doman in pogutúon!’

YOHANES 1:42

Ki Simon dinia i Andreas minayá kon i Yesus. Ki Yesus inimindoi kon i Simon, bo noguman: “Iko ki Simon, ki adí i Yohanes. Iko in tangoiondon ki Kepas.” (Kepas notongkai in Petrus, mangaḻenea buḷud batu.)

YOHANES 12:26

Intau inta moibog mogaid kon oaidan-Ku musti dumudui kon i-Nakó kon ondakabí in bayáan-Ku; sinbá kon onda in bayáan-Ku yo kon tua doman in sia. Intau inta mogaid kon oaidan-Ku horomatonbí i Amá-Ku.”

YOHANES 20:21

Bo ki Yesus in noguman kon i monia bui, “Salam dodamean bo kobiagan motompia kon i monimu. Ná ki Amá nopotabá kon i-Nakó, yo natua doman in Akuoi mopotabá kon i monimu.”

OUMAN IN RASUL MITA 15:14

Bagu dongka ininsilangan i Simon kon nongkon pinomangkoianpabímai ki Allah in nopoontongdon in tabi-Nea kon intau mita inta deeman Yahudi, bo nomiḻí kon umat kon sigad in intau mita inta diá mopirisaya. Tongá kinoonggotannea in umat inta piniḻí-Nea tatua in nobaḻí umat inta motoindudui kon i-Nia.

SURAT I PAULUS KON JAMAAT RUM 1:1

Utatku mita kon Rum inta kinotabi i Allah bo inta ain piniḻí-Nea sin baḻíondon umat-Nea. Akuoi in piniḻídon i Allah bo ain binaḻí-Nea intau inta mopotaau in Habar Mopia nongkon i-Nia.

SURAT I PAULUS KON JAMAAT RUM 1:12

Nanaa in makusudku, lantaran kita bo tumpaḷadon mopirisaya kon i Yesus Kristus, dá musti umuran mosirigonan in kita.

SURAT I PAULUS KON JAMAAT RUM 1:17

Sin pinongin Habar Mopia tatua ki Allah in nopoontongdon kon naonda in pogogaid sinbá hubungan in intau bo i Allah in moyoguḻitdon bui: aidnea kon tua in tongábí mopirisaya kon i Allah nongkon pinomangkoianpamai modapot in pangabisan. Tua in ná inta ain pinais kon bonu in Buk Motusi, nanaa, “Intau in nopirisayadon kon i Allah, sahingga in hubungannea takin i Allah notompiadon bui, bo intau tatua in mobiagbí!”

KORINTUS 1 1:30

Sin lantaranbí ki Allah, dá notobatúdon in moiko i Kristus. Bo lantaran doman kita nopirisayadon kon i Kristus dá kita in nonotaaudon kon bayongan in yagi-yagi. Siabí doman tua in nopoyotutui, nomiḻí bo notobut kon bayongan oaid naton inta diá mopia.

KORINTUS 1 15:9

Sin akuoibí naa in rasul inta totok in mohina kon sigad in bayongan rasul, sin akuoi in nomogutú kon bayongan jamaat i Allah.

KORINTUS 1 9:1

Akuoi naa intaubí nobebas? Rasul i Tuhan? Inta ain nokoontong kon i Yesus, Tuhan naton? Bo inta nopoyaput in Habar Mopia kon i monimu dá nopirisayadon kon i Tuhan in moiko?

KORINTUS 2 4:13

Kon Buk Motusi in pinais nanaa, “Akuoi in mopirisaya, tuamai akuoi in mosingog.” Dá pirisayabí tatua in nobaḻí dodoyonan nami mosingog.

KORINTUS 2 5:21

Sin Sia inta nodarit kon bayongan in oaid inta diá mopia, pinaké domandon i Allah mobaba kon bayongan in dosa naton, sinbá kita in buidon mobiag motompia takin i Allah sin notobatúdon i Kristus.

GALATIA 2:8

Sin ki Allah inta nobogoi kon i Petrus in ropot bá mobaḻí rasul kon sigad in intau mita Yahudi, Siabí doman tua inta nobogoi in ropot kon inakó sinbá mobaḻí rasul kon yua-yuak in intau deeman Yahudi.

EPESUS 3:5

Koḻipod, onu inta noibuni tatua diá kon dodai in onda in pinotaau kon intau, táe tanaa, ain pinoniata in Roho i Allah kon rasul mita bo kon nabi-Nea mita.

EPESUS 4:11

Sia doman tua inta nobogoi in rasul, nabi bo intau mita inta mopoyaput in Habar Mopia, gombala bo guru mita.

EPESUS 4:5

Tongábí doman tobatú in Tuhan, tobatú in pirisaya, tobatú in baptisan,

PILIPI 1:1

Utatku mita umat i Allah inta nogutun kon Pilipi, inta notobatúdon i Kristus Yesus bo inta ain nobaḻí itoi bo diaken kon jamaat! Akuoi, ki Paulus bo ki Timotius inta mogogaid kon oaidan i Kristus Yesus,

PILIPI 1:29

Sin moiko inogoian bidon i Allah in totabi inta deemanbí tongá mopirisaya kon i Kristus, táe poḷatbí doman motanggung kon roriga-Nea.

PILIPI 3:9

bo akuoi in totu-totuudon notobatú takin-Nea. Hubungan mopia takin i Allah in diábí nouḻíku sin popisí in dinumudui kon hukum in agama, táe tua in nouḻíkubí sin akuoi in nopirisayadon kon i Kristus. Dá tuamai hubungan mopia tua in namangoibí nongkon i Allah sin pinodoyon kon pirisaya kon i Kristus Yesus.

TIMOTIUS 2 1:5

Umuran kotoropanku in kopopirisayamu kon i Kristus inta totu-totuu tua naonda bo kopopirisaya i baaymu ki Lois bo ki inámu ki Eunike. Bo moyakinbí totok in akuoi kon kopopirisayamu nion ná bí doman onda bo kopopirisaya monia tua.

TITUS 1:1

Titus adíku! Akuoi, ki Paulus in nomais kon surat tanaa saḷaku mogogaid kon oaidan i Allah bo rasul i Yesus Kristus. Akuoi in piniḻí bo pinotabá sinbá motuḷung kon intau mita inta ain piniḻí i Allah sinbá umuran morigon in pirisaya monia kon i Tuhan Yesus. Bo mustibí umuranku tundúon in mosia sinbá totokdon in monotaau kon onu inta moitutui podudui in agama naton.

TITUS 1:4

Titus, iko uḻe in totu-totuu bidon nobaḻí ki adíku, sin kitada in tumpaḷadon nopirisaya kon i Kristus. Manangka intua umuranku poigumon mako sinbá ki Allah, ki Amá naton bo ki Kristus Yesus Datu Mopoposaḷamat naton, umuran mobogoi in barakat bo kobiagan mopia kon inimu.

TITUS 2:13

Tanaa mako, kita in mogoḷatpa mako kon singgai inta iharap mako naton tua. Kon singgai tatua, dunia naa in mokoontongdon kon kamuliaan i Yesus Kristus, Sia tuata in ki Allah Inta Totok in Momulia bo Datu Mopoposaḷamat naton.

YAKOBUS 1:1

Utatku mita, bayongan in umat i Allah inta noibaya-bayá mako kon dunia! Akuoi ki Yakobus, mogogaid kon oaidan i Allah bo i Tuhan Yesus Kristus, mopoyaput in salam kon i monimu.

PETRUS 1 1:1

Utatku mita umat inta piniḻí i Allah, inta noibaya-bayá mako kon butá in Pontus, Galatia, Kapadokia, Asia bo Bitinia! Akuoi, ki Petrus, rasul i Yesus Kristus in mopoigum mako sinbá ki Allah mobogoi in barakat bo kobiagan motompia kon i monimu. Moiko in piniḻí nobaḻí umat i Allah podudui in tomayá i Allah, Amá naton. Roho i Allah nopobaḻídon kon i monimu umat inta mokudus, inta mobiag bo tongá mosumba kon i Allah, sinbá moiko in tongá motoindudui kon i Yesus Kristus bo potusion in dugú-Nea.

PETRUS 1 1:7

Tujuan intua komintan in mogujibí kon i monimu mongo totuudon mopirisaya kon i Tuhan andeka diá. Buḷawanpa inta mogogu-goguyaatbí, mustibí ujionpa muna in tuḷu. Pirisayabí monimu in momaha-mahaḷ nongkon buḷawan mita tatua, tuamai mustibí doman ujion sinbá moiko in mobaḻídon totok in moroton. Aka natua yo moiko in dayowonbí bo horomaton poḷat diaan mayá in soroga aka ki Yesus Kristus buidon mamangoi.

PETRUS 1 2:7

Moḷoben totok mangaḻe in batu tatua kon i monimu inta mopirisaya. Táe aka kon i monia inta diá mopirisaya, mobaḻíbí in onu inta ain pinais kon Buk Motusi nanaa, “Batu inta diá pinaké in intau mita inta mogogaid kon bangunan tua noniata magí yo nobaḻídon batu inta totok in moponting,”

PETRUS 1 5:1

Naa in tongginaku mita kon itoi mita in jamaat i Allah inta kon sigad monimu. Akuoi in nomais tanaa saḷakubí yobayat topogaidan in itoi mita in jamaat bo saḷaku intau inta ain nokoontong tontaní kon roriga i Kristus, bo inta moitakin doman kon kamuliaan inta popoontong i Kristus kon intau kon singgai moiduduimai. Poigumonku totok

PETRUS 2 1:4

Natua in aid i Allah mobogoi kon i naton in barakat-Nea inta moḷoben bo baraguna totok inta ain pinodandi-Nea. Sinbá aka barakat tatua oyúondon kon i monimu, yo moiko in diádon kawasaan in ibog mita moraat inta mokogoguyaat kon dunia naa, bo moiko in moitakin motarima kon sipat i Allah.

YUDAS 1:1

Utatku mita inta ain inoiní bo inta totok in kinotabi i Allah Amá naton, bo inta iḷukadan kon bonu in tangoi i Yesus Kristus. Saḷaku intau inta nogaid kon oaidan i Yesus Kristus, akuoi – ki Yudas – ki utat i Yakobus,