OUMAN IN RASUL MITA 1:3 - Alkitab Singog In Mongondow Masa In Tanaa

³ Naonda in Sia buidon nobiag nongkon kinopatoian-Nea, opat nopuḷú nosinggai Sia nopoontong in oaidan-Nea kon rasul mita sinbá moniata kon i monia kon Sia tua in totu-totuubí nobiag. Mosia in nokoontong kon i-Nia, bo Sia in nongonguman kon i monia kon naonda in ki Allah momarenta saḷaku Datu.

OUMAN IN RASUL MITA 1:3 Mawu Ofanana

DATU MITA IMITÁNEA 19:8

Nobangon i ki Elia, poḷat nongaan bo nonginum. Dá noropotdon in sia bo nokobayádon in sia opat nopuḷú nosinggai in koonggotnea, minayá in Buḷud in Sinai, tampat inta pinoki pogontongan i Allah.

MATIUS 21:43

“Dá toropdon,” guman i Yesus, “bayongan hak, saḷaku umat i Allah gamáan nongkon inimu bo ogoi kon bangusa inta moibog dumudui kon parenta mita i Allah. [

MATIUS 28:9

Bo ki Yesus in noyodungkuḷ monia bo noguman, “Salam kon inimu!” Dinimiug in mosia kon i-Nia bo ginumakap kon sioḷ-Nea bo nosumba doman kon i-Nia.

MATIUS 3:2

“Pogogaidon mogaid kon dosamu mita, sin diádon moonggot bo mamangoi in ki Allah momarenta saḷaku Datu!”

MATIUS 4:2

Bo naonda in Sia nopaḷut nopuasa opat nopuḷú nosinggai bo opat nopuḷú nogobii, inangoiandon gogoy in Sia.

MARKUS 16:19

Naonda in ki Yesus nopaḷut nongonguman monia, Sia sinintakdon minayá in soroga. Kon tua, Sia momarenta takin i Allah.

YOHANES 20:26

Naonda in todiminggu noiduduimai kon tua, murí mita i Yesus noyosipun bui kon tua, ki Tomas in oyúon domandon kon tua noyotakin monia. Komintan kinunsían monia in ḷoḻingkop, táe ki Yesus in namangoi bo sinimindog kon yua-yuak monia bo noguman, “Salam dodamean bo kobiagan motompia kotaki-takin monimu.”

YOHANES 21:1

Nopaḷut mako kon tua ki Yesus in bui nokipogontong kon murí-Nea taya pitu kon Danow Tiberias. Nanaa in kino bobaḻínea:

YOHANES 21:14

Naa in kon intoḷuneadon in ki Yesus nokipogontong kon murí-Nea mita naonda in biniagdon bui in Sia nongkon sigad in intau mita minatoi.

OUMAN IN RASUL MITA 13:31

Onda intua tongonumai nosinggai in Sia umuran namangoi nokipogontong kon dumodudui-Nea mita inta namangoi noyotakin-Nea nongkon Galilea mayá in Yerusalem. Mosia tuata inta nobaḻí sakusi-Nea kon umat masai naa.

OUMAN IN RASUL MITA 19:8

Toḷu nobuḷan in ki Paulus umuran nobarani in nongonguman kon bonu in baḷoi pososambayangan bo mosisoaḷan takin bayongan in intau kon tua sin mopoyakin kon i monia in soaḷ ná onda in ki Allah momarenta saḷaku Datu.

OUMAN IN RASUL MITA 28:23

Dá mosia bo ki Paulus in nonantú kon tobatú singgai poyodungkuḷan monia. Bo kon singgai inta ain sinantú tatua nobayongdon intau in namangoi kon baḷoi inta pinogutunan i Paulus. Bo nongkon doḷo-doḷompa dapot in ḷoḷabungnea ki Paulus noginsilang bo nopotaau kon i monia soaḷ naonda in ki Allah momarenta saḷaku Datu. Sia in nobaca kon tontagá inta pinais kon buk i Musa, bo buk i nabi mita sinbá mosia in mopirisayadon kon i Yesus inta ain pinotaa-taaunea mako tua.

OUMAN IN RASUL MITA 28:31

Bo taran-tarangan doman in sia in nopotaau in Habar Mopia kon naonda in ki Allah momarenta saḷaku Datu bo moginsilang kon soaḷ ki Tuhan Yesus Kristus. Onu in inaidan i Paulus tatua diá bidon in noḷambo-ḷamboi mako.

OUMAN IN RASUL MITA 8:12

Táe mosia in binayá i Pilipus pinopotaauan in Habar Mopia soaḷ naonda in ki Allah mamangoi momarenta saḷaku datu bo soaḷ ki Yesus Kristus, Datu Mopoposaḷamat tua. Dá bayongan in intau kon kotá tatua nodait nopirisaya kon onu in pinoyaput i Pilipus kon i monia. Bo mosia in binaptis mita pinomayá ḷoḷaki andeka bobay.

SURAT I PAULUS KON JAMAAT RUM 14:17

Sin aka ki Allah in momarenta kon kobiagan intau, yo soaḷ onu in motaau kaanon ande inumonnea, tua in diábí moponting. Inta moponting in soaḷbí intau inta dumudui kon onu in kinoibog i Allah in mokorasabí kon moonow in gina bo motarima kon kasanangan gina inta inogoi in Roho i Allah, tua in moponting.

ULANGAN 9:18

Bo komintanpa doman in akuoi minayá dinumokó kon tayowon i Tuhan kon tudu in buḷud opat nopuḷú nosinggai bo opat nopuḷú nogobii in koonggotnea takin diá nopongaa-ngaan ande diá noponginu-nginum. Tua in pinomiaku sin moiko aindon nogaid kon dosa kon i Tuhan takin nomia kon onu inta inanggap-Nea moraat, dá sinumorú in Sia.

ULANGAN 9:9

Akuoi notakod kon buḷud tatua sin motarima kon batu dodandian inta pinomia i Tuhan takin i monimu. Opat nopuḷú nosinggai bo opat nopuḷú nogobii in koonggotnea akuoi nogutun kon buḷud tatua takin diá nopongaa-ngaan ande diá noponginu-nginum.

KOLOSE 1:13

Pinilatan-Neadon in kita nongkon kawasa inta nosindip bodongka pinamping kon bonu in dodatuan i Adí-Nea inta kinotabi-Nea.

TESALONIKA 1 2:12

Kami umuran mononggina bo mobogoi in moginrigon kon gina monimu bo mondodak sinbá moiko in moidudui kon inta kinoibog i Allah. Inoiní-Nea in moiko sinbá mobaḻí umat kon Dunia-Nea inta Mobagu bo mokorasa kon kawasa-Nea inta moḷoben.

YOHANES 1 1:1

Tombonu in surat tanaa in soaḷbí Pirman inta mobogoi in kobiagan, Sia tua in Pirman inta koyongan bidon oyúon nongkon pinomangkoianpamai. Pirman tatua ain inontong bo ain doman kinadaian nami tontaní.