OMBAḶ 5:17 - Alkitab Singog In Mongondow Masa In Tanaa

^17-18 Buḷud in Sion noingongowdon bo sinaḷáan; kon tua ungkú in kayuon nodondaḷoi magí-mako. Manangka intua gina nami nádon poropatoian, mongombaḷ in kami modapot in diádon motarang in mata nami.

OMBAḶ 5:17 Mawu Ofanana

AYUB 17:7

Mataku in mobuḷoḷow sin mororiga in ginaku; bayongan in awakku rumutuk in momikir.

MAZMUR 31:9

Diábí pinomayá-Mu mako akuoi in dakopon in musung, táe inogoi-Mubí in akuoi maya-mayá mako takin diá in ḷabot.

MAZMUR 38:8

Patú in rintonow momokak kon awakku, diádon in mosehat kon awakku.

MAZMUR 6:7

Moḷopídon bo moyangkódon in akuoi sin mogamuimai; pomuḷoi in doḷom moḷabú in ḷuáku momuntad kon tosiuganku.

MAZMUR 69:3

Akuoi in noibonu kon dampaḷ inta modaḷom, diá in pomuntukan. Akuoi in noḷomot kon tubig inta moḻinow, iniḻig in bokoḷ kon dodai in tubig noponik.

YESAYA 1:5

Nongonu sin moiko in umuranbí momayow? Moibog degá in moiko hukumon moiḻiu kon tua in kobogatnea? Uḷumu ain nopuḻing in paḻí mita, gina bo raianmu monakit.

YESAYA 38:14

Singogku in motoyokdon bo moyangkó, naonda bo ḷagapan tarangkuku mogamui. Mataku in moḷopí popisí in ḷumangag kon ḷangit, Tuhan, poḷuatdon in akuoi nongkon roriga tanaa.

YEREMIA 46:5

Táe Akuoi, ki Tuhan, nokoontong kon i monia inumundok sin moondok. Tontara mita monia in sinaḷow, bo noḷagui takin ondok bo diá bidon nobobui ná tumi.

YEREMIA 8:18

Ginaku monakit bo mopomporí, amuiku diá koundaman.

OMBAḶ 1:13

Nongkon ḷangit pinoonag-Nea in tuḷú inta nomokak nodapot kon bonu in ginaku. Sinaannea in potait kon tayowonku inta nokopopisí kon inakó noḷabú. Bodongka pinomayá-Neadon mako in aku-akuoi mita in kinoantugan in roriga kinoouput in singgai.

OMBAḶ 1:22

Taridiaidon in bayongan in aid moraat monia tua, bo aidaimaidon in mosia ná pinogogaid-Mu kon inakó, popisí in bayongan in dosa inta ain inaidanku kon ini-Mu. Mogongot in akuoi kon bonu in roriga, moajar in ginaku bo diá kotaauan mongo mayá in onda.”

OMBAḶ 2:11

Mataku in nobobagá popisí in nongombaḷ diá nodona-doná, dimukudku in moondok diá in batainea. Ginaku in norumbun nokoontong kon kinorumbunan in bangusa; nokoontong kon mongoadí mita bo adí mointok sinogopuḷong kon daḷan mita in kotá.

YEHEZKIEL 21:15

Binaḻínea in bangusa-Ku noinggamá in baraninea bo noḷabú noipintud. Inindoyó-Ku in kedang in kotá tatua inta mopouḻi-uḻinag naonda bo kilat, bo nosadiadon moḻimod.

YEHEZKIEL 21:7

Aka ḻibóon monia mongo nongonu sin mogamuibí in iko, yo pogumandon kon morobonoḷ in ginamu popisí in habar inta moiduduimai. Habar tatua in mokoondok kon gina monia, moḷungkoyó in ḻima monia, duḷud monia mourot, modaitdon in ibog monia mobiag. Totuu kon wakutunea in moiangoidon, bo tua mita in mobaḻíbí. Akuoi ki Tuhan Inta Totok in moḷantud ain nosingog.”

IMAMAT 26:36

Intaumu mita inta kon pinoḷumbúanpa kon butá intau, popogonúan-Kudon in ondok moḷoben, modapot in umpaka tongá singog in daun irupon tompot yo poḷaguian monia. Moiko in moḷagui naonda bo inaḷowan kon bonu in parang, bo moḷabú umpaka diá in musung kon diugmu.

MIKHA 6:13

Tanaa in pangkoion-Kudon sambokon bo rimumudon in moiko popisí in dosamu mita.

ULANGAN 28:65

Kon sigad in bangusa mita tatua moiko in diábí mokouḻí kon kobiagan mopia, bo diábí in tampat inta motaau tangoion monimu kapunyaanmu; Baḻíon i Tuhan in moiko totok in moondok bo koinggamáan in rigon in gina takin diá in andoḷan.