MARKUS 8:34 - Alkitab Singog In Mongondow Masa In Tanaa

³⁴ Onda intua ki Yesus nogoiní kon intau moantó inta noyotakin murí-Nea mita bo noguman kon i monia, “Intau inta moibog dumudui kon i-Nakó musti ḻiongonnea in kopontingannea tontaní bo momotaan kon kayu pinoyotaḻempang bo umuran dumudui kon i-Nakó.

MARKUS 8:34 Mawu Ofanana

DATU MITA IMITÁNEA 14:8

Iko in inogoian-Kudon in dodatuan inta ginamá-Ku nongkon buí i Daud. Táe iko in diá ná mogogundoi-Ku ki Daud. Sia in totuu mosatia kon i-Nakó bo motoindudui kon parenta-Ku. Tongábí onda inta koibog-Ku tua in aidannea.

PINOGIAPAN 14:24

Táe tua in diábí poaid-Ku kon bobantung-Ku ki Kaleb. Sia in umuran mosatia kon i-Nakó. Tuamai in diaan-Ku in sia mayá in butá inta ain sinuotannea. Tanaa intau in Amalek bo intau in Kanaan nogutun kon ḷopá tatua. Táe butá tatua in mobaḻíbí kapunyaan in buí i Kaleb, bobantung-Ku tua. Ikoḷom moiko musti momurow bo mayá in padang gurun mopobayá ná Teluk Akaba.”

MATIUS 10:38

Bo ki ine in doí momotaan kon kayu pinoyotaḻempang bo dumudui kon i-Nakó, sia doman tua in diábí patus mobaḻí dumodudui-Ku.

MATIUS 16:24

Bo ki Yesus in noguman kon murí-Nea mita, “Pomuḷoi intau inta moibog dumudui kon i-Nakó, sia in musti monaḷámai kon oaidannea tontaní bo momotaan kon roriganea, bo dumudui kon i-Nakó.

MATIUS 27:32

Naonda in mosia kon ḷuai in kotá, mosia noyodungkuḷ in tobatú intau inta nongkon Kirene ki Simon in tangoinea. Pinakisa monia in intau tatua pinoki potaanan in kayu pinoyotaḻempang inta popopakúan kon i Yesus.

MARKUS 10:21

Dá ki Yesus inimindoi kon intau tatua takin tabi bo noguman nanaa, “Dongkadon tobatú in paraḷumu aidan. Bayádon potaḷui in bayongan kapunyaanmu; bo ogoi kon intau nobogá in boḻinea tatua, dá mokouḻídon iko kon kapunyaan kon soroga. Onda intua angoidon dudui kon i-Nakó.”

MARKUS 7:14

Bo ki Yesus nogoiní kon intau mobayong tatua bo noguman bui kon i monia, “Indongogai sinbá komangaḻean monimu!

LUKAS 13:24

“Poramujidon tumuot kon ngara inta mosisí! Sin pokoingat! Mobarongdon totok in intau moramuji in tumuot kon daḷan tatua táe diá mokotuot.

LUKAS 14:33

Natua doman in moiko komintan. Diábí tobatúmai in kon sigad monimu inta motaau mobaḻí dumodudui-Ku aka moiko bo diá mokotaḷá kon kapunyaanmu.”

LUKAS 18:22

Nokodongogmai kon tua in ki Yesus, noguman in Sia nanaa, “Tobatúpa in musti aidanmu: Potaḷuidon in bayongan kapunyaanmu bodongka sila-silaidon mako in doit tatua kon intau mita bogá, dá mokouḻíbí in iko kon kapunyaan kon soroga. Mopaḷut mako kon tua angoi bo duduidon kon i-Nakó.”

LUKAS 20:45

Koyogotpa intau mita mokidongogmai kon i-Nia, ki Yesus in nongonguman doman kon murí-Nea mita nanaa,

LUKAS 9:23

Onda intua Sia in noguman doman kon i monia, “Intau inta moibog dumudui kon i-Nakó, mustibí ḻiongonnea in oaidannea tontaní, bo momotaan kon roriganea pomuḷoi in singgai bo umuran dumudui kon i-Nakó.

YOHANES 10:27

Domba-Ku mita in mokidongogbí kon singog-Ku mita. Kinotaauan-Kubí in mosia, bo mosia in dumuduibí kon i-Nakó.

YOHANES 19:17

Ki Yesus iḷumuai takin kopota-potaan in kayu pinoyotaḻempang popopakúan kon i-Nia bo nopobayá in tampat inta sinangoian “Tampat in Ḷungkaká”. (Kon bonu in bahasa Ibrani sinangoian Joljuta.)

OUMAN IN RASUL MITA 14:22

Kon kotá mita tatua mosia in minayá noginrigon kon gina in intau mita inta mopirisaya kon i Yesus bo nononggina sinbá umuran mopirisaya kon i Yesus. Nanaa in tonggina monia tua, “Munapabí moantó in roriga mouḻí naton, bain tua bo mokorasa kon kopiaan kon Dunia Mobagu i Allah.”

SURAT I PAULUS KON JAMAAT RUM 6:6

Kinotaauan bidon naton kon tabiat naton saḷaku intau aindon noitakin pinopopakú kon kayu pinoyotaḻempang, sinbá kawasa in awak inta binaradosa naa inggamáandon, sahingga in kita in diádon umuran tonggataan in dosa.

SURAT I PAULUS KON JAMAAT RUM 8:17

Dá, aka kita ki adí mita i Allah, yo kita naa in intaubí mita inta mogogabat-Nea bo inta motarima kon barakat mita inta ain sinadia i Allah kon i adí-Nea mita. Kita in noyotakin i Kristus motarima kon onu inta ain sinadia i Allah kon i-Nia; sin aka kita bo mokorasa kon roriga takin i Kristus, yo kita in pomuliaanbí doman moyotakin-Nea.

KORINTUS 1 15:31

Utat mita! Pomuḷoi in singgai akuoi in monahang kon roriga sin mopia in ginaku kon kobobiag monimu sin moiko ain nopirisaya kon i Kristus Yesus, Tuhan naton. Totuubí onu in pinogumanku tanaa.

KORINTUS 1 8:13

Tuamai aka mokobaradosabí kon i utatku mita in kaanon tatua, dá doí bidon in akuoi mokaan kon ponoyá tatua. Sin dikabo baradosaan in ki utatku tua popisí akuoi.

KORINTUS 1 9:19

Akuoi naa in deemanbí totabá in tumpaḷa intau, táe noibogbí in akuoi nobaḻí ata kon i monimu komintan, sinbá moantó in intau in mopirisaya kon i Kristus.

GALATIA 2:20

Tongá akuoi in nobiag, táe deeman bidon akuoi, sin ki Kristus bidon in naa kon awakku. Bo kobobiagku tanaa mako in kobobiag bidon inta pinodoyon kon pirisayaku kon i Adí i Allah inta notabi kon inakó, bo inta ain noposarakan in awak-Nea tontaní sin kopontinganku.

GALATIA 5:24

Ki ine inta ain nobaḻí kapunyaan i Kristus Yesus, yo mosia tua ain doman noḷumbú kon tabiat in intau bo bayongan ibog in dunia naa.

GALATIA 6:14

Táe akuoi in totuu kon doíbí dumodia kon onu inta ain inaidanku, koḻikudbí in modayow kon i Tuhan naton ki Yesus Kristus inta ain minatoi pinopopakú kon kayu pinoyotaḻempang. Lantaran Sia bo ain minatoi pinopopakú kon kayu pinoyotaḻempang, dá dunia naa in diá bidon in mangaḻenea kon inakó. Ná doman tua in akuoi kon tayowon in dunia naa, inanggap monia in akuoi naa naonda bo minatoidon.

PILIPI 3:10

Soaḷ inta totok in kinoibogku in monotaaubí kon i Kristus bo mokoalami kon kawasa inta nokobiag kon i-Nia nongkon kinopatoian. Bo moibog doman in akuoi mokoalami kon roriga ná inta kinorasaan-Nea bo notongkai doman ná kopopatoi-Nea,

PILIPI 3:7

Tongá popisí in nopirisayadon kon i Kristus, dá onu in koḻipod inta inanggapku mobogoi in kauntungan kon inakó, tanaa mako inanggapkudon diá in mangaḻenea.

KOLOSE 1:24

Tanaa mopiabí in ginaku in mororiga sin kopontinganmu. Sin aka awakku bo mororiga, yo tua in mangaḻenea akuoi nogintompodon kon roriga inta diápa kinorasaan i Kristus, sin kopontingan in jamaat saḷaku awak-Nea.

KOLOSE 3:5

Tuamai Inggamáaidon in ibog mita in dunia inta umuran monuyayow kon i monimu, ná oaid inta mokotor, oaid mita inta diá patus aidan, ibog in awak, ibog mita inta moraat, bo ibog mita inta moiḻiu (sin ibog inta moiḻiu tua in notongkaibí in mosumba kon berhala).

TESALONIKA 2 3:11

Pinoguman nami in nanaa sin dinongog nami kon oyúon in intau kon sigad monimu in doídon mogaid kon soaḷ inta baraguna tongá bidon mogaid kon inta diá baraguna.

TITUS 2:12

Totabi i Allah tatua in motundú kon i naton bá diádon tongá umuran dumudui kon ibog in dunia naa, táe tantúdon dumudui kon ibog i Allah. Kita in pinoangoi in dunia naa, dinidikbí sinbá motaau monahang kon ibog in awak, umuran motuḻid in gina bo umuran doman dumudui kon inta pinarenta i Allah.

IBRANI 13:13

Tuamai, koḻigai mayá in kita kon i-Nia kon ḷuai in ḷoḷaigan bo moyotakin-Nea singkuḻeon.

PETRUS 1 4:1

Lantaran ki Kristus ain nokorasa kon roriga in awak naa, dá tua in musti umuran kon gina mako bá umuran moropot in pirisaya monimu. Sin ki ine inta nokorasadon kon roriga in awak, yo diá bidon in sia mogaid kon dosa.

PETRUS 1 4:13

Mokoposanangbí kon gina sin moiko in nokorasadon kon ná inta ain kinorasaan i Kristus. Dá aka kamuliaan i Kristus popoontongdon, yo totokbí in mopia in gina monimu.

PETRUS 2 1:14

Sin kinotaauanku bidon kon diá bidon moonggot in akuoi bo matoi, sin pinotaau bidon notarang i Tuhan Yesus Kristus kon inakó intua.

YOHANES 1 3:16

Naa in daḷan bá kotaauan naton in motabi kon tumpaḷa intau: ki Kristus in noposarakandon in kobiagan-Nea sin kopontingan naton. Sin tuamai, kita doman in musti moposarakan in kobiagan naton kon kopontingan i utat mita naton!

WAHYU 2:10

Dikabí moondok kon yoyiga inta diádon moonggot in musti korasaan monimu. Pokotorop, oyúon in tongonumai intau kon sigad monimu in potuoton Ibilis kon bonu in ponjara sin mosoba kon i monimu. Moiko in mokorasa kon yoyiga kon bonu in mopuḷú nosinggai. Táe kotoinduduibí tantú in moiko kon i-Nakó modapot in matoi, dá moiko ogoian-Ku in kobiagan mononoi saḷaku tombuinag sin nountungdon.