MARKUS 4:20 - Alkitab Singog In Mongondow Masa In Tanaa

²⁰ Bo bibit inta noḷabú kon butá inta mopia, tua in ibarat intau mita inta nokidongog kon habar tatua bo sinarimanea. Mosia in nomungai nodatog. Oyúon in toḷu nopuḷú, oyúon in onom nopuḷú, bo oyúon doman in mogatut noguntuḷ in kobarong in bungainea.”

MARKUS 4:20 Mawu Ofanana

KINOBAḺIAN 26:12

Ki Ishak nonompinomuḷa kon butá tatua, bo taong tatua sia in nokouḻí kon bungai in boyó mogatut noguntuḷ nongkon onu inta pinomuḷanea, sin ki Tuhan nomarakat kon inia.

MATIUS 13:23

Bibit inta noḷabú kon butá mopia, tua in mangaḻenea intau inta nokodongog kon Pirman bo nonotaau kon mangaḻenea. Manangka intua sia nomungai, oyúon inta mogatut noguntuḷ, oyúon in onom nopuḷú noguntuḷ, bo oyúon doman in toḷu nopuḷú noguntuḷ.”

MATIUS 13:8

Táe oyúon doman in noḷabú kon butá inta nopia bo sia in nomungai; oyúon mogatut noguntuḷ, oyúon in onom nopuḷú noguntuḷ, oyúon doman in toḷu nopuḷú noguntuḷ in bungainea.”

MARKUS 4:8

Táe oyúon doman bibit in noḷabú kon butá inta mopia. Bibit tatua nobiag, bo nobaḻí noḷoben bodongka nomungai, oyúon kotoḷu nopuḷú noguntuḷ in kobayongnea, oyúon in koonom nopuḷú noguntuḷ bo oyúon doman in kogatut noguntuḷ in kobayongnea.”

LUKAS 8:15

Yo aka bibit inta noḷabú kon butá mopia, tua in ibarat intau inta nokidongog kon Pirman, bo pinotonopnea totu-totuu kon bonu in ginanea sahingga in nonahang kon yagi-yagi sobaan bo nobogoi in bungainea inta totok in mopia.”

YOHANES 15:16

Deemanbí moiko in nomiḻí kon i-Nakó. Akuoibí in nomiḻí kon i monimu, bo nopotabá kon i monimu mayá sinbá modiamai kon bungai mobayong, bungai mita inta diá moyopú. Dá ogoibí i Amá in onukabí inigum monimu inta pinodoyon kon tangoi-Ku.

YOHANES 15:2

Pomuḷoi in tanga kon i-Nakó inta diá momomungai, pongkóon-Nea, bo pomuḷoi in tanga inta momungai, gaatannea in daunnea bo daritan-Nea sinbá modugangdon modatog in bungainea.

SURAT I PAULUS KON JAMAAT RUM 7:4

Natua domandon in moiko utatku mita. Kon hukum agama in Yahudi, moiko ain minatoi, sin moiko ain sinobatú takin awak i Kristus bo nobaḻídon kapunyaan-Nea inta ain biniag bui nongkon kinopatoian. Sia biniag nongkon popatoi sinbá kita in mobaragunadon kon i Allah kon dodai in mobiagpa.

PILIPI 1:11

Moiko in mobiag takin oaid mita inta totu-totuu mopia inta tongábí mouḻí nongkon i Yesus Kristus tontaní, dá ki Allah pomuliaan bo dayowon.

KOLOSE 1:10

Dá moiko in mobiagdon podudui in ibog i Allah bo umuran mokosanang kon gina-Nea, sahingga kon bayongan yagi-yagi moiko in umuran mobogoi in bungai inta mopia. Bo pongotahuan monimu soaḷ ki Allah in modugang domandon.

TESALONIKA 1 4:1

Pangabisannea uḻe utat mita, naa in poigumon nami takin tonggina kon i monimu inta pinodoyon kon kawasa i Tuhan Yesus, sinundúdon bo ain inontong monimu kon inami naonda in kobobiag podudui kon inta mokosanang kon gina i Allah. Moiko in nobiag bidon natua, táe tanaa pinodoyon kon kawasa i Yesus, kami in mopoigum totok kon i monimu bo mokiramuji sinbá totu-totuudon in moiko mogaid kon tua komintan!

PETRUS 2 1:8

Tua mita in sipat inta paraḷuon monimu. Aka sipat mita tatua bo nobayongdon totok in kon i monimu, yo morajing bidon totok in moiko mogaid bo moḷobenbí in mangaḻe in oaidanmu, bo kototaau monimu soaḷ ki Yesus Kristus Tuhan naton in modugangdon mopia.