MARKUS 13:11 - Alkitab Singog In Mongondow Masa In Tanaa

¹¹ Bo aka domokon bo diaan in moiko kon pongadilan, yo dikabí mohawatir kon soaḷ onu in musti singogon monimu. Aka wakutudon monimu mosingog, yo singogdon onu in poporoho kon i monimu kon wakutu intua. Sin deemanbí moiko in mosingog, táe Rohobí i Allah.

MARKUS 13:11 Mawu Ofanana

SAMUEL 2 23:2

Roho i Tuhan ain nosingog pinongin inakó; koyow bo parenta-Nea in naa kon bibigku.

YESAYA 50:4

Ki Tuhan Inta Totok in moḷantud in notundú kon inakó nosingog, sinbá tosingogonku in mokoropot kon intau inta noḷungkoyó. Pomuḷoi in doḷo-doḷom pomuká-Nea in ibog in ginaku sin mokidongog kon totundú-Nea kon inakó.

MATIUS 10:17

Táe mokopoingat, sin oyúon in moposarakan kon i monimu kon itoi mita in agama. Bo sikisaan monia in moiko kon baḷoi pososambayangan.

MARKUS 13:12

Kon dodai intua intau moposarakanbí kon i utatnea tontaní sin ḻimodon, natua doman aidan in tobatú guyanga ḷoḷaki kon i adínea. Adí mita moḷawangdon kon i amá bo kon i inánea, bo moposarakan kon i monia sin pokiḻimod.

MARKUS 13:9

Musti mokopoingat in moiko sin domokon bo pokisidang kon mahkama agama. Moiko in bongkugon kon baḷoi mita pososambayangan. Diaan in moiko potayow kon mongongawasa mita bo datu popisí in moiko in murí-Ku mita. Bo tuata in kasampatan monimu mongonguman kon i monia soaḷ Akuoi.

LUKAS 21:12

Táe kon wakutu in diápa mobaḻí intua komintan, moiko in domokondon muna monia bo pogutúon. Moiko in diaan monia pobayá in baḷoi pososambayangan bo adilon poḷat potuoton kon ponjara. Diaan potayow kon datu bo pongawasa sin moiko in murí-Ku.

YOHANES 3:27

Ki Yohanes in notubag, “Diábí in tobatúmai intau in mokouḻí kon onu bo onu sin pakéonnea tontaní, aka deeman ki Allah in nobogoi kon inia.

OUMAN IN RASUL MITA 2:4

Mosia tua in komintandon kinawasa in Roho i Allah. Dá nomangkoidon in mosia nosingog nomaké in bahasa in intau ibanea. Mosia in nosingog podudui in singog inta inogoi in Roho i Allah singogon.

OUMAN IN RASUL MITA 3:13

Ki Allah inta sinumba i Abraham, i Ishak, i Yakub bo in mogoguyang naton tua in ki Allahbí inta nopomulia kon simpaḷ-Nea inta ki Yesus Kristus. Ki Yesus tua inta pinosarakan bo inta diá sinarima monimu kon tayowon i Pilatus umpakabí kai Pilatus in buḻiandon in Sia.

OUMAN IN RASUL MITA 4:31

Bo naonda in mosia nosambayang, tampat pinoyosipunan monia tatua in nodandú bo mosia komintan in kinawasa in Roho i Allah, dá mosia in diádon inangoian ondok in nopotaau in Pirman i Allah.

OUMAN IN RASUL MITA 6:10

Tongá mosia in diá mokobayow kon kopopandoi i Stepanus bo Roho inta mosingog kon inia.

OUMAN IN RASUL MITA 6:15

Bayongan in intau kon pinosidangan tatua komintan inimindoi kon i Stepanus. Inontongmai monia in pogot i Stepanus nádon pogot in malaekat.

OUMAN IN RASUL MITA 7:55

Táe ki Stepanus inta kinawasa in Roho i Allah tatua, iḷumangag kon ḷangit bo inontongnea in kamuliaan i Allah bo ki Yesus in sinimindog kon dotá in koḷanan i Allah.

KORINTUS 1 2:13

Tuamai, aka kami bo moginsilang kon kaadaan i Allah kon intau mita inta ain kinawasa in Roho i Allah, yo kami in diábí mosingog podudui in kabijaksanaan in intau, táe pinoduduibí kon onu inta ain sinundú in Roho i Allah.

EPESUS 3:5

Koḻipod, onu inta noibuni tatua diá kon dodai in onda in pinotaau kon intau, táe tanaa, ain pinoniata in Roho i Allah kon rasul mita bo kon nabi-Nea mita.

YAKOBUS 1:5

Aka oyúon in kon sigad monimu in diápa totok mobijaksana; yo musti mopoigum kon i Allah, dá ogoianbí i Allah in kabijaksanaan in sia. Sin takinbí pia in gina bo tabi in ki Allah in mobogoi kon batúan in intau.

PETRUS 1 1:12

Ki Allah ain noguman kon nabi mita tatua, kon onu in pinomia monia tatua, deemanbí inaidan monia sin kopontingan monia tontaní, táe kopontinganbí monimu, tua in soaḷ mita inta tanaa mako ain dinongog monimu notarang nongkon intau mita inta nopoyaput in Habar Mopia soaḷ ki Yesus Kristus. Mosia in nopoyaput intua komintan kon i monimu takin kawasa in Roho i Allah inta pinotabá-Nea mangoi nongkon soroga. Bo umpakabí malaekat mita yo moibogbí doman totok monotaau kon habar inta pinoyaput monia tua.