KORINTUS 2 9:10 - Alkitab Singog In Mongondow Masa In Tanaa

¹⁰ Sinadia-Neadon bibit kon intau inta mogogambor bo kaanon kon i naton. Siabí doman inta moposadia in bibit inambor monimu tatua, sinbá bungai in kopopia in gina monimu moguntu-guntuḷ domandon.

KORINTUS 2 9:10 Mawu Ofanana

KINOBAḺIAN 47:19

Donaai pomayá mako matoi in kami! Donaai pomayá mako in gobá nami diá in mangaḻenea. Uboḻiaidon in gandum in kami bo butá mita nami. Kami bo butá nami in mobaḻídon kapunyaan i datu. Ogoiaipa kami in gandum sinbá mobiagpa in kami bo ogoiaipa doman in bibit sin pomuḷaan kon gobá tatua!”

AMSAL 11:18

Kauntungan in intau moraat in kauntunganbí inta diá in mangaḻenea, kauntungan in intau inta nogaid kon inta mopia in kauntungan inta moḷoben in mangaḻenea.

MOHOHUTUBA 11:6

Ponabudon in bibitmu kon dodai in doḷo-doḷom bo dika mogogai in doḷom. Sin diábí kotaauan naton mongo bibit táonda in mopia in kobobiagnea. Dika-dika bo tumpaḷabí in sia mobiag motompia.

YESAYA 55:10

Naonda bo uyan nongkon ḷangit, bo diá mobui monik, táe momuntadbí kon butá, mopoḷumbá bo mopobiag in pinomuḷa mita, mopomungai in inta pomuḷaan bui bo inta kaanon,

HOSEA 10:12

Akuoi in moguman, ‘Ei Israel! Bukádon in gobá mobagu kon inimu, ponimboidon in bibit in kooadil, bo koyutdon in barakat inta pinomungai in tabimu inta totu-totuu kon i-Nakó. Sin, wakutuneadon iko in motayak kon i-Nakó, ki Tuhanmu. Akuoi in mamangoibí bo mopoinggú in barakat-Ku kon inimu.’

MATIUS 6:1

“Pokotoropdon, donaai moiko mogaid kon onu inta pinarenta in agamamu kon tayowon intau sinbá koontongan monia. Sin aka natua yo diábí in mangaḻenea, bo ki Amámu inta kon soroga in doíbí in natua.

KORINTUS 2 9:12

Sin oaid mopia inta inaidan monimu naa in deemanbí tongá modugang kon onda inta nogaatpa kon umat mita i Allah, táe nobaḻíbí doman dodoyonan nodapot in nobayong intau mopoyaput in sukur kon i Allah.

KORINTUS 2 9:6

Torop kopira in singogku naa! Intau inta nomuḷa kon topiḻik, topiḻik doman in mouḻínea, táe intau inta nomuḷa kon nobayong, yo mobayong doman in mouḻínea.

GALATIA 3:5

Ki Allah ain nobogoi in Roho-Nea kon i monimu bo ain nogaid kon soaḷ mita inta mokoherang kon sigad monimu. Yo degá inaidan i Allah intua sin moiko in dinumudui kon hukum i Musa? Andeka moiko in nokidongog kon Habar Mopia tatua bo nopirisaya kon i Kristus?

EPESUS 5:9

Sin nongkon bayag tuata momuká in bayongan oaid inta mopia, motuḻid bo mobiag totu-totuu kon tayowon i Allah.

PILIPI 1:11

Moiko in mobiag takin oaid mita inta totu-totuu mopia inta tongábí mouḻí nongkon i Yesus Kristus tontaní, dá ki Allah pomuliaan bo dayowon.

PILIPI 4:17

Tongá soaḷ inta totok in moponting kon inakó in deemanbí tongá motarima kon onu inogoi monimu. Táe ibogonku in mokoontongbí kon bungai mita inta mokodugang kon kauntungan monimu.

TESALONIKA 1 3:12

Bo igumon doman mako nami kon i Tuhan bá moiko in umuran mositabian bo oyúon doman in tabi monimu kon tumpaḷa intau, sahingga in tabi monimu in kodugang-kodugangdon ná tabi nami kon i monimu.

TESALONIKA 1 4:10

Bo tua komintan aindon pinoontong monimu kon bayongan utat inta kon Makedonia. Táe, tantúbí tongginaan nami in moiko sinbá modugang motompia in kobobiag monimu.