KORINTUS 2 5:10 - Alkitab Singog In Mongondow Masa In Tanaa

¹⁰ Sin notantúbí kon kita in diaanbí kon tayowon pongadilan i Kristus, bo pomuḷoi intau in motarimabí kon inta patus tarimaannea podudui in oaidannea kon wakutu in kon duniapa naa – oaid mopia andeka moraat.

KORINTUS 2 5:10 Mawu Ofanana

KINOBAḺIAN 18:25

Donaaidon intau mita inta diá kotaḷá tua poyoyanúon ḻimodon takin intau mita inta kotaḷá. Donaai kaasí Tuhan! Sin aka aidan i Tuhan intua, yo intau inta diá kotaḷá tua in pasti hukumon doman moyotakin in intau mita inta kotaḷá. Umpaka hakim in dunia naa mogaid kon inta diá moadil!”

DATU MITA IMITÁNEA 8:32

o Tuhan, igumon mako indongogan-Mudon nongkon soroga bo tantúdon in pelekara in bobantung-Mu mita tanaa. Hukum inta kotaḷá podudui in oaidnea bo poḷuatdon kon hukuman in intau inta diá kotaḷá.

DATU MITA IMITÁNEA 8:39

yo igumon mako in Iko nongkon tampat-Mu kon soroga moibogpa mokidongog bo mongampung poḷat motuḷung kon i monia. Tongábí Iko in nonotaau kon bonu in gina in intau. Tuamai in popoaidon kon intau podudui doman kon oaid monia tontaní,

AYUB 34:11

Sia in mohukum kon intau podudui in aidnea, mopoaid kon inia podudui in dodianea.

MAZMUR 62:12

Kotongonumaidon in dinongogku in ki Allah noguman kon kawasa in nongkon i-Niabí,

MAZMUR 98:9

Sin Sia in mamangoi sin mohakim kon dunia; bangusa mita in hakimon-Neabí podoyon kon inta moadil bo mobanar.

MOHOHUTUBA 11:9

Paké kopia in wakutumu kon dodai in iko mobagupa! Pokosanangbí kon dodai in iko bagupa ede in tayowmobiag. Duduiaibí in bayongan ibog in dimukudmu, aidai in bayongan niat in ginamu. Táe pokotorop, ki Allah inta kon soroga, in monantúbí kon bayongan in oaidmu.

MOHOHUTUBA 12:14

Ki Allah in mongadilbí kon bayongan in oaid naton; inta mopia bo inta moraat, nodapot in inta noibuni doman.

YEHEZKIEL 18:30

Ki Tuhan Inta Totok in moḷantud, in noguman, “Ei intau mita in Israel, Akuoi in monisigbí kon bayongan in intau podudui in aidnea tontaní. Pogogaidon in mogaid kon dosamu mita. Dika pomayámu mako in dosamu momoguyaat kon awakmu.

MATIUS 16:27

Diádon moonggot bo ki Adí Intau takin malaekat-Nea mita in mamangoi takin kawasa i Amá-Nea. Kon dodai intuata Sia motuḻidon kon pomuḷoi in intau podudui in oaidnea.

OUMAN IN RASUL MITA 10:42

Bo kami in pinarenta-Nea mopotaa-taau mako kon bayongan in intau bo moguman kon Siabí tua inta piniḻí i Allah mobaḻí hakim kon intau mita inta nobiagpa bo kon inta minatoidon.

OUMAN IN RASUL MITA 17:31

Sin ain bidon sinantú-Nea in wakutu pongadilan kon bayongan intau kon dunia naa. Oaidan tatua aidan in tobatú intau inta ain piniḻí i Allah tontaní. Bo bá totu-totuu mopirisaya in bayongan intau kon soaḷ tatua, dá biniag bui i Allah in Sia nongkon kinopatoian-Nea!”

SURAT I PAULUS KON JAMAAT RUM 2:16

Natuata in mobaḻí kon singgai inta ain sinantú tua. Kon Singgai tatua, podudui in Habar Mopia inta pinoyaputku naa, ki Allah pongin i Yesus Kristus mohakim kon bayongan inta noibuni kon bonu in gina bo raian in bayongan intau.

SURAT I PAULUS KON JAMAAT RUM 6:19

Popisí in moiko nobodokpa, dá akuoi in moguman kon contoh tanaa sinbá mogampang komangaḻean monimu. Tungkuḷ intua moiko noposarakan in bayongan awak monimu saḷaku ata in mogaid kon soaḷ mita inta mongoromú bo moraat sin makusud doman moraat. Tuamai in natua doman in masai naa, posarakaidon in bayongan awakmu saḷaku ata mogaid kon inta kinoibog i Allah sin makusud mopia i Allah.

KORINTUS 1 4:5

Popisí in deemanpabí wakutunea dá dika ḻimika-ḻikat in mohakim kon intau, kotaḷá andeka diá. Oḷatdon dapot moiangoi in ki Tuhan. Bambí Sia in mobuká kon onu inta nongoibuni kon sindip bo mobuká kon onu inta kon bonu in gina mita in intau. Bain kon wakutu in tuata bo duíon i Allah in intau mita podudui in oaid mita monia.

KORINTUS 2 7:3

Akuoi in moguman kon natua, deemanbí makusud mopotaḷá kon i monimu, sin nádon kain singogku inta muna, kon moiko in totok bidon kinotabi nami, sahingga in kita tantú notobatú kon dodai in nobiagpa nodapot in matoika bidon.

EPESUS 6:8

Pokotoropdon, pomuḷoi in intau inta nobiag ata andeka intau inta nobebas, motarimabí kon tontuḻínea nongkon i Tuhan kon bayongan inta mopia inta ain inaidannea.

IBRANI 9:27

Bo sinantú domandon i Allah, kon intau in tongábí komintan matoi, onda intua adilondon i Allah.

PETRUS 1 4:5

Táe mosiabí in motanggungjawab kon bayongan tua kon tayowon i Allah inta ain nobasadia mohakim kon intau inta nobiag bo intau inta ain minatoi.

WAHYU 2:23

Dumoduduinea mita in ḻimodon-Kubí doman sinbá kotaauandon in bayongan jamaat kon Akuoibí naa in Sia inta nonotaau kon raian bo gina intau. Bo moiko in tuḻían-Kubí podudui in aid monimu tontaní.

WAHYU 22:12

“Tarukira in naa!” guman i Yesus, “Diádon moonggot bo Akuoi in mamangoi modia kon boḻi in pinogaidan in intau podudui kon onu inta ain inaidannea.

SAMUEL 1 2:10

Musung mita i Tuhan in morimumud motontopong, mosia in moondok; nongkon ḷangit in Sia monggotup. Ki Tuhan in mohakim kon bayongan in dunia naa, bo mobogoi in kawasa inta momulia kon i datu inta piniḻí-Nea.”

SAMUEL 1 2:3

Gogaiaidon in ambungangaḷmu inta diá in mangaḻenea tua! Dikadon mosingog kon inta diá in baragunanea! Sin ki Tuhan tua in ki Allah inta totok in nonotaau; inta mohakim kon bayongan oaid in intau.